ប្រែសម្រួល : កញ្ញាដាលីស (ស្ត្រេតថែមស៍) ៖ ដោយបញ្ជូនរ៉ូបូតមុជទឹកទៅក្រោមធ្នើរទឹកកកដែលរលាយយ៉ាងលឿនមួយនៅទ្វីបអង់តាក់ទិក អ្នកវិទ្យាសាស្ត្របានរកឃើញតម្រុយថ្មីអំពីរបៀបដែលវារលាយ។ ការរកឃើញនេះនឹងជួយវាយតម្លៃអំពីការគំរាមកំហែងដែលធ្នើរនេះនិងធ្នើទឹកកកផ្សេងទៀតបានបង្កឱ្យមានការកើនឡើងកម្រិតទឹកសមុទ្ររយៈពេលវែង។
ក្រុមអ្នកស្រាវជ្រាវបាននិយាយថា ការរលាយនៃផ្នែកខាងក្រោមនៃធ្នើរទឹកកកឈ្មោះថ្វេស (Thwaites)នៅភាគខាងលិចទ្វីបអង់តាក់ទិកគឺមានតិចជាងការរំពឹងទុកពីការប៉ាន់ស្មានដែលបានមកពីគំរូលើកុំព្យូទ័រ។ ប៉ុន្តែពួកគេក៏បានរកឃើញដែរថា ការរលាយឆាប់រហ័សកំពុងកើតឡើងនៅកន្លែងដែលមិននឹកស្មានដល់ផងដែរ គឺផ្ទៃរាបខាងលើនិងក្រហែងជាច្រើនដែលលាតសន្ធឹងទៅក្នុងធ្នើរទឹកកកនេះ។
ការរកឃើញនេះមិនបានផ្លាស់ប្តូរការពិតដែលថា ធ្នើរទឹកកកថ្វេសបានស្ថិតក្នុងចំណោមធ្នើរទឹកកកដែលរលាយលឿនបំផុតនិងមានស្ថិរភាពតិចបំផុតនៅទ្វីបអង់តាក់ទិកហើយវាជាក្តីបារម្ភបំផុតនៅពេលនិយាយអំពីការកើនឡើងកម្រិតទឹកសមុទ្រ។ វាក៏មិនបានផ្លាស់ប្តូរនោះដែរចំពោះការព្យាករណ៍ថា ការដួលរលំនៃធ្នើទឹកកកនិងផ្ទាំងទឹកកកនឹងនាំឱ្យមានការកើនឡើងកម្ពស់ទឹកសមុទ្រប្រហែល ៦០ សង់ទីម៉ែត្រក្នុងរយៈពេលប៉ុន្មានសតវត្សរ៍ខាងមុខ។
អ្នកវិទ្យាសាស្ត្រម្នាក់ក្នុងចំណោមអ្នកវិទ្យាសាស្ត្រជាច្រើនរូបទៀតគឺលោក ភីតធឺ អ៊ីឌី (Peter E.D) ជាអ្នកស្រាវជ្រាវមហាសមុទ្រនៅអង្គភាពស្ទាបស្ទង់ទ្វីបអង់តាក់ទិករបស់អង់គ្លេស បាននិយាយថា ការស្រាវជ្រាវនេះ “កំពុងប្រាប់យើងកាន់តែច្រើនអំពីដំណើរការដែលជំរុញឱ្យមានការរលាយនៅលើធ្នើរទឹកកកថ្វេស”។ ការរកឃើញ ដែលបានចេញផ្សាយកាលពីថ្ងៃពុធទី១៥កុម្ភៈនៅក្នុងទស្សនាវដ្តី Nature នឹងត្រូវបានប្រើដើម្បីកែលម្អគំរូដែលព្យាករណ៍ពីអនាគតរយៈពេលវែងរបស់ធ្នើរទឹកកកថ្វេស។
ការស្រាវជ្រាវនេះគឺជាផ្នែកមួយនៃកិច្ចខិតខំប្រឹងប្រែងដ៏ធំមួយ ពោលជាកិច្ចសហប្រតិបត្តិការអន្តរជាតិធ្នើរទឹកកកថ្វេសឧបត្ថម្ភដោយសហរដ្ឋអាម៉េរិកនិងចក្រភពអង់គ្លេស ដើម្បីស្វែងយល់កាន់តែច្បាស់អំពីអ្វីដែលកំពុងកើតឡើងនៅឯធ្នើរទឹកកកថ្វេស។
ធ្នើរទឹកកកនេះគឺជាអណ្តាតដែលអណ្តែតរបស់ផ្ទាំងទឹកកកថ្វេស ដែលជាទន្លេទឹកកកមានទំហំប៉ុនរដ្ឋផ្លរីដា ដែលជួយទប់ផ្ទាំងទឹកកកមួយក្នុងចំណោមផ្ទាំងទឹកកកដ៏ធំចំនួនពីររបស់ទ្វីបអង់តាក់ទិក។ ទឹកនៅជុំវិញទ្វីបអង់តាក់ទិកកំពុងក្តៅទៅៗ ដោយសារតែការប្រែប្រួលអាកាសធាតុ ហើយនៅពេលដែលទឹកក្តៅនេះហូរទៅក្រោមធ្នើរទឹកកក ទឹកកកនឹងរលាយពីក្រោម ហើយធ្នើរនេះនឹងកាន់តែស្តើង។ អ្វីដែលគេហៅថា ខ្សែដីដែលជាតំបន់ដែលទឹកកកអណ្តែតមកប៉ះនឹងផ្ទាំងថ្មនោះ បានកំពុងឃ្លាតចេញពីគ្នា នៅពេលដែលធ្នើរទឹកកកបាត់បង់ទឹកកក ដោយរំកិលចេញពីដីប្រហែល ១៣ គីឡូម៉ែត្រក្នុងរយៈពេលពីរទសវត្សរ៍កន្លងមកនេះ៕
រ៉ូបូតមុជទឹកកំពុងធ្វើការនៅក្រោមធ្នើរទឹកកកថ្វេស