ប្រែសម្រួល : កញ្ញាដាលីស (ដេល្លីម៉េល) ៖ ប្រុសៗនៅក្រោមការគ្រប់គ្រងរបស់លោក វ្ល៉ាឌីមៀ ពូទីន បានទទួលរងនូវ “ការវាយសំពងនៅក្រោមខ្សែក្រវាត់” ខណៈការផ្គត់ផ្គង់ថ្នាំ Viagra ត្រូវបានផ្អាកដល់ប្រទេសរុស្ស៊ី។
ក្រសួងឧស្សាហកម្មនិងពាណិជ្ជកម្មរបស់រុស្ស៊ីបាននិយាយកាលពីថ្ងៃពុធទី១៥កុម្ភៈថា សាជីវកម្មឱសថនិងថែទាំសុខភាពពិភពលោករបស់អាម៉េរិក គឺក្រុមហ៊ុន Viatris ដែលជាម្ចាស់យីហោថ្នាំសម្រើបនេះ បានបញ្ឈប់ការផ្គត់ផ្គង់ដល់រុស្ស៊ី។
របាយការណ៍បាននិយាយថា រុស្ស៊ីត្រូវបានជូនដំណឹងអំពីការសម្រេចចិត្តរបស់ក្រុមហ៊ុនឱសថនេះក្នុងការផ្អាកការផ្គត់ផ្គង់កាលពីឆ្នាំមុន បន្ទាប់ពីការលុកលុយប្រទេសអ៊ុយក្រែន។
ក្រសួងឧស្សាហកម្មនិងពាណិជ្ជកម្មរុស្ស៊ីបាននិយាយថា “ក្រុមហ៊ុន Viatris LLC បានជូនដំណឹងមកយើងអំពីការផ្អាកការផ្គត់ផ្គង់ថ្នាំ Viagra ក្នុងទម្រង់ជាថ្នាំគ្រាប់”។
ក្រសួងរុស្ស៊ីភ្លាមៗបានប្តេជ្ញាធានានូវការផលិតថ្នាំក្នុងស្រុកសម្រាប់បុរសរបស់ប្រទេសនេះ ដែលមាន “សារធាតុសកម្ម” ដូចគ្នា ដោយសង្កត់ធ្ងន់ថា រឿងនេះកំពុងដំណើរការរួចហើយ។
ក្រសួងសុខាភិបាលរុស្ស៊ីក៏បានអះអាងដែរថា ឱសថស្ថាននានាមិនបានអស់ស្តុកថ្នាំគ្រាប់ប្រភេទនេះទេ។
មុនពេលការហាមឃាត់ថ្នាំ Viagra ក្រុមហ៊ុនរុស្ស៊ីដែលផលិតថ្នាំសំខាន់ៗសម្រាប់បុរសជាមួយថ្នាំ Sildenafil ដែលជាឈ្មោះមិនមានម៉ាកសម្រាប់ថ្នាំសម្រើប បានបង្កើនការផលិត ១១ ភាគរយនៅចន្លោះខែមករាដល់ខែកញ្ញាឆ្នាំ ២០២២ នេះបើយោងតាមទីភ្នាក់ងារសារព័ត៌មាន Interfax ។
ការលក់ថ្នាំសម្រួលលិង្គឱ្យងើបឡើងរឹងនេះក្នុងរយៈពេលដូចគ្នាបានកើនឡើង ១៥ ភាគរយ។
ទីភ្នាក់ងារសារព័ត៌មានរុស្ស៊ី Tass បានរាយការណ៍ថា ក្រុមហ៊ុនចំនួន ៣៦ នៅក្នុងប្រទេសរុស្ស៊ីបច្ចុប្បន្នមានវិញ្ញាបនបត្រចុះបញ្ជីចំនួន ៤៩ សម្រាប់ការផលិតថ្នាំ Sildenafil ក្នុងស្រុក៕
រុស្ស៊ីត្រូវបានជូនដំណឹងអំពីការសម្រេចចិត្តរបស់ក្រុមហ៊ុន Viatris ក្នុងការផ្អាកការផ្គត់ផ្គង់ថ្នាំ Viagra កាលពីឆ្នាំមុន