ប្រែសម្រួល : កញ្ញាដាលីស (ដេល្លីម៉េល) ៖ ឌួងផេត ព្រំថេប (Duangpetch Promthep) ជាក្មេងប្រុសម្នាក់ក្នុងចំណោមក្មេងប្រុសទាំង ១២ នាក់ ដែលត្រូវបានជួយសង្គ្រោះពីរូងភ្នំថៃក្នុងឆ្នាំ ២០១៨ បានស្លាប់នៅចក្រភពអង់គ្លេស។
BBC បាននិយាយថា ក្មេងប្រុសអាយុ ១៧ ឆ្នាំរូបនេះត្រូវបានប្រទះឃើញសន្លប់នៅក្នុងបន្ទប់ស្នាក់នៅរបស់គេក្នុងទីក្រុងឡេសេស្ទើសាយអឺ (Leicestershire) កាលពីថ្ងៃអាទិត្យទី១២កុម្ភៈ ហើយត្រូវបានបញ្ជូនទៅមន្ទីរពេទ្យ ជាកន្លែងដែលរូបគេបានស្លាប់កាលពីថ្ងៃអង្គារទី១៤កុម្ភៈ។
រូបគេបានចុះឈ្មោះចូលរៀននៅសាលាបាល់ទាត់ក្នុងចក្រភពអង់គ្លេសតាំងពីចុងឆ្នាំមុន។
ក្មេងនេះគឺជាប្រធានក្រុមបាល់ទាត់ក្មេងប្រុសថៃ ដែលបានជាប់ជ្រៅនៅក្នុងល្អាងរូងភ្នំអស់រយៈពេលជាងពីរសប្តាហ៍ នៅក្នុងខេត្តឈៀងរ៉ៃ។
ទឹកមុខញញឹមរបស់ក្មេងនេះ ដែលចាប់បានដោយភ្លើងពិលរបស់អ្នកមុជទឹកម្នាក់បន្ទាប់ពីក្មេងប្រុសទាំងអស់ត្រូវបានរកឃើញនៅក្នុងរូងភ្នំ គឺជារូបភាពមួយក្នុងចំណោមរូបភាពដែលគួរឱ្យចងចាំបំផុតពីការជួយសង្គ្រោះនោះ។
គេមិនដឹងថាក្មេងជំទង់នេះស្លាប់ដោយរបៀបណានោះទេ ប៉ុន្តែប៉ូលិសក្រុងឡេសេស្ទើសាយអឺ បាននិយាយថា ការស្លាប់របស់គេមិនត្រូវបានចាត់ទុកថាគួរឱ្យសង្ស័យនោះទេ។ របាយការណ៍នៅក្នុងប្រទេសថៃបាននិយាយថារូបគេបានរងរបួសក្បាល។
ព្រំថេបត្រូវបានដឹកតាមរថយន្តសង្គ្រោះទៅកាន់មន្ទីរពេទ្យទូទៅខេតធឺរីង (Kettering General Hospital) កាលពីរសៀលថ្ងៃអាទិត្យ នេះបើតាមអ្នកនាំពាក្យរបស់សេវាឡានពេទ្យអ៊ីសមីតលែន (East Midlands Ambulance Service)។ រថយន្តសង្គ្រោះបន្ទាន់មួយគ្រឿងក៏ត្រូវបានបញ្ជូនទៅកាន់កន្លែងកើតហេតុផងដែរ ។
កាលពីខែសីហាឆ្នាំមុន មិត្តរួមក្រុមរបស់គេបានជួយត្រេកអរ នៅពេលដែលព្រំថេបបានប្រកាសនៅលើ Instagram ថា រូបគេបានទទួលអាហារូបករណ៍ដើម្បីចូលរួមជាមួយសាលាបាល់ទាត់វិទ្យាល័យប្រូកហោស (Brooke House) នៅទីប្រជុំជនម៉ាឃីតហាបូរ៉ូ (Market Harborough)។
ព្រំថេបបានសរសេរថា “ថ្ងៃនេះ សុបិនរបស់ខ្ញុំបានក្លាយជាការពិត”។
ទើបតែប្រាំមួយខែប៉ុណ្ណោះ ពួកគេឥឡូវកំពុងកាន់ទុក្ខចំពោះការបាត់បង់មិត្តភក្តិរបស់ពួកគេ៕
ព្រំថេបស្លាប់កាលពីថ្ងៃអង្គារនៅអង់គ្លេស
