ដោយៈមជ្ឈមណ្ឌលឯកសារកម្ពុជា/ភ្នំពេញ៖លោក បណ្ឌិត វិចាវ៉ាត់ អ៊ីសារ៉ាផាកឌី អនុរដ្ឋមន្ត្រីក្រសួងការបរទេស នៃព្រះរាជាណាចក្រថៃ អមដំណើរដោយលោក ឆឺតគាត អាដ្ឋករ ឯកអគ្គរាជទូតព្រះរាជាណាចក្រថៃប្រចាំនៅ ព្រះរាជាណាចក្រកម្ពុជា បានដឹកនាំគណៈប្រតិភូថៃ អញ្ជើញទស្សនកិច្ចបណ្ណាល័យសម្តេចម៉ែ នាវេលាម៉ោង៣រសៀល ថ្ងៃទី១៦ ខែកុម្ភៈ ឆ្នាំ២០២៣។
ទស្សនកិច្ចនេះប្រព្រឹត្តទៅក្នុងគោលបំណងសិក្សាស្វែងយល់អំពីប្រវត្តិសាស្ត្រកម្ពុជា ជាពិសេសប្រវត្តិសាស្ត្រខ្មែរក្រហម ដែលជាកិច្ចការងារស្នូលរបស់មជ្ឈមណ្ឌលឯកសារកម្ពុជាព្រមទាំងពិភាក្សាដោះដូរយោបល់ផ្នែកវប្បធម៌រវាងកម្ពុជានិងថៃ។ លោក ឆាំង យុ នាយកមជ្ឈមណ្ឌលឯកសារកម្ពុជា បានទទួលគារវកិច្ចស្វាគមន៍ភ្ញៀវកិត្តិយសយ៉ាងកក់ក្តៅ។ លោកបានបង្ហាញដល់ប្រតិភូនូវបរិក្ខារនិងពិពណ៌នារៀបរាប់យ៉ាងលម្អិតអំពីកិច្ចការងារស្នូលរបស់បណ្ណាល័យសម្តេចម៉ែ, មជ្ឈមណ្ឌលឯកសារកម្ពុជា និងសាខានៅតាមបណ្តាខេត្តរបស់មជ្ឈមណ្ឌលឯកសារកម្ពុជាដែលបានចូលរួមចំណែកនិង បម្រើដល់ ការសិក្សាអប់រំ, ការចងចាំ, យុត្តិធម៌ និងការផ្សះផ្សានៅក្នុងប្រទេសកម្ពុជា។
ចាប់តាំងពីចាប់បដិសន្ធិឡើងនៅក្នុងឆ្នាំ១៩៩៥ មជ្ឈមណ្ឌលឯកសារកម្ពុជាបានបំពេញភារកិច្ចយ៉ាងមោះមុតក្នុង ការប្រមែប្រមូលចងក្រងឯកសារស្តីពីរបបខ្មែរក្រហមដើម្បីតម្កល់ការចងចាំជារួមសម្រាប់កម្ពុជាហើយតាមរយៈការងារនេះ មជ្ឈមណ្ឌលឯកសារកម្ពុជា បានផ្តល់ជាឯកសាររាប់លានសន្លឹកដល់សាលាក្តីខ្មែរក្រហម។
គួររំឭកថា ព្រះរាជាណាចក្រថៃ ក៏បានគាំទ្រដល់ដំណើរការកាត់ទោសមេដឹកនាំខ្មែរក្រហមតាមរយៈការផ្តល់ជំនួយ សប្បុរសដល់សាលាក្តីខ្មែរក្រហម។
ស្របគ្នានេះដែរ ភាគីថៃ គឺលោកស្រី នូសារ៉ា ថៃថាវ៉ាត់ អ្នកយកព័ត៌មាននៅការសែតបាងកកប៉ុស្តិ៍ធ្លាប់បានចូលរួម ចំណែក ជាមួយលោក ឆាំង យុ នាយកមជ្ឈមណ្ឌលឯកសារកម្ពុជា នៅក្នុងការបង្កើតជាសៀវភៅមួយមានឈ្មោះថា “ផ្ទះបាយខ្មែរ” ឬ “The Cuisine of Cambodia”ដែលគឺជាសៀវភៅគ្រឿងផ្សំម្ហូបដំបូងបំផុតសម្រាប់មុខម្ហូបខ្មែរក្រោយពីរបបខ្មែរក្រហមបានដួលរលំទៅនៅឆ្នាំ១៩៧៩។
សៀវភៅនេះ បានស្តារឡើងវិញនូវការចងចាំដ៏ស្រស់ត្រកាលអំពីមុខម្ហូបខ្មែរដែលប្រជាជនខ្មែរបានបរិភោគក្នុង យុគសម័យរុងរឿង នៅមុនពេលធ្លាក់ចូលទៅក្នុងភ្នក់ភ្លើងសង្គ្រាម។
អមមកជាមួយនឹងអារម្ភកថាដែលជាព្រះរាជចំណារដ៏ខ្ពង់ខ្ពស់នៃសម្តេចព្រះបរមរតនកោដ្ឋ នរោត្តម សីហនុ ព្រះវររាជបិតាជាតិខ្មែរ សៀវភៅមុខម្ហូបដែលជាស្នាដៃរួមគ្នារវាងអ្នកសិក្សាស្រាវជ្រាវជនជាតិខ្មែរនិងជនជាតិថៃនេះ បានបណ្តុះនូវស្មារតីយោគយល់និងរឹតចំណងមិត្តភាពរវាងកម្ពុជានិងថៃមួយកម្រិតទៀត។
ក្នុងឱកាសទស្សនកិច្ចនេះ លោក ឆាំង យុ បានបង្ហាញសៀវភៅមុខម្ហូបខាងលើនិងរៀបរាប់យ៉ាងលម្អិតអំពីគោលបំណងនៃ ការរៀបរៀងសៀវភៅនេះឡើង។ លោកព្រមទាំងបានពិពណ៌នារៀបរាប់អំពីគម្រោងវិទ្យាស្ថានស្លឹករឹត ដែលជាទីតាំងអចិន្ត្រៃយ៍របស់មជ្ឈមណ្ឌលឯកសារកម្ពុជា ជូនដល់ភ្ញៀវកិត្តិយស។ ទន្ទឹមនឹងនេះលោកក៏បានលើក យកឯកសារកម្រមួយចំនួននៅក្នុងសមុច្ច័យឯកសារកម្រនានារបស់មជ្ឈមណ្ឌលឯកសារកម្ពុជា បង្ហាញជូនភ្ញៀវកិត្តិយស។
គណៈប្រតិភូ ក៏បានទស្សនាវីដេអូឯកសារ, បណ្ណសារសោទស្សន៍, ឯកសារប្រភេទក្រដាស, ឯកសាររូបថតនិងបរិក្ខារផ្ទុក ឯកសារជាទម្រង់ឌីជីថលរបស់មជ្ឈមណ្ឌលឯកសារកម្ពុជា ដែលមានដាក់តម្កល់នៅបណ្ណាល័យសម្តេចម៉ែថែមទៀតផង។
ជាកិច្ចបញ្ចប់ លោក ឆាំង យុ បានរៀបចំកិច្ចពិភាក្សាដោះដូរយោបល់ដើម្បីផ្តល់ឱកាសជូនគណៈប្រតិភូចែករំលែកការ យល់ឃើញនិងចោទជាសំណួរផ្សេងៗ។ប្រតិភូកិត្តិយសបានបង្ហាញនូវចំណាប់អារម្មណ៍យ៉ាងជ្រាលជ្រៅចំពោះការងាររបស់មជ្ឈមណ្ឌលឯកសារកម្ពុជាព្រមទាំងថ្លែងអំណរគុណចំពោះការទទួលស្វាគមន៍យ៉ាងកក់ក្តៅមកកាន់បណ្ណាល័យសម្តេចម៉ែនារសៀលនេះ៕សរន
