ប្រែសម្រួលៈបំណង(បាងកកប៉ុស្តិ៍)៖ សមាជិកព្រឹទ្ធសភាថៃខ្លះបានបញ្ជាក់ថាពួកគេនឹងមិនបោះឆ្នោតគាំទ្រលោកស្រី ភែតងតាន «អ៊ុងអ៊ីង» ស៊ីណាវ៉ាត ជានាយករដ្ឋមន្ត្រីនាពេលខាងមុខទេ ទោះជាគណបក្សប្រឆាំងភឿថៃដណ្តើមបានសម្លេងឆ្នោតគាំទ្រភ្លូកទឹកភ្កូកដីក្នុងការបោះឆ្នោតនាប៉ុន្មានខែខាងមុខក៏ដោយ នេះបើតាមការបញ្ជាក់ពីសមាជិកព្រឹទ្ធសភាលោកវ៉ាន់ឆៃ សនស៊ីរិ(Wanchai Sornsiri)។
សមាជិកព្រឹទ្ធសភាលោកវ៉ាន់ឆៃ សនស៊ីរិ
លោកស្រី ភែតងតាន «អ៊ុងអ៊ីង» ស៊ីណាវ៉ាត
លោកវ៉ាន់ឆៃបានសរសេរបង្ហោះក្នុងហ្វេសប៊ុកកាលពីថ្ងៃសៅរ៍ម្សិលមិញថា « សមាជិកសភា២៥០នាក់ ឬព្រឹទ្ធសភាដែលនឹងឈ្នះភ្លូកទឹកភ្លូកដី?។លោកចង់និយាយសំដៅការបោះឆ្នោតគាំទ្របេក្ខជននាយករដ្ឋមន្ត្រីណាម្នាក់ដែលទាមទារការអនុម័តយល់ព្រមទាំងពីសភានិងព្រឹទ្ធសភាព្រមគ្នា។
លោកស្រី ភែតងតាន កូនស្រីច្បងរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត ដែលបច្ចុប្បន្នជាទីប្រឹក្សាគណបក្សប្រឆាំងភឿថៃ បានសន្យាដឹកនាំគណបក្សឆ្ពោះទៅរកការឈ្នះឆ្នោតក្នុងសម្លេងភាគច្រើនលើសលប់ក្នុងការបោះឆ្នោតសកលដែលគ្រោងធ្វើនៅខែឧសភាឆ្នាំនេះ។
យោងតាមលោកវ៉ាន់ឆៃ គណបក្សណាមួយដែលទទួលបានសម្លេងឆ្នោតជាងពាក់កណ្តាលនៅក្នុងសភា ជាគណបក្សឈានមុខគេក្នុងការរៀបចំបង្កើតរដ្ឋាភិបាលតែតំណែងនាយករដ្ឋមន្រ្តីត្រូវឆ្លងកាត់សភានិងព្រឹទ្ធសភា។«ការជ្រើសរើសនាយករដ្ឋមន្ត្រីសំខាន់ដោយសារបុគ្គលនេះត្រូវមានទេពកោសល្យដឹកនាំនិងទទួលយកបានទាំងពីសភានិងប្រជាជាតិទាំងមូល។តំណែងនាយករដ្ឋមន្ត្រីមិនជាការលេងសើចរបស់នរណាម្នាក់ឬក្រុមបក្ខណាឡើយ»។
«នាយករដ្ឋមន្ត្រីជានិម្មិតរូបនៃមោទនភាពរបស់ប្រជាជាតិទាំងមូលនិងវាមិនសមស្របទេដែលជ្រើសរើសនរណាម្នាក់ជានាយករដ្ឋមន្ត្រីដូចអ្វីបានកើតឡើងកាលពីអតីតកាល»។
លោកវ៉ាន់ឆៃក៏បានច្រានចោលការអះអាងរបស់ភែតងតាន ក្នុងយុទ្ធនាការបោះឆ្នោតមួយដែលថា គណបក្សភឿថៃនឹងឈ្នះឆ្នោតភ្លូកទឹកភ្លូកដី។លោកថា«ខ្ញុំឮគណបក្សភឿថៃថានឹងដណ្តើមអោយបានសម្លេងឆ្នោតភាគច្រើនលើសលប់និងជ្រើសតាំងភែតងតាន ជានាយករដ្ឋមន្ត្រី។វាជារឿងរបស់ភឿថៃ តែក្រុមរបស់ខ្ញុំ សម្ពន្ធមិត្តរបស់ខ្ញុំនឹងមិនបោះឆ្នោតអោយទេ»។
«បើភែតងតាន ចង់ធ្វើជានាយករដ្ឋមន្ត្រី ទាល់តែរកអោយបានអាសនៈសភា៣៧៦ តែបើរកមិនបានទេកុំសង្ឃឹម។តាមពិតក្រុមប្រឆាំងនេះស្វះស្វែងរកតែអាសនៈសភា២៥០ ។កុំភ្លេចថា សមាជិកព្រឹទ្ធសភា២៥០ទៀតនឹងបោះទម្លាក់វិញ»។
សូមបញ្ជាក់ថា រដ្ឋធម្មនុញ្ញថៃតំរូវអោយតំណែងនាយករដ្ឋមន្ត្រីត្រូវតែបោះឆ្នោតគាំទ្ររួមគ្នាពីសភានិងព្រឹទ្ធសភា។
រំលឹកថា ក្រោយការបោះឆ្នោតសកលឆ្នាំ២០១៩ ពួកសមាជិកព្រឹទ្ធសភាដែលត្រូវបានតែងតាំងឡើងដោយសមាសភាពក្រុមធ្វើរដ្ឋប្រហារបានបោះឆ្នោតគាំទ្រលោកប្រាយុទ្ធ ចាន់ អូចា ក្នុងសម្លេងលើសលប់ រីឯគណបក្សភឿថៃទោះជាឈ្នះឆ្នោតបានសម្លេងច្រើនជាងគេមិនមានឳកាសបង្កើតរដ្ឋាភិបាលកើតទេ។
បើភែតងតានត្រូវបានបោះឆ្នោតអោយក្លាយជានាយករដ្ឋមន្ត្រី នោះទាល់តែលោកស្រីត្រូវរកអោយបានសមាជិកសភានិងព្រឹទ្ធសភាគាំទ្រយ៉ាងតិច៣៧៦ដែលស្មើនឹងជាងពាក់កណ្តាលនៃសមាជិកសភាទាំងពីររួមបញ្ចូលគ្នាចំនួន៧៥០៕