ប្រែសម្រួលៈបំណង(ស្ត្រេតថែមស៍)៖ ចិនកាលពីថ្ងៃពុធបាននិយាយថា បាឡុងរយៈកំពស់ខ្ពស់របស់អាម៉េរិកបានហោះលើតំបន់ស៊ីនជាំងនិងទីបេតិ៍ ហើយខ្លួននឹងចាត់វិធានការប្រឆាំងនឹងអង្គភាពអាម៉េរិកណាដែលបានចូលរួមពាក់ព័ន្ធរំលោភអធិបតេយ្យភាពរបស់ចិន ។
មុននេះក្នុងសប្តាហ៍នេះ ចិនបាននិយាយថា បាឡុងអាម៉េរិកបានហោះលើទឹកដីចិនដោយគ្មានការអនុញ្ញាតដល់ទៅជាងដប់ដងចាប់តាំងពីខែឧសភាឆ្នាំ២០២២ និងសុំអោយភាគីអាម៉េរិកធ្វើការស៊ើបអង្កេតអំពីការអះអាងរបស់ខ្លួន តែមន្ត្រីសេតវិមានរបស់អាម៉េរិកបានចេញមកបដិសេធថាមិនមានរឿងដូច្នេះទេ។
អ្នកនាំពាក្យក្រសួងការបរទេសចិនលោក វ៉ាង វិនពីន(Wang Wenbin)បាននិយាយប្រាប់សន្និសីទកាសែតមួយកាលពីថ្ងៃពុធថា បាឡុងមកពីអាម៉េរិកធ្វើការហោះជុំវិញពិភពលោក។«ពួកវាបានហោះក្នុងដែនអាកាសចិនដោយគ្មានការអនុញ្ញាតយ៉ាងតិច១០លើក រួមមានការហោះលើតំបន់ស៊ីនជាំង ទីបេតិ៍និងលើខេត្តដទៃទៀតរបស់ចិន»។
អ្នកនាំពាក្យក្រសួងការបរទេសចិនលោក វ៉ាង វិនពីន
សេតវិមាន បានបដិសេធការចោទប្រកាន់របស់ចិន។
ជម្លោះអំពីបាឡុងហោះនេះបានកើតឡើងភ្លាមបន្ទាប់ពីយោធាអាម៉េរិកបាញ់ទម្លាក់បាឡុងចិនមួយកាលពីដើមខែ ដោយសង្ស័យថាជាយានឈ្លបយកការណ៍តែចិនបានប្រាប់ជាមុនថាវាជាបាឡុងសិក្សាស្រាវជ្រាវស៊ីវិល ផ្តោតលើអាកាសធាតុនិងត្រូវខ្យល់បក់ចូលអាម៉េរិកដោយចៃដន្យប៉ុណ្ណោះ។
រដ្ឋាភិបាលទីក្រុងវ៉ាស៊ីនតោនក្រោយមកបានបញ្ចូលអង្គភាព-ក្រុមហ៊ុនចិនចំនួនប្រាំមួយទៅក្នុងបញ្ជីខ្មៅពាណិជ្ជកម្មរបស់ខ្លួន ដោយសារតែអះអាងថាអង្គភាពទាំងនេះជាប់ពាក់ព័ន្ធនឹងកម្មវិធីបាឡុងចារកម្មចិន។
ក្រសួងការបរទេសចិនកាលពីថ្ងៃពុធបាននិយាយថា ខ្លួននឹងចាត់វិធានការតតបលើអង្គភាពក្រុមហ៊ុនអាម៉េរិកណាដែលជាប់ពាក់ព័ន្ធនឹងការរំលោភអធិបតេយ្យភាពរបស់ខ្លួន។លោក វ៉ាង វិនពីន បាននិយាយថា«អាម៉េរិកបានប្រើកម្លាំង ប្រតិកម្មជ្រុលនិងធ្វើអោយស្ថានការណ៍កាន់តែតានតឹងឡើង ព្រមទាំងប្រើការរំលោភនេះជាលេសដើម្បីដាក់ទណ្ឌកម្មលើក្រុមហ៊ុននិងស្ថាប័នចិនដោយខុសច្បាប់»។
«ចិនប្រឆាំងនឹងចំណាត់ការនេះជាដាច់ខាតហើយនឹងចាត់វិធានការតបវិញលើអង្គភាពអាម៉េរិកពាក់ព័ន្ធណាដែលបានរំលោភអធិបតេយ្យភាពនិងសន្តិសុខចិនស្របតាមច្បាប់អន្តរជាតិ»។
លោកវ៉ាងបាននិយាយថា ចិននឹងការពារអធិបតេយ្យជាតិ សិទ្ធិនិងផលប្រយោជន៍ស្របច្បាប់របស់ខ្លួនជាដាច់ខាត៕
ជម្លោះអំពីបាឡុងហោះនេះបានកើតឡើងភ្លាមបន្ទាប់ពីយោធាអាម៉េរិកបាញ់ទម្លាក់បាឡុងចិនមួយកាលពីដើមខែ