ប្រែសម្រួលៈបំណង(ដេល្លីម៉េល)៖ កូរ៉េខាងត្បូងនិងសហរដ្ឋអាម៉េរិកនឹងធ្វើសមយុទ្ធលើតុនៅក្រុងវ៉ាស៊ីនតោននៅសប្តាហ៍ក្រោយដើម្បីបង្កើនសមត្ថភាពប្រើប្រាស់ទ្រព្យនុយក្លេអ៊ែរអាម៉េរិក ជាផ្នែកនៃកិច្ចខិតខំត្រៀមទប់ទល់នឹងការគំរាមរបស់កូរ៉េខាងជើង នេះបើតាមការប្រកាសរបស់ក្រសួងការពារជាតិកូរ៉េខាងត្បូងកាលពីថ្ងៃសុក្រ។
តែភ្លាមៗក្រោយការប្រកាសរបស់កូរ៉េខាងត្បូង កូរ៉េខាងជើងបានគំរាម«ចាត់វិធានការឆ្លើយតបដ៏ខ្លាំងមិនធ្លាប់មាន» បើសិនជាកូរ៉េខាងត្បូងនិងអាម៉េរិកនៅតែបន្តផែនការធ្វើលំហាត់យោធាប្រភេទនេះ និងចោទប្រកាន់សម្ពន្ធមិត្តទាំងពីរថា បង្កើនភាពតានតឹងនៅក្នុងតំបន់។
ក្នុងសេចក្តីថ្លែងការណ៍ចេញផ្សាយដោយទីភ្នាក់ងារសារព័ត៌មានកណ្តាលកូរ៉េ ក្រសួងការបរទេសកូរ៉េខាងជើងក៏បាននិយាយថា ខ្លួននឹងពិចារណាចាត់វិធានការយោធាបន្ថែម បើសិនជាក្រុមប្រឹក្សាសន្តិសុខអង្គការសហប្រជាជាតិក្រោមឥទ្ធិពលអាម៉េរិក បន្តគាបសង្កត់រដ្ឋាភិបាលទីក្រុងព្យុងយ៉ាង។
សូមបញ្ជាក់ថា កូរ៉េខាជើងប្រដាប់ដោយសព្វាវុធនុយក្លេអ៊ែរ បានធ្វើការបាញ់សាកល្បងកាំជ្រួចក្នុងចំនួនដ៏ច្រើនមិនដែលធ្លាប់មានកាលពីឆ្នាំ២០២២កន្លងទៅ រួមមានកាំជ្រួចផ្លោងឆ្លងទ្វីប(ICBMs)ដែលអាចវាយប្រហារដល់អាម៉េរិក ។
ការហ្វឹកហាត់ដែលមានឈ្មោះថា សមយុទ្ធលើតុនៃគណៈកម្មាធិការយុទ្ធសាស្ត្ររារាំង ត្រូវធ្វើនៅថ្ងៃ២២កុម្ភៈនៅក្រសួងការពារជាតិអាម៉េរិក ដោយមានការចូលរួមពីអ្នកបង្កើតគោលនយោបាយការពារជាតិជាន់ខ្ពស់មកពីភាគីទាំងពីរ។
វានឹងជាលំហាត់យោធាដូច្នេះលើកដំបូងចាប់តាំងពីប្រទេសទាំងពីរបានយល់ព្រមកាលពីឆ្នាំមុនថានឹងរៀបចំធ្វើវាជារៀងរាល់ឆ្នាំ នៅពេលរដ្ឋាភិបាលទីក្រុងសេអ៊ូលស្វះស្វែងបង្កើនជំនឿចិត្តលើអាម៉េរិកនៅក្នុងការការពារខ្លួនពីការគំរាមមកពីកូរ៉េខាងជើង ជាពិសេសពាក់ព័ន្ធនឹងកងកម្លាំងនុយក្លេអ៊ែរ។
ក្រសួងបាននិយាយក្នុងសេចក្តីថ្លែងការណ៍ថា «ដោយផ្តោតលើការគំរាមនុយក្លេអ៊ែរមកពីកូរ៉េខាងជើង ភាគីទាំងពីរនឹងជជែកពិភាក្សាគ្នាស៊ីជំរៅអំពីវិធានការនានាដើម្បីពង្រឹងរបាំងការពារ រួមមានការចែករំលែកព័ត៌មាននិងរបៀបប្រឹក្សាយោបល់»។
នៅថ្ងៃ២៣កុម្ភៈ ពួកមន្ត្រីក៏នឹងទៅទស្សនាមូលដ្ឋានទ័ពជើងទឹកឃីងស៍បេ(Kings Bay)នៅរដ្ឋចចជៀ ដែលជាកន្លែងផ្ទុកនាវាមុជទឹកនុយក្លេអ៊ែរ។
សម្ពន្ធមិត្តទាំងពីរបាននិយាយថា ពួកគេបាននិងកំពុងធ្វើការជំរុញការរៀបចំផែនការនិងអនុវត្តប្រតិបត្តិការនុយក្លេអ៊ែររួមគ្នា ព្រមទាំងការចែករំលែកព័ត៌មាន៕
ភាគីទាំងពីរបានបញ្ចេញយន្តហោះទំនើបៗ រួមមានយន្តហោះអាចបំពាក់គ្រាប់នុយក្លេអ៊ែរមកធ្វើសមយុទ្ធលើឧបទ្វីបកូរ៉េកាលពីថ្ងៃ១មករា ២០២៣
កូរ៉េខាងជើងបង្ហាញគំរូកាំជ្រួចផ្លងទ្វីបHwasong-17 ក្នុងព្យុហយាត្រាយោធាកាលពីថ្ងៃ៨កុម្ភៈ ២០២៣