ប្រែសម្រួល : កញ្ញាដាលីស (បាងកកប៉ុស្តិ៍) ៖ ស្លាកលេខរថយន្តផ្ទាល់ខ្លួន ដែលមានអក្សរ “R”ត្រូវគេលក់បានជាង ២៥ លានដុល្លារហុងកុង (៣,១៨ លានដុល្លារអាម៉េរិក) នៅឯការលក់ដេញថ្លៃរបស់រដ្ឋាភិបាល ដែលជាតម្លៃខ្ពស់បំផុតទីពីរនៅក្នុងទីក្រុងហុងកុង។
ស្លាកលេខចុះបញ្ជីត្រឹមត្រូវមួយនេះគឺជាស្លាកលេខមួយក្នុងចំណោមស្លាកលេខចំនួន ៤៩សម្រាប់ទិញនៅឯការលក់ដេញថ្លៃនៅពិធីបុណ្យចូលឆ្នាំថ្មីដែលរៀបចំឡើងដោយនាយកដ្ឋានដឹកជញ្ជូនកាលពីថ្ងៃអាទិត្យទី១២ កុម្ភៈ។
ការដេញថ្លៃសម្រាប់ស្លាកលេខ “R” បានចាប់ផ្តើមនៅតម្លៃ ៥.០០០ ដុល្លារហុងកុង ហើយអ្នកទិញរាប់សិបនាក់បានដំឡើងថ្លៃយ៉ាងឆាប់រហ័ស។ អ្នកដេញថ្លៃម្នាក់បានផ្តល់ជូន ២ លានដុល្លារហុងកុង ប៉ុន្តែភ្លាមៗនោះតម្លៃបានកើនឡើងដល់ទៅ ៩ លានដុល្លារហុងកុង រួចហើយឡើងដល់ ៩,៤ លានដុល្លារហុងកុង។
បន្ទាប់ពីការដេញថ្លៃប្រហែល៦០ជុំ ញញួរបានវាយសម្រេចត្រឹមតម្លៃ ២៥,៥ លានដុល្លារហុងកុង ដែលជាចំនួនខ្ពស់បំផុតទីពីរដែលបានចំណាយសម្រាប់ស្លាកលេខនៅក្នុងទីក្រុងហុងកុង។
រំលឹកថា ស្លាកលេខ “W” បានលក់ក្នុងតម្លៃ ២៦ លានដុល្លារហុងកុងក្នុងខែមីនា ឆ្នាំ ២០២១ គឺលើសប្រហែល ៥.២០០ ដងនៃតម្លៃលក់បើកឆាក។
អ្នកលក់ស្លាកលេខបានប្រាប់ប្រព័ន្ធផ្សព្វផ្សាយមុនពេលលក់ថា ស្លាកលេខ “R” ត្រូវគេរំពឹងថានឹងទទួលបានយ៉ាងហោចណាស់ ១០ លានដុល្លារហុងកុង ពីព្រោះអក្សរនេះមានទំនាក់ទំនងជាមួយនឹងរថយន្តប្រណាំងនិងលេខសំណាងនៅក្នុងហោរាសាស្ត្រចិន៕