ប្រែសម្រួល : កញ្ញាដាលីស (បាល់ទាត់) ៖ សម្រាប់ថ្ងៃពុធនេះ ក្នុងការប្រកួត Uefa Champions League វគ្គ១៦ ក្រុមចុងក្រោយជើងទី១ មានពីរគូធំៗត្រូវប៉ះគ្នា គឺ Club Brugge ប៉ះ Benfica និង Dortmund ស្វាគមន៍ Chelsea។ Club Brugge និង Chelsea ដែលកំពុងធ្លាក់ជើងដូចគ្នា មិនសង្ឃឹមឈ្នះក្នុងការប្រកួតនេះទេ ព្រោះគូប្រជែងសុទ្ធតែកំពុងលេងល្អរៀងៗខ្លួន។
ទន្ទឹមនេះ ក៏មានជំនួបធំនៅ EPL មួយគូផងដែរ គឺរវាង Arsenal និង Man City ហើយក្នុង La Liga ក៏មានមួយគូទៀតដែរ រវាងក្រុម Real Madrid និង Elche តែយើងនឹងលើកយកតែគូក្នុង UCL មកវិភាគជូនប៉ុណ្ណោះ។
ការព្យាករណ៍ ៖
– Club Brugge vs Benfica
* Benfica មិនស្គាល់ចាញ់សោះក្នុង Champions League វគ្គចែកពូល (ឈ្នះ៤, ស្មើ២) រដូវកាលនេះ។
* Club Brugge ឈ្នះ១គត់ក្នុងចំណោមការប្រកួត ១៣ លើកចុងក្រោយ។
* Benfica របូតគ្រាប់បាល់ក្នុង ៥ ប្រកួតនៃ UCL ៦ លើកចុងក្រោយ។
ក្រុម Benfica កំពុងរីករាយនឹងរដូវកាលដ៏ល្អមកទល់ពេលនេះ កូនក្រុមរបស់លោក Roger Schmidt បច្ចុប្បន្នមាន ៥ ពិន្ទុដាច់គេក្នុង Primeria Liga ហើយពួកគេបានឆ្លងកាត់ការប្រកួតវគ្គចែកពូល Champions League ដោយមិនចាញ់សោះ (ឈ្នះ៤, ស្មើ២)។
Benfica បានឈរនៅទីកំពូលនៃពូល H ដែលមានក្រុមខ្លាំងៗដូចជា PSG, Juventus និងម្ចាស់ជើងឯកអ៊ីស្រាអែល ១៤ សម័យ Maccabi Hafia ។ ក្រុមព័រទុយហ្គាល់នេះមិនដែលចាញ់សោះក្នុងការប្រកួតក្រៅដី ៥ លើកចុងក្រោយ (ឈ្នះ៤, ស្មើ១) ហើយគួរតែឈ្នះទៀតនៅយប់ថ្ងៃពុធនេះ។
Club Brugge កំពុងធ្លាក់ដុនដាបខ្លាំងចាប់តាំងពីការប្រកួត World Cup ដោយឈ្នះតែ១ប្រកួតគត់ក្នុងចំណោមការប្រកួត ១៣ លើកចុងក្រោយ។ ក្រុមម្ចាស់ផ្ទះអាចបញ្ចប់ក្នុងចំណាត់ថ្នាក់លេខ ២ ក្នុងពូល B ប៉ុន្តែបានធ្លាក់ចុះទម្រង់លេងតាំងពីពេលនោះមក ហើយគេពិបាកជឿថាក្រុមបែលហ្ស៊ិកនេះនឹងអាចយកឈ្នះនៅថ្ងៃនេះបាននោះឡើយ។
បរាជ័យតែមួយគត់របស់ Club Brugge ក្នុងពូល B បានកើតឡើងនៅពេលដែលពួកគេត្រូវបានផ្តួល ៤-០ នៅក្នុងផ្ទះក្រោមថ្វីដៃ Porto ។ បច្ចុប្បន្ន Porto ឈរនៅលេខរៀងទី ២ ក្នុងក្របខណ្ឌកំពូលរបស់ព័រទុយហ្គាល់ ដោយតាមពីក្រោយក្រុមកំពូលតារាង Benfica ចំនួន ៥ ពិន្ទុ។ ក្រុមម្ចាស់ផ្ទះប្រឈមមុខនឹងភារកិច្ចធ្ងន់ដើម្បីទទួលបានលទ្ធផលនៅក្នុងជើងទីមួយនេះ។
ការប្រកួតនៅយប់ថ្ងៃពុធនេះច្បាស់ជាល្អមើល ព្រោះក្រុមទាំងពីរតែងរបូតគ្រាប់បាល់នៅ៥ឬ៦ប្រកួតចុងក្រោយនេះ។ ម្ចាស់ផ្ទះដឹងយ៉ាងច្បាស់អំពីសារៈសំខាន់នៃការនាំមុខមុនក្នុងជើងទី១ ហើយពួកគេរំពឹងលេងការពារច្រើនជាងវាយសម្រុក។
លទ្ធផលទស្សនទាយ Benfica ឈ្នះ ២-១។
– Dortmund vs Chelsea
* Julian Brandt បានរួមចំណែកស៊ុតបញ្ចូលទីក្នុងការប្រកួត ៤ លើកក្នុងចំណោម ៦ ប្រកួតចុងក្រោយរបស់ Dortmund ក្នុងឆ្នាំ ២០២៣។
* Chelsea ឈ្នះតែ២ប្រកួតប៉ុណ្ណោះក្នុងចំណោមការប្រកួត១២លើកចុងក្រោយរបស់ពួកគេ។
* ៥ប្រកួតចុងក្រោយរបស់ Dortmund មានគ្រាប់បាល់លើស២,៥គ្រាប់។
* Dortmund មិនទាន់អាចរក្សា Clean Sheet ក្នុងទឹកដីបានទេនៅឆ្នាំ ២០២៣ នេះ។
Borussia Dortmund របស់លោក Edin Terzic លេងសាហាវខ្លាំងណាស់ ចាប់តាំងពីការត្រឡប់មក Bundesliga វិញ ដោយឈ្នះការប្រកួតទាំង៦របស់ពួកគេ ខណៈស៊ុតបញ្ចូលទីយ៉ាងហោចណាស់២គ្រាប់ក្នុងការប្រកួតនីមួយៗក្នុងអំឡុងឆ្នាំ ២០២៣។
ដោយគ្មានបញ្ហារបួសធំដុំណាមួយ លោក Terzic នឹងអាចរៀបចំកីឡាករបានងាយស្រួលនិងត្រៀមខ្លួនជាស្រេចដើម្បីបង្កើននូវគ្រាប់បាល់មិនគួរឱ្យជឿចំនួន៩គ្រាប់របស់ពួកគេដែលបានស៊ុតបញ្ចូលក្នុងការប្រកួតក្នុងផ្ទះ២លើកចុងក្រោយរបស់ពួកគេ។ ទោះយ៉ាងណា ពួកគេបានរបូត៤គ្រាប់ក្នុងដំណើរការនេះ ដូច្នេះពួកគេពិតជាមានលទ្ធភាពធ្លាយសំណាញ់ទីគ្រប់ពេល។
កំណត់ត្រារបស់ Dortmund ក្នុង៩ប្រកួតចុងក្រោយរបស់ពួកគេទល់នឹងគូប្រជែងមកពីអង់គ្លេសគឺមិនល្អទេ (ស្មើ៣, ចាញ់៩) ប៉ុន្តែពួកគេពិតជាអាចមានឱកាសឈ្នះក្នុងទឹកដីជាលើកដំបូងទល់នឹងក្រុមធ្លាក់ជើង Chelsea ។
ទោះបីជាអ្វីៗមិនទាន់រលូនសម្រាប់ Chelsea ក្រោមការដឹកនាំរបស់លោក Graham Potter (ឈ្នះ៩ ស្មើ៧ ចាញ់៧) ក៏ដោយ ក៏ពួកគេមកទីនេះក្រោយលេងមិនដែលចាញ់ ៤ ប្រកួតជាប់គ្នា (ឈ្នះ១ ស្មើ៣) ជាការមិនដែលចាញ់យូរបំផុតទីពីររបស់ពួកគេក្រោមការដឹកនាំរបស់គ្រូបង្វឹកបច្ចុប្បន្ន។
ត្បិតបង្ហាញភាពរឹងមាំខ្លះក៏ដោយ ក៏ Chelsea ឈ្នះបានតែម្តងប៉ុណ្ណោះក្នុង៨ប្រកួតចុងក្រោយចាប់តាំងពីបើកឆាកឆ្នាំថ្មី២០២៣ ដោយមិនអាចស៊ុតបញ្ចូលទីលើសពី១គ្រាប់ក្នុងរាល់ការប្រកួតនោះឡើយ។
អ្វីដែល Chelsea អាចអួតបាននៅថ្ងៃនេះគឺកីឡាករចំណូលថ្មីដែលទិញចូលកាលពីខែមករា។ ពួកគេជះលុយច្រើនជាងក្លិបណាៗទាំងអស់ ដោយទិញបានកីឡាករល្អៗដូចជា Mudryk, Fernandez និង Madueke ក្នុងចំណោមអ្នកផ្សេងទៀត។
តែទោះយ៉ាងណា ពួកគេនៅតែមិនរំពឹងឈ្នះ Dortmund ដែលកំពុងលេងល្អដូចផ្កា។
លទ្ធផលទស្សនទាយ Dortmund ឈ្នះ ៣-១៕
Chelsea មិនរំពឹងឈ្នះនៅទឹកដី Dortmund