ប្រែសម្រួល : កញ្ញាដាលីស (ដេល្លីម៉េល) ៖ អតីតនាយករដ្ឋមន្ត្រីអ៊ីតាលីលោក ស៊ីវីយ៉ូ ប៊ែរលូស្កូនី (Silvio Berlusconi)បានស្តីបន្ទោសប្រធានាធិបតីអ៊ុយក្រែនចំពោះការលុកលុយរបស់រុស្ស៊ីជិតមួយឆ្នាំមកនេះ ដោយដាក់ខ្លួនគាត់ជាថ្មីម្តងទៀតឱ្យផ្ទុយនឹងការគាំទ្រយ៉ាងម៉ឺងម៉ាត់របស់នាយករដ្ឋមន្ត្រីអ៊ីតាលីបច្ចុប្បន្នលោកស្រី ចចចា មេឡូនី (Giorgia Meloni) សម្រាប់រដ្ឋាភិបាលក្រុងគៀវ។
លោកប៊ែរលូស្កូនី ដែលគណបក្សរបស់លោកគាំទ្ររដ្ឋាភិបាលចម្រុះស្តាំនិយមរបស់លោកស្រីមេឡូនី គឺជាមិត្តភក្តិនិងជាសម្ពន្ធមិត្តយូរអង្វែងរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន។លោកបាននិយាយថា សង្គ្រាមនៅអ៊ុយក្រែន “នឹងមិនកើតឡើងជាដាច់ខាត” ប្រសិនបើលោកហ្សេលេនស្គី “ឈប់វាយប្រហារសាធារណរដ្ឋស្វយ័តដុនបាស” ជាផ្នែកនៃប្រទេសអ៊ុយក្រែនដែលរុស្ស៊ីបានកាត់យកដោយខុសច្បាប់។
លោកប៊ែរលូស្កូនីបាននិយាយថា លោកវិនិច្ឆ័យអាកប្បកិរិយារបស់លោកហ្សេលេនស្គី “អវិជ្ជមានយ៉ាងខ្លាំងបំផុត”។ លោកក៏បានរិះគន់លោកស្រីមេឡូនីផងដែរសម្រាប់ការជួបជាមួយលោកហ្សេលេនស្គី ដោយប្រាប់អ្នកកាសែតកាលពីថ្ងៃអាទិត្យថា លោកនឹងមិនធ្វើដូចលោកស្រីទេ ប្រសិនបើលោកជានាយករដ្ឋមន្ត្រី។
ការអត្ថាធិប្បាយនេះបានទាក់ទាញការរិះគន់ភ្លាមៗកាលពីថ្ងៃអាទិត្យពីការិយាល័យរបស់លោកស្រីមេឡូនី ដែលនិយាយថា “ការគាំទ្ររបស់រដ្ឋាភិបាលសម្រាប់អ៊ុយក្រែនគឺរឹងមាំនិងមិនងាករេ”។ ការិយាល័យរបស់លោកស្រីបាននិយាយថា ការគាំទ្រសម្រាប់អ៊ុយក្រែនគឺច្បាស់លាស់ទាំងនៅក្នុងគោលនយោបាយរដ្ឋាភិបាលនិងការបោះឆ្នោតសភាដែលរួមមានការប្រគល់អាវុធដល់កងកម្លាំងអ៊ុយក្រែនផងដែរ។
ទីប្រឹក្សារបស់លោកហ្សេលេនស្គី គឺ លោក អូឡេក នីកូលេនកូ (Oleg Nikolenko) កាលពីថ្ងៃចន្ទបានថ្កោលទោសសេចក្តីថ្លែងការណ៍របស់លោកបឺលូស្កូនី ដោយនិយាយថា”តាមរយៈការផ្សព្វផ្សាយការឃោសនារបស់រុស្ស៊ី លោកលើកទឹកចិត្តរុស្ស៊ីឱ្យបន្តឧក្រិដ្ឋកម្មរបស់ខ្លួនប្រឆាំងនឹងអ៊ុយក្រែន ហើយបន្ទាប់មកត្រូវទទួលខុសត្រូវផ្នែកនយោបាយនិងសីលធម៌”។
លោកនីកូលេនកូបាននិយាយថា “ការចោទប្រកាន់ឥតន័យរបស់លោកប៊ែរលូស្កូនីប្រឆាំងនឹងប្រធានាធិបតីអ៊ុយក្រែន គឺជាការប៉ុនប៉ងថើបដៃរបស់ពូទីន ដែលជាដៃប្រឡាក់ឈាម”៕
អតីតនាយករដ្ឋមន្ត្រីអ៊ីតាលីលោក ស៊ីវីយ៉ូ ប៊ែរលូស្កូនី