ប្រែសម្រួល : កញ្ញាដាលីស (ដេល្លីម៉េល) ៖ យន្តហោះឯកជនរបស់តារាចម្រៀង អែលវីស ប្រេសលី (Elvis Presley) មានម្ចាស់ថ្មីហើយ បន្ទាប់ពីយន្តហោះនេះត្រូវបានចតចោលនៅវាលខ្សាច់ញូវរ៉ូសវែល (New Roswell) ក្នុងរដ្ឋញូវម៉ិកស៊ីកូអស់រយៈពេល ៤០ ឆ្នាំ។
លោកស្រី ព្រីស៊ីលឡា ប្រេសលី (Priscilla Presley) អាយុ ៧៧ ឆ្នាំ ជាអតីតភរិយារបស់តារាចម្រៀងរូបនេះ និងជាម្តាយរបស់កូនទោលតែមួយគត់របស់គាត់ដែលទើបស្លាប់ទៅគឺ នាង លីសា ម៉ារី ប្រេសលី (Lisa Marie Presley) បានស្ថិតនៅទីនោះ ខណៈយន្តហោះនេះត្រូវបាននាំទៅលក់ដេញថ្លៃនៅឯការដេញថ្លៃមួយហៅថា Mecum Kissimmee Collector Carក្នុងរដ្ឋផ្លរីដាកាលពីថ្ងៃទី ៨ ខែមករា ដែលជាខួបគម្រប់ ៨៨ ឆ្នាំរបស់ស្តេចចម្រៀង Rock and Roll រូបនេះ។
ការដេញថ្លៃបើកឆាកសម្រាប់យន្តហោះ Lockheed 1329 Jetstar ឆ្នាំ១៩៦២ គឺ ១០ ម៉ឺនដុល្លារ ប៉ុន្តែការផ្តល់ជូនបានកើនឡើងបន្តិចម្តងៗ រហូតដល់ញញួរវាយសម្រេចក្នុងតម្លៃដេញថ្លៃឈ្នះ ២៦ ម៉ឺនដុល្លារ។
ម្ចាស់ថ្មីបានដេញថ្លៃតាមទូរស័ព្ទហើយមិនត្រូវបានគេស្គាល់អត្តសញ្ញាណនោះទេ។
យន្តហោះ Lockheed នេះត្រូវបានទិញដំបូងក្នុងខែធ្នូ ឆ្នាំ ១៩៧៦ ក្នុងតម្លៃ ៨៤ ម៉ឺនដុល្លារ គឺតិចជាងមួយឆ្នាំមុនពេលការស្លាប់របស់លោកអែលវីសនៅខែសីហា ឆ្នាំ ១៩៧៧៕
យន្តហោះ Lockheed 1329 Jetstar ឆ្នាំ១៩៦២ លក់ដេញថ្លៃបាន ២៦ ម៉ឺនដុល្លារ