ប្រែសម្រួល : កញ្ញាដាលីស (ដេល្លីម៉េល) ៖ ប្រធានក្រុមហ៊ុនទាហានស៊ីឈ្នួលរបស់រុស្ស៊ី Wagnerបានរិះគន់ “ការិយាធិបតេយ្យដ៏មហិមា” របស់រដ្ឋាភិបាលក្រុងមូស្គូចំពោះប្រៀបឈ្នះខាងយោធាដ៏យឺតយ៉ាវ ដោយនិយាយថា វាអាចចំណាយពេលច្រើនខែដើម្បីដណ្តើមយកទីក្រុងបាឃ្មុត (Bakhmut) នៅអ៊ុយក្រែន។
រុស្ស៊ីបានព្យាយាមឡោមព័ទ្ធនិងដណ្តើមយកទីក្រុងនេះមុនថ្ងៃទី ២៤ ខែកុម្ភៈ ដែលជាខួបលើកទីមួយនៃការលុកលុយរបស់ខ្លួន ប៉ុន្តែសាកសពរបស់កងកម្លាំងរបស់លោក វ្ល៉ាឌីមៀ ពូទីន ត្រូវគេនិយាយថាកំពុងគរលើគ្នានៅក្នុងលេណដ្ឋាន ខណៈកងទ័ពរបស់គាត់នៅតែបន្តតស៊ូ។
លោក យេវហ្គេនី ព្រីហ្គោហ្ស៊ីន (Yevgeny Prigozhin) ជាប្រធានក្រុមហ៊ុនទាហានស៊ីឈ្នួល Wagnerដ៏ល្បីអសោច បាននិយាយវាយប្រហារយោធារុស្ស៊ី ចំពោះការប្រឹងប្រែងយឺតយ៉ាវដើម្បីដណ្តើមយកទីក្រុងបាឃ្មុតមកវិញ ដោយលើកហេតុផលថាទីក្រុងនេះគួរតែដណ្តើមបានពីអ៊ុយក្រែនរួចហើយ។
លោកបាននិយាយក្នុងសារជាបន្តបន្ទាប់តាមអនឡាញថា “ខ្ញុំគិតថាវានឹងកើតឡើងក្នុងខែមីនាឬខែមេសា។ ដើម្បីយកទីក្រុងបាឃ្មុត អ្នកត្រូវតែកាត់ផ្តាច់ផ្លូវផ្គត់ផ្គង់ទាំងអស់។ វាជាកិច្ចការសំខាន់។ វឌ្ឍនភាពមិនលឿនដូចដែលយើងចង់បាននោះទេ”។
“ទីក្រុងបាឃ្មុតគួរតែអាចដណ្តើមបាននៅមុនថ្ងៃឆ្លងឆ្នាំ បើកុំតែមានការិយាធិបតេយ្យយោធាដ៏មហិមារបស់យើងទេនោះ”។
លោកបានបន្ថែមថា “ព្រោះមានបញ្ហាជាច្រើនត្រូវដោះស្រាយ។ តាមមើល វាក៏នឹងអាស្រ័យលើថាតើយើងបន្តយឺតយ៉ាវបែបនេះទៀតឬអត់នោះដែរ”។
លោកព្រីហ្គោហ្ស៊ីនធ្លាប់បានចោទប្រកាន់យោធារុស្ស៊ីថាបានប៉ុនប៉ងលួចយកជ័យជម្នះពីក្រុមហ៊ុន Wagner ដែលជាសញ្ញានៃឥទ្ធិពលកំពុងកើនឡើងរបស់គាត់ និងសក្តានុពលនៃការប្រេះឆាដ៏គ្រោះថ្នាក់នៅទីក្រុងមូស្គូ។
ការអះអាងរបស់ក្រុមហ៊ុន Wagner ថាបានដណ្តើមបានទឹកដី ដោយគ្មានជំនួយពីកងទ័ពធម្មតា ដែលលោកព្រីហ្គោហ្ស៊ីនតែងរិះគន់ជាប្រចាំនោះ បានបង្កឱ្យមានការប៉ះទង្គិចជាមួយថ្នាក់ដឹកនាំយោធាជាន់ខ្ពស់។
នៅទីក្រុងបាឃ្មុត មេបញ្ជាការរងម្នាក់ ដែលមានអង្គភាពកាំភ្លើងត្បាល់មកពីឆ្មាំព្រំដែនរដ្ឋអ៊ុយក្រែន បាននិយាយថា ការប្រយុទ្ធនៅតែមានសភាពខ្លាំងក្លា។
លោកបានកត់សម្គាល់ថា “យើងត្រូវទទួលស្គាល់ជោគជ័យរបស់សត្រូវ។ មានកងទ័ពរុស្ស៊ីធម្មតានៅទីនេះ ហើយពួកគេក៏មានក្រុមកាំភ្លើងធំធម្មតាដែរ ហើយពួកគេបាញ់បានច្បាស់ៗណាស់”។
ភាគច្រើននៃប្រជាជនមុនសង្គ្រាម ៧០.០០០ នាក់របស់ទីក្រុងនេះបានចាកចេញ ដោយទុកឱ្យទាហានអ៊ុយក្រែនជីកលេណដ្ឋានរឹងមាំ។
លោក ថារ៉ាស ឌីហ្ស៊ីអូបា (Taras Dzioba) មន្ត្រីនាំពាក្យនៃកងពលតូចទ័ពអាកាសលេខ ៨០ របស់អ៊ុយក្រែន បាននិយាយថា “ពួកគេ [រុស្ស៊ី] កំពុងបញ្ជូនកងទ័ពយ៉ាងច្រើន។ ខ្ញុំគិតថា វាមិនមាននិរន្តរភាពសម្រាប់ពួកគេក្នុងការបន្តវាយប្រហារបែបនេះទេ”។
“មានកន្លែងជាច្រើន ដែលសាកសពរបស់ពួកគេ គរជើងលើគ្នា។ មានលេណដ្ឋានមួយ ដែល…ពួកគេមិនបានជម្លៀសអ្នករបួសឬអ្នកស្លាប់បានទេ”៕
លោកព្រីហ្គោហ្ស៊ីនរិះគន់ការិយាធិបតេយ្យដ៏មហិមាចំពោះការយឺតយ៉ាវក្នុងការដណ្តើមជ័យជម្នះលើទីក្រុងបាឃ្មុត