ប្រែសម្រួល : កញ្ញាដាលីស (ដេល្លីម៉េល) ៖ យ៉ាងហោចណាស់មនុស្សបីនាក់ត្រូវបានបាញ់សម្លាប់និងច្រើននាក់ទៀតរងរបួសបន្ទាប់ពីខ្មាន់កាំភ្លើងម្នាក់បានបើកការបាញ់ប្រហារនៅសាកលវិទ្យាល័យរដ្ឋមីស៊ីហ្គែន (Michigan State University) កាលពីយប់ថ្ងៃចន្ទទី១៣កុម្ភៈ។
ប៉ូលីសបានបញ្ជាក់ថា មនុស្សប្រាំនាក់ត្រូវបានបញ្ជូនទៅកាន់មន្ទីរពេទ្យ ។ អ្នករបួសខ្លះកំពុងប្រឈមការបាត់បង់អាយុជីវិត។
ជនសង្ស័យកំពុងរត់គេចខ្លួន ហើយប៉ូលីសកាលពីយប់ថ្ងៃចន្ទបានបញ្ចេញរូបថតរបស់បុរសដែលពួកគេពណ៌នាថាជាបុរសស្បែកខ្មៅកម្ពស់ទាបពាក់ម៉ាស់ ស្បែកជើងក្រហម អាវខូវប៊យនិងមួកកីឡាបេស្បល។
លោក គ្រីស រ៉ូស្មាន់ (Chris Rozman)នាយប៉ូលីសនៅប៉ុស្តិ៍ប៉ូលីសសាកលវិទ្យាល័យរដ្ឋមីស៊ីហ្គែន បាននិយាយថា “សូមស្នាក់នៅតែក្នុងផ្ទះ”។
លោករ៉ូស្មាន់បាននិយាយថា ឧបទ្ទវហេតុនេះបានចាប់ផ្តើមនៅម៉ោង ៨៖១៨ នាទីយប់នៅអគារ Berkey Hall ក្នុងបរិវេណសាលា។
“ពួកយើងបានទៅដល់កន្លែងកើតហេតុភ្លាមៗក្នុងពេលតែប៉ុន្មាននាទី ហើយនៅទីនោះ យើងបានរកឃើញជនរងគ្រោះពីការបាញ់ប្រហារជាច្រើននាក់”។
“ឧបទ្ទវហេតុនេះបានរំកិលទៅអគារមួយទៀតនៅជិតនោះ គឺ អគារសហភាពរដ្ឋមីស៊ីហ្គែន ជាកន្លែងដែលមានរបាយការណ៍មួយផ្សេងទៀតអំពីការបាញ់ប្រហារភ្លាមៗបន្ទាប់ពីរបាយការណ៍នៃឧបទ្ទវហេតុដំបូង”។
គេមិនដឹងច្បាស់ទេថាតើករណីស្លាប់ម្នាក់នោះបានកើតឡើងនៅទីណា។
លោករ៉ូស្មាន់បាននិយាយថាមានការឆ្លើយតបយ៉ាងលើសសលប់ពីសំណាក់ប៉ូលីសចំពោះការបាញ់ប្រហារនេះ។
លោកបាននិយាយថាមានជនសង្ស័យម្នាក់ ហើយរូបគេត្រូវបានឃើញចុងក្រោយគឺចាកចេញពីអគារ MSU Union ដោយថ្មើរជើងនៅផ្នែកខាងជើងនៃអគារនេះ៕
ជនសង្ស័យកំពុងរត់គេចខ្លួន ជាជនស្បែកខ្មៅកម្ពស់ទាប ពាក់ម៉ាស់ ស្បែកជើងក្រហម អាវខូវប៊យ និងមួកកីឡាបេស្បល