ប្រែសម្រួលៈបំណង(អេស៊ាវ័ន)៖ ក្រុមវេជ្ជបណ្ឌិតបានប្រកាសកាលពីថ្ងៃព្រហស្បតិ៍ទី១៦កុម្ភៈថា ប្រធានាធិបតីអាម៉េរិកលោក ចូ បៃដិន វ័យ៨០ឆ្នាំ នៅ«មានសុខភាពគ្រប់គ្រាន់សំរាប់បំពេញភារកិច្ច»ក្រោយការពិនិត្យសុខភាពមួយ រួមមានការកាត់យកសាច់ត្រង់តំបន់ដំបៅទ្រូងរបស់លោកទៅពិនិត្យ និងបានប្រកាសថាលោកលែងមានរោគសញ្ញាកូវីដ១៩ក្រោយឆ្លងវីរុសនៃជំងឺផ្លូវដង្ហើមនេះកាលពីឆ្នាំមុន។
គ្រូពេទ្យសេតវិមានលោកខេវិន អូខុនន័រ បាននិយាយក្នុងរបាយការណ៍សង្ខេបមួយថា « លោកប្រធានាធិបតីនៅមានសុខភាពគ្រប់គ្រាន់សំរាប់បំពេញភារកិច្ច និងការការងាររបស់លោកទាំងអស់ …»។
លទ្ធផលនៃការពិនិត្យសុខភាពនេះត្រូវបានតាមដានយ៉ាងដិតដល់នៅពេលលោកបៃដិនត្រៀមឈរឈ្មោះសំរាប់អាណត្តិទីពីរនៅឆ្នាំ២០២៤។របាយការណ៍បាននិយាយថាបៃដិនមិនមានរោគសញ្ញាកូវីដយូរណាមួយទេ រីឯអាការដើរបែបពិបាករបស់លោកមិនបានវិវត្តទៅជាអាក្រក់ឡើងទេចាប់តាំងពីពេលពិនិត្យសុខភាពកាលពីខែវិច្ឆិកាឆ្នាំ២០២១។
បៃដិនក៏បានអះអាងដោយខ្លួនលោកដែរថា សុខភាពរាងកាយរបស់លោកល្អ។លោកបានប្រាប់សារព័ត៌មានNBC Newsថា«គ្រប់យ៉ាងពិតជាល្អ…អរគុណព្រះ»។
វាជាការពិនិត្យសុខភាពលើកទីពីរសំរាប់លោកបៃដិន ចាប់តាំងពីលោកឡើងកាន់អំណាចនៅខែមករាឆ្នាំ២០២១
របាយការណ៍បាននិយាយថា លោកបៃដិនបានប្រើថ្នាំCrestorដើម្បីរក្សាកំរិតកូឡេស្តេរ៉ូលអោយនៅទាប។សាច់ដុះតូចៗជាច្រើនត្រូវបានយកចេញពីមុខនិងក្បាលរបស់លោកដោយប្រើទឹកអ៊ីដ្រូហ្សែនហើយដំបៅតូចមួយលើទ្រូងត្រូវបានកាត់យកទៅពិនិត្យ។
ការពិនិត្យក៏បានរកឃើញថាលោកបៃដិនស្រកទម្ងន់អស់៦ផោន(២,៧២គីឡូក្រាម)មកនៅត្រឹម១៧៨ផោន(៨០,៧គីឡូក្រាម)ហើយសម្ពាធឈាម១២៦/៧៨។
សូមបញ្ជាក់ថា លោកបៃដិនជាប្រធានាធិបតីអាម៉េរិកវ័យចំណាស់បំផុតហើយការស្ទង់មតិបង្ហាញថាប្រជាជនអាម៉េរិកជាច្រើនបារម្ភអំពីលទ្ធភាពរបស់លោកក្នុងការដឹកនាំប្រទេសបួនឆ្នាំទៀត បើសិនជាលោកឈ្នះឆ្នោតនៅឆ្នាំ២០២៤៕