ដោយៈយោធិន កោះកុងៈ គ្រាប់យុទ្ធភណ្ឌមិនទាន់ផ្ទុះ និងសំណល់ជាតិផ្ទុះពីសង្គ្រាមមួយចំនួន នៅក្នុងភូមិសាស្ត្រឃុំកោះស្តេច ស្រុកគិរីសាគរ ខេត្តកោះកុង ត្រូវបានប្រមូល និងកម្ទេចចោល ដោយបានរំដោះផ្ទៃដីទំហំ ៦៩៦.០៣៥ម៉ែត្រក្រឡា ស្មើរនឹង ៦១ភាគរយ។
ប្រតិបត្តិការនេះធ្វើឡើងដោយកម្លាំងជំនាញបោសសម្អាតគ្រាប់មីន និងបោសសម្អាតសំណល់ជាតិផ្ទុះពីសង្គ្រាម របស់មជ្ឈមណ្ឌលជាតិរក្សាសន្តិភាព ស្របតាមអនុសាសន៍របស់សម្តេចតេជោ ហ៊ុ ន សែន នាយករដ្ឋមន្ត្រីនៃកម្ពុជា សម្រាប់សកម្មភាពមីន ក្រោមប្រធានបទ «ផ្តល់ដីមានសុវត្ថិភាព បង្កើតស្នាមញញឹម» និងឆ្ពោះទៅរកកម្ពុជា គ្មានមីនឆ្នាំ២០២៥។
ជាក់ស្តែងនៅក្នុងភូមិសាស្ត្រឃុំកោះស្តេច ស្រុកគិរីសាគរ បានក្លាយជាសមិទ្ធផលថ្មីមួយទៀត ដោយមានការសហការយ៉ាងស្អិតរមួតជាមួយអាជ្ញាធរមីននិងអាជ្ញាធរដែនដីគ្រប់លំដាប់ថ្នាក់ ដោយបានប្រតិបត្តិការអនុវត្តជំហានទី២ នៃផែនការរំកិល ដោយសម្រេចបានលទ្ធផលជាច្រើនលើប្រតិបត្តិការបោសម្អាតមីន។
ថ្លែងក្នុងពិធីកម្ទេចកាកសំណល់សង្គ្រាម នៅព្រឹកថ្ងៃទី១៦ ខែកុម្ភៈ ឆ្នាំ២០២៣ នាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីនកម្ពុជាបានដឹកនាំក្រុមការងារចុះសួរសុខទុក្ខកងកម្លាំងបោសសម្អាតមីន និងប្រជាពលរដ្ឋក្នុងភូមិសាស្ត្រឃុំកោះស្តេច ព្រមទាំងកម្ទេចគ្រាប់មីនប្រឆាំងថ្មើរជើងចំនួន៧គ្រាប់ គ្រាប់យុទ្ធភណ្ឌមិនទាន់ផ្ទុះ៤៨គ្រាប់ និងអំបែង១៩២ដុំផងដែរ។
នាឱកាសនោះដែរ នាយឧត្តមសេនីយ៍ សែម សុវណ្ណនី បានក្រើនរំឮកដល់កងកម្លាំងបោសម្អាតគ្រាប់មីនក្នុងភូមិសាស្ត្រឃុំកោះស្តេច ត្រូវបង្កើនការយកចិត្តទុកដាក់ឱ្យបានខ្ពស់ និងអនុវត្តឱ្យបានល្អចំពោះភារកិច្ចទៅតាមស្តង់ដារបច្ចេកទេស និងមិនត្រូវមើលស្រាលជាដាច់ខាតចំពោះគ្រាប់យុទ្ធភណ្ឌមិនទាន់ផ្ទុះជាដាច់ខាត។ «ព្រោះគ្រាប់មីនអាចធ្វើឱ្យយើង ១វិនាទីរស់ ១វិនាទីស្លាប់ និង ១វិនាទីអាចសុវត្ថិភាព»។
នាយឧត្តមសេនីយ៍ សែម សុវណ្ណនី ក៏បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនកម្ពុជា ជូនដល់កងកម្លាំងដែលកំពុងបំពេញប្រតិបត្តិការនៅការដ្ឋានកោះស្តេច និងប្រជាពលរដ្ឋរស់នៅក្នុងមូលដ្ឋាននេះផងដែរ។
ឧត្តមសេនីយ៍ទោ សែម រតនា អគ្គនាយករង មជ្ឈមណ្ឌលជាតិរក្សាសន្តិភាព បានបញ្ជាក់ នៅការដ្ឋានបោសម្អាតគ្រាប់មីន ក្នុងភូមិសាស្ត្រកោះស្តេច នៅព្រឹកថ្ងៃទី១៦ ខែកុម្ភៈនេះថាៈ «សម្រាប់ប្រតិបត្តិការនេះ បានចាប់ផ្តើមដំណើរការពីថ្ងៃទី១៥ ខែមករា ឆ្នាំ២០២៣ ដោយបានរំដោះផ្ទៃដី ពីគ្រាប់យុទ្ធភណ្ឌមិនទាន់ផ្ទុះចំនួនទំហំ ៦៩៦.០៣៥ម៉ែត្រក្រឡា ស្មើនឹង ៦១ភាគរយ»។
ឧត្តមសេនីយ៍ទោ សែម រតនា បានបញ្ជាក់នន្តថាៈ សម្រាប់ប្រតិបត្តិការនេះ កម្លាំងជំនាញបានរកឃើញគ្រាប់មីនប្រឆាំងថ្មើរជើងចំនួន៧គ្រាប់ គ្រាប់យុទ្ធភណ្ឌមិនទាន់ផ្ទុះ៤៨គ្រាប់ និងអំបែង១៩២ដុំផងដែរ។
ដោយឡែកសម្រាប់ផ្ទៃដីនៅសេសល់ចំនួន ៤៤៣.៦០១ម៉ែត្រក្រឡា គ្រោងនឹងបញ្ចប់ជាស្ថាពរនៅក្នុងខែមេសា ឆ្នាំ២០២៣ តាមផែនការកំណត់។
នាឱកាសនោះដែរ នាយឧត្តមសេនីយ៍ សែម សុវណ្ណនី ក៏បាននាំអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប្រគល់ជូនប្រជាពលរដ្ឋនៅឃុំកោះស្តេច ប្រមាណជិត៣០០គ្រួសារផងដែរ។ សរន / N
រូប ( នាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីនកម្ពុជា )