ប្រែសម្រួលៈបំណង(rfi)៖នូវែលសេឡង់បានបញ្ជូនយន្តហោះនិងឧទ្ធម្ភាគចក្រដើម្បីដឹកជញ្ជូនទឹកផឹក ស្បៀងនិងប្រេងឥន្ធនៈទៅកាន់បណ្តាទីក្រុងទីប្រជុំជនដែលត្រូវព្យុះហ្កាប្រៀល(Gabrielle)កាត់ផ្តាច់កាលពីថ្ងៃព្រហស្បតិ៍ទី១៦កុម្ភៈ នៅពេលប្រទេសជាច្រើនប្រកាសសុំជួយ។
មនុស្សប្រាំនាក់បានស្លាប់និងដល់ទៅ១០០នាក់កំពុងបាត់ខ្លួន ក្នុងគ្រោះមហន្តរាយមួយដែលកំពុងធ្វើអោយគាំងកោះណតអាយលែន(North Island)ដ៏ពេញនិយមរបស់ប្រទេសនេះ។ខ្យល់និងភ្លៀងកំណាចអស់ពេលបួនថ្ងៃមកនេះបានបង្កការបាក់ដីសង្កត់និងការជន់លិចជាទូទៅ ដែលបានធ្វើអោយខូចបណ្តាញផ្លូវថ្នល់របស់កោះ ដាច់ចរន្តអគ្គិសនីនិងរលំបង្គោលទូរស័ព្ទរាប់រយ។
នៅថ្ងៃព្រហស្បតិ៍ទី១៦កុម្ភៈ ទីក្រុងនេបភៀ(Napier)នៅឆ្នេរខាងកើតត្រូវបានកាត់ផ្តាច់ដោយសារការបាក់ស្ពានដែលភ្ជាប់មនុស្សប្រមាណ៦៥.០០០នាក់នៅទីក្រុងនេះជាមួយផ្នែកផ្សេងទៀតនៃប្រទេស។អ្នកក្រុងត្រូវបានប្រាប់កុំអោយចាកចេញពីផ្ទះបើមិនចាំបាច់ដោយសារតែទឹកជំនន់ និងកំហិតការប្រើទឹក។
នៅជុំវិញក្រុង បណ្តាស្ថានីយប្រេងដាក់ស្លាកប្រកាសថា«អស់ប្រេង»សំរាប់អ្នកត្រូវការណាដែលមិនសំរាប់បំរើសេវាគ្រាអាសន្ន។
នាយករដ្ឋមន្ត្រី គ្រីស ហ៊ីបគីនស៍(Chris Hipkins)នៅថ្ងៃព្រហស្បតិ៍បានព្រមានប្រជាជននូវែលសេឡង់អំពីការចំណាយពេលយូរដើម្បីអោយប្រទេសអាចរើបរើពីគ្រោះមហន្តរាយនេះឡើងវិញ ដោយចរន្តអគ្គិសនីមិនរំពឹងថានឹងស្តារឡើងឆាប់ៗទេនៅតំបន់ខ្លះ ហើយការបោសសម្អាតរៀបចំឡើងវិញក៏កាន់តែចំណាយពេលយូរទៀត។
ក្រោយមានការសុំផ្តល់ជំនួយពីសហរដ្ឋអាម៉េរិកនិងប្រទេសដទៃទៀត លោកហប់គីនស៍ បាននិយាយថា«យើងទទួលជំនួយអន្តរជាតិ»។
កងកម្លាំងយោធានូវែលសេឡង់ក្នុងពេលជាមួយគ្នាបញ្ជូននាវាទ័ពជើងទឹកពីរនិងយន្តហោះដឹកជញ្ជូនC-130មួយដើម្បីដឹកទឹករាប់ពាន់លីត្រជាមួយនឹងបុគ្គលិកនិងរោងចក្រប្រព្រឹត្តកម្មទឹកជាច្រើនទៅកាន់តំបន់រងគ្រោះខ្លាំងៗ។ឧទ្ធម្ភាគចក្រNH90ជាច្រើនគ្រឿងក៏នាំគ្រឿងផ្គត់ផ្គង់និងបានជួយសង្គ្រោះមនុស្សរាប់រយនាក់ចេញពីដំបូលផ្ទះផងដែរ៕
ខ្យល់និងភ្លៀងកំណាចបួនថ្ងៃមកនេះបង្កការបាក់ដីនិងការជន់លិចទូទៅនៅកោះណតអាលែនរបស់នូវែលសេឡង់។ព្យុះបានធ្វើដំណើរចូលសមុទ្រប៉ាស៊ីហ្វិកខាងត្បូង តែភ្លៀងជាច្រើនត្រូវរំពឹងថានឹងធ្លាក់នៅថ្ងៃព្រហស្បតិ៍ដែលបង្កការលំបាកដក់ការងារជួយសង្គ្រោះ 