ប្រែសម្រួល : កញ្ញាដាលីស (ដេល្លីម៉េល) ៖ ការកើនឡើងភាពតានតឹងរបស់អាម៉េរិកជាមួយចិន ការបារម្ភអំពីការវាយលុកថ្មីរបស់រុស្ស៊ីប្រឆាំងនឹងអ៊ុយក្រែន និងការជាប់គាំងជាមួយតួកគីជុំវិញការពង្រីកខ្លួនរបស់អង្គការណាតូ នឹងស្ថិតលើកំពូលនៃរបៀបវារៈរបស់រដ្ឋមន្ត្រីការបរទេសលោក អានថូនី ប្លីងកិន ខណៈគាត់ធ្វើដំណើរទៅកាន់អឺរ៉ុបក្នុងសប្តាហ៍នេះ។
ក្រសួងការបរទេសអាម៉េរិកបាននិយាយកាលពីថ្ងៃពុធទី១៥កុម្ភៈថា លោកប្លីងកិននឹងចាកចេញពីទីក្រុងវ៉ាស៊ីនតោននៅថ្ងៃព្រហស្បតិ៍ទី១៦កុម្ភៈសម្រាប់កិច្ចប្រជុំជិតមួយសប្តាហ៍នៅក្នុងប្រទេសអាល្លឺម៉ង់ តួកគី និងក្រិក។
លោកចាប់ផ្តើមដំណើរទស្សនកិច្ចរយៈពេលប្រាំមួយថ្ងៃរបស់គាត់នៅឯសន្និសីទសន្តិសុខទីក្រុងមុយនិច (Munich) ជាកន្លែងដែលគាត់នឹងចូលរួមជាមួយអនុប្រធានាធិបតី កាម៉ាឡា ហារីស តំណាងឱ្យរដ្ឋបាលបៃដិន។
មានការរំពឹងទុកខ្ពស់ថា លោកប្លីងកិនអាចនឹងប្រើឱកាសនេះដើម្បីជួបជាមួយមន្ត្រីគោលនយោបាយការបរទេសកំពូលរបស់ចិន គឺលោក វ៉ាង យី ដែលនឹងចូលរួមក្នុងសន្និសីទទីក្រុងមុយនិចផងដែរ។ មិនទាន់មានកិច្ចប្រជុំបែបនេះគ្រោងធ្វើឡើងនៅឡើយទេ ប៉ុន្តែប្រសិនបើមានការពិភាក្សាគ្នាមែននោះ វានឹងក្លាយជាកិច្ចពិភាក្សាកម្រិតខ្ពស់លើកដំបូងជាមួយចិន ចាប់តាំងពីលោកប្លីងកិនបានពន្យារពេលធ្វើដំណើរទៅកាន់ប្រទេសចិនកាលពីសប្តាហ៍មុន ជុំវិញការសង្ស័យអំពីបាឡុងចារកម្មរបស់ចិន។
ក្រុមមន្ត្រីការបរទេសជាន់ខ្ពស់ផ្សេងទៀតជាច្រើនរូបក៏នឹងមានវត្តមាននៅក្នុងសន្និសីទទីក្រុងមុយនិចដែរ ហើយក្រៅពីការកើនឡើងការព្រួយបារម្ភអំពីសកម្មភាពចារកម្មរបស់ចិន ស្ថានភាពនៅអ៊ុយក្រែនមុនការរំពឹងទុកអំពីការវាយលុកនៅនិទាឃរដូវដោយរុស្ស៊ី ត្រូវគេរំពឹងថានឹងក្លាយជាកង្វល់ចម្បង។
សន្និសីទនេះនឹងប្រព្រឹត្តទៅនៅមួយថ្ងៃមុនគម្រប់ខួបមួយឆ្នាំនៃការលុកលុយរបស់រុស្ស៊ីលើអ៊ុយក្រែន ហើយការប្រជុំកាលពីឆ្នាំមុនត្រូវបានគ្របដណ្ដប់ដោយការព្រមានពីសហរដ្ឋអាម៉េរិកនិងសម្ពន្ធមិត្តរបស់អង្គការណាតូថា សង្គ្រាមមួយជិតមកដល់ហើយ៕
លោកប្លីងកិនចេញដំណើរទៅអាល្លឺម៉ង់ តួកគី និងក្រិកនៅថ្ងៃព្រហស្បតិ៍នេះ