ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Ford Motor Co.បានផ្អាកការផលិតនិងបញ្ឈប់ការនាំចេញរថយន្តភីកអាប់អគ្គិសនី F-150 Lightning បន្ទាប់ពីអាគុយបានឆាបឆេះក្នុងអំឡុងពេលត្រួតពិនិត្យគុណភាពមុនពេលចែកចាយ។
ការផលិតនៅមជ្ឈមណ្ឌលយានយន្តអគ្គិសនីរូ (Rouge)របស់ក្រុមហ៊ុន Ford ក្នុងទីក្រុងឌាប៊ន (Dearborn) រដ្ឋមីស៊ីហ្គែន ត្រូវបានបញ្ឈប់រហូតដល់យ៉ាងហោចចុងសប្តាហ៍ក្រោយ។
ក្រុមហ៊ុនផលិតរថយន្តនេះបាននិយាយនៅក្នុងសេចក្តីថ្លែងការណ៍មួយកាលពីយប់ថ្ងៃពុធទី១៥កុម្ភៈថា ខ្លួនមិនមានហេតុផលជឿថារថយន្តភីកអាប់ដែលប្រើប្រាស់រួចដោយអតិថិជនត្រូវបានប៉ះពាល់ដោយបញ្ហាអាគុយនោះទេ។
អ្នកនាំពាក្យរបស់ក្រុមហ៊ុន Ford លោកស្រី អេមម៉ា បឺក (Emma Berg) បាននិយាយនៅក្នុងសេចក្តីថ្លែងការណ៍ថា “នៅត្រឹមចុងសប្តាហ៍ក្រោយ យើងរំពឹងបញ្ចប់ការស៊ើបអង្កេតរបស់យើង និងអនុវត្តនូវអ្វីដែលយើងបានរៀនសូត្រចំពោះដំណើរការផលិតអរគុយរបស់រថយន្ត។ នេះអាចចំណាយពេលពីរបីសប្តាហ៍”។
អគ្គិភ័យបានកើតឡើងនៅឃ្លាំងលើទីវាលមួយនៅក្បែរទីក្រុងឌាប៊ន ជាកន្លែងដែលរថយន្តត្រូវបានរក្សាទុកសម្រាប់ការត្រួតពិនិត្យគុណភាព។ លោកបឺកបាននិយាយថា រថយន្តដែលមានបញ្ហាអាគុយនិងរថយន្តពីរគ្រឿងទៀតនៅក្បែរនោះបានរងការខូចខាតដោយសារភ្លើង។ គ្មានការរងរបួសត្រូវបានរាយការណ៍ទេ។
ក្រុមហ៊ុនជឿថា ខ្លួនបានកំណត់ឃើញមូលហេតុដើមនៃបញ្ហាអាគុយហើយ រួមទាំងចំនួនរថយន្តភីកអាប់ដែលទំនងរងផលប៉ះពាល់ដោយបញ្ហាមួយនោះ។ លោកបឺកបាននិយាយថា “យើងត្រួតពិនិត្យទិន្នន័យយានយន្តដើម្បីជួយធានាឱ្យរថយន្តរបស់យើងដំណើរការដូចការរំពឹងទុកនៅក្នុងវិស័យរថយន្តអគ្គិសនី”។
ក្រុមហ៊ុននឹងបន្តរក្សាទុករថយន្តភីកអាប់ទាំងនោះរហូតដល់មានការផ្លាស់ប្តូរវិស្វកម្មនិងការផលិត។
អាគុយសម្រាប់ឡានភីកអាប់នេះត្រូវបានផ្គត់ផ្គង់ដោយក្រុមហ៊ុន SK Innovation របស់កូរ៉េខាងត្បូង ដែលមានរោងចក្រនៅរដ្ឋចចចៀ៕
រថយន្ត Ford F-150 Lightning បង្ហាញក្នុងកម្មវិធីពិព័រណ៍រថយន្តហ្វីឡាដែលហ្វៀ នៅថ្ងៃទី ២៧ ខែ មករា ឆ្នាំ ២០២៣