ប្រែសម្រួល : កញ្ញាដាលីស (ស្ត្រេតថែមស៍) ៖ ក្រុមអ្នកវិទ្យាសាស្ត្របានរាយការណ៍កាលពីថ្ងៃព្រហស្បតិ៍ទ១៦កុម្ភៈថា តំបន់មហាសមុទ្រនៅទ្វីបអង់តាក់ទិក ដែលគ្របដណ្តប់ដោយទឹកកក បានថយចុះដល់កម្រិតទាបបំផុត ដោយធ្វើឱ្យបន្ទះទឹកកកក្រាស់ឃ្មឹក ដែលសង្កត់ពីលើផ្ទាំងទឹកកកនៅជាប់នឹងដីរបស់ទ្វីបអង់តាក់ទិក ងាយប្រឈមនឹងរលកនិងសីតុណ្ហភាពក្តៅ។
មជ្ឈមណ្ឌលទិន្នន័យព្រិលនិងទឹកកកជាតិនៅសហរដ្ឋអាម៉េរិក(NSIDC) បាននិយាយថា ទឹកកកសមុទ្ររបស់ទ្វីបអង់តាក់ទិកបានថយចុះដល់ទៅ ១,៩១ លានគីឡូម៉ែត្រការ៉េក្នុងសប្តាហ៍នេះ ដែលជាកម្រិតទាបបំផុតចាប់តាំងពីកំណត់ត្រាបានចាប់ផ្តើមនៅឆ្នាំ ១៩៧៩។
កម្រិតទាបមិនធ្លាប់មានកាលពីមុនត្រូវបានកំណត់កាលពីឆ្នាំមុន។
NSIDC បាននិយាយនៅក្នុងសេចក្តីថ្លែងការណ៍មួយថា “ដោយនៅសល់ពីរបីសប្តាហ៍ទៀតនៅក្នុងរដូវទឹកកករលាយ ទំហំនៃការរលាយទឹកកកត្រូវគេរំពឹងថានឹងបន្តកើតឡើងបន្ថែមទៀតមុនពេលឈានដល់កម្រិតអប្បបរមាប្រចាំឆ្នាំរបស់វា”។
ទឹកកកសមុទ្ររលាយមិនមានផលប៉ះពាល់ជាក់ស្តែងលើកម្រិតទឹកសមុទ្រទេ ព្រោះទឹកកកបានស្ថិតនៅក្នុងទឹកសមុទ្ររួចទៅហើយ។
ប៉ុន្តែទឹកកកសមុទ្របានគ្របដណ្ដប់ព័ទ្ធជុំវិញបន្ទះទឹកកកធំៗរបស់ទ្វីបអង់តាក់ទិក ដែលនេះជាផ្នែកលយនៃផ្ទាំងទឹកកកទឹកសាប ដែលគំរាមកំហែងដល់ការកើនឡើងកម្រិតទឹកសមុទ្រដ៏មហន្តរាយនៅប៉ុន្មានសតវត្សរ៍ទៀត ប្រសិនបើពួកវាបន្តរលាយខណៈសីតុណ្ហភាពពិភពលោកបន្តកើនឡើង។
NSIDC បាននិយាយថា “ភាគច្រើននៃឆ្នេរសមុទ្រទ្វីបអង់តាក់ទិក” ឥឡូវមានតែទឹកអត់មានទឹកកក “ជាហេតុធ្វើឱ្យបន្ទះទឹកកកដែលនៅជាប់នឹងផ្ទាំងទឹកកកងាយប្រឈមមុខនឹងសកម្មភាពរលកនិងអាកាសធាតុកាន់តែក្តៅទៅ”៕
ទឹកកកសមុទ្ររបស់ទ្វីបអង់តាក់ទិកបានថយចុះដល់ទៅ ១,៩១ លានគីឡូម៉ែត្រការ៉េក្នុងសប្តាហ៍នេះ