ដោយៈ សុវណ្ណកុម្ភៈ / ភ្នំពេញៈ ក្រុម One Last Time ប្រជែងបានឋានៈ ជាក្រុមជើងឯកថ្នាក់ជាតិ AK2League 2022 ដោយប្រកួតផ្ដាច់ព្រ័ត្រ ឈ្នះក្រុម Jet-ll កាលពីថ្ងៃទី១២ កុម្ភៈ ម្សិលមិញនេះ ។
លោក ឈុន ហាំងជ័រ ហៅ Sento ដែលជាគ្រូបង្វឹកក្រុម One Last Time បាននិយាយថាៈ កូនក្រុមរបស់លោក ធ្វើបានល្អ ដោយមួយព្រឹត្តិការណ៍នេះ មិនស្គាល់ចាញ់ទាល់តែសោះ ក្នុងចំណោម ៦ ប្រកួត។ ជ័យជំនះនេះ ធ្វើឲ្យលោកមាន ជំនឿចិត្តថា ពួកគេ មានសមត្ថភាពគ្រប់គ្រាន់ ក្នុងការប្រជែងយកមេដាយមាស ពីព្រឹត្តិការណ៍ស៊ីហ្គេម លើវិញ្ញាសា AK2 នេះ ។
លោក Sento បានបន្ដថាៈ កីឡាអេឡិចត្រូនិក (E-Sport) វិញ្ញាសា AK2 ក្រុមរបស់លោក ចូលរួមប្រកួតជារឿយៗ ។ ពួកគេមានបទពិសោធន៍ ហើយអ្វីដែលអស្ចារ្យ នោះ ក្រុមបានទទួលជ័យជំនះ នៅវគ្គផ្ដាច់ព្រ័ត្រ ហើយក្លាយជាតំណាងរបស់កម្ពុជា ចូលរួមប្រកួតកីឡាស៊ីហ្គេម លើវិញ្ញាសា AK2 ។
AK2 League 2022 បានដំណើរការតាំងពីដើមឆ្នាំ២០២២ មកម្ល៉េះ គឺមានរយៈពេល ជាងមួយឆ្នាំ មកហើយ ដោយប្រកួតលើ ២ វិញ្ញាសា គឺវិញ្ញាសាក្រុម (AK2 Team Match) និងវិញ្ញាសាឯកត្តជន (Personal Mode) បន្ទាប់ពីឆ្លងកាត់ការប្រកួត ៥ រដូវកាល ទើបរកឃើញក្រុមតំណាងកម្ពុជា ដើម្បីចូលរួមប្រកួតកីឡាស៊ីហ្គេម នាពេលខាងមុខ លើវិញ្ញាសា AK2 ។ ចំពោះវិញ្ញាសាឯកត្តជន បានទៅលើកីឡាករ សៀក សីសុខេង មកពីក្រុម Team MAX៕ V / N
