ប្រែសម្រួលៈបំណង(ស្ត្រេតថែមស៍)៖ ក្រុមមេដឹកនាំជាន់ខ្ពស់ចិនកាលពីថ្ងៃព្រហស្បតិ៍ម្សិលមិញបានអបអរ«អព្ភូតហេតុ»នៃការបញ្ចប់គោលការណ៍សូន្យកូវីដរបស់ប្រទេសដើម្បីងាកចេញពីវិធានការគ្រប់គ្រងកូវីដ១៩ដ៏តឹងតែងថាជា«ជោគជ័យធំ»មួយនិងជា«ភាពត្រឹមត្រូវទាំងស្រុង» នេះបើយោងតាមការផ្សាយរបស់សារព័ត៌មានរដ្ឋ។
សូមបញ្ជាក់ថា ការឆ្លងពាសវាលពាសកាលដល់ទៅរាប់លាននាក់នៅក្នុងប្រទេសមានប្រជាជនច្រើនបំផុតក្នុងលោកនេះបានកើតឡើងភ្លាមក្រោយពីអាជ្ញាធរលុបចោលគោលការណ៍សូន្យកូវីដកាលពីចុងឆ្នាំ២០២២។វានាំអោយបណ្តាមន្ទីរពេទ្យជោរជន់ដោយអ្នកជំងឺក្តៅខ្លួននិងកន្លែងតម្កល់និងបូជ្ញាសពពោរពេញដោយសាកសពអ្នកជំងឺ។
ទំហំនៃការផ្ទុះជំងឺពេលនោះពិបាកវាយតំលៃ តែទីភ្នាក់ងារសារព័ត៌មានស៊ីនហួររបស់ចិនបាននិយាយកាលពីថ្ងៃព្រហស្បតិ៍ថា មនុស្សជាង២០០លាននាក់បានទទួលការព្យាបាលជំងឺកូវីដ រួមមានអ្នកជំងឺធ្ងន់ប្រមាណ៨០០.០០០នាក់ តែស្ថានភាពឥឡូវបានគ្រាន់បើជាទូទៅ។
នៅប៉ុន្មានសប្តាហ៍មកនេះមានសញ្ញាថា រលកនៃការឆ្លងកូវីដ១៩នៅចិននៅទីបំផុតបានថយចុះខ្លាំង ដោយការិយាល័យកគ្រប់គ្រងជំងឺរបស់ចិនកាលពីថ្ងៃពុធបាននិយាយថា ចំនួនអ្នកជំងឺកូវីដ១៩នៅតាមមន្ទីរពេទ្យបានធ្លាក់ចុះ៩៨ភាគរយគិតចាប់តាំងពីដើមខែមករា។
កិច្ចប្រជុំមួយរបស់គណៈកម្មាធិការអចិន្ត្រៃយ៍នៃការិយាល័យនយោបាយកាលពីថ្ងៃ១៦កុម្ភៈ បានបញ្ជាក់អះអាងថាចិន«បង្កើតអព្ភូតហេតុមួយក្នុងប្រវត្តិសាស្ត្រអរិយធម៌មនុស្ស ដែលប្រទេសមួយមានប្រជាជនច្រើនបានងើបចេញផុតពីការឆ្លងរាលដាលនៃជំងឺឆ្លងដោយជោគជ័យ»។
កិច្ចប្រជុំដែលមានការចូលរួមពីប្រធានាធិបតីស៊ី ជីនភីង បាននិយាយថា«ក្នុងរយៈពេលដ៏ខ្លី យើងសំរេចបានអន្តរកាលដ៏រលូនមួយនៅក្នុងការទប់ស្កាត់និងគ្រប់គ្រងជំងឺឆ្លង។គោលនយោបាយរបស់បក្សក្នុងការដូរវិធីសាស្ត្រគ្រប់គ្រងជំងឺមាន”ភាពត្រឹមត្រូវទាំងស្រុង” ។វិធានការនេះរឹងមាំ ដោយមានការគាំទ្រពីមហាជននិងលទ្ធផលធំធេង»៕
ចំនួនអ្នកជំងឺកូវីដ១៩នៅតាមមន្ទីរពេទ្យបានធ្លាក់ចុះស្ទើរ១០០ភាគរយក្រោយចិនដូរវិធីសាស្ត្រគ្រប់គ្រងជំងឺ