ប្រែសម្រួល : កញ្ញាដាលីស (ដេល្លីម៉េល) ៖ មហាអំណាចអឺរ៉ុបកាលពីថ្ងៃសុក្រទី១៧កុម្ភៈបានប្តេជ្ញាបង្កើនការគាំទ្រសម្រាប់អ៊ុយក្រែន ខណៈខ្លួនប្រយុទ្ធដើម្បីវាយបណ្តេញរុស្ស៊ីស្របពេលប្រធានាធិបតីបារាំងគូសបញ្ជាក់នៅក្នុងសន្និសីទសន្តិសុខដ៏ធំមួយថា ពេលវេលាមិនទាន់អំណោយផលទេសម្រាប់កិច្ចពិភាក្សាជាមួយរដ្ឋាភិបាលក្រុងមូស្គូ។
ប៉ុន្មានថ្ងៃនៅមុនថ្ងៃគម្រប់ខួបមួយឆ្នាំដែលរុស្ស៊ីបានបញ្ជូនកងកម្លាំងរបស់ខ្លួនចូលទៅអ៊ុយក្រែន រដ្ឋាភិបាលក្រុងមូស្គូបានដណ្តើមជោគជ័យខ្លះៗនៅក្នុងការវាយលុករបស់ខ្លួន។
ប្រធានក្រុមហ៊ុនទាហានស៊ីឈ្នួលរុស្ស៊ី Wagner បានអះអាងពីការដណ្តើមបានភូមិមួយនៅជិតទីក្រុងបាឃ្មុត (Bakhmut) ភាគខាងកើតជាទីតាំងនៃសមរភូមិដ៏យូរបំផុតនិងបង្ហូរឈាមបំផុតរហូតមកទល់ពេលនេះ។
ក្រោយមកនៅល្ងាចថ្ងៃសុក្រ អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក ចន កឺប៊ី (John Kirby) បានទទួលស្គាល់ថា “រុស្ស៊ីបានមានប្រៀបឈ្នះមួយចំនួននៅក្នុងនិងជុំវិញទីក្រុងបាឃ្មុត។ ប៉ុន្តែទីក្រុងនេះគ្មានតម្លៃយុទ្ធសាស្ត្រពិតប្រាកដទេ”។
លោកបានបន្ថែមថា “យើងប៉ាន់ប្រមាណឥឡូវនេះថា ក្រុមហ៊ុន Wagnerបានរងនូវការស្លាប់និងរបួស ៣០.០០០ នាក់ រួមទាំងប្រហែល ៩.០០០ នាក់ត្រូវសម្លាប់នៅក្នុងសកម្មភាពប្រយុទ្ធ”ខណៈពាក់កណ្តាលនៃអ្នកស្លាប់ត្រូវបានសម្លាប់ចាប់តាំងពីពាក់កណ្តាលខែធ្នូ។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានបើកសន្និសីទសន្តិសុខទីក្រុងមុយនិច (Munich)ជាមួយនឹងការអង្វរយ៉ាងអន្ទះអន្ទែងឱ្យសម្ពន្ធមិត្តពន្លឿនការគាំទ្រ ដោយអះអាងថា ជីវិតមនុស្សកំពុងប្រឈមគ្រោះថ្នាក់។
លោកបាននិយាយថា “យើងត្រូវការល្បឿន។ ល្បឿននៃកិច្ចព្រមព្រៀងរបស់យើង ល្បឿននៃការដឹកជញ្ជូនរបស់យើង … ល្បឿននៃការសម្រេចចិត្តដើម្បីរឹតត្បិតសក្តានុពលរបស់រុស្ស៊ី”។
ប្រធានាធិបតីបារាំង លោក អេមម៉ានុយអែល ម៉ាក្រុង បានចូលរួមក្នុងការអំពាវនាវឱ្យសម្ពន្ធមិត្ត “បង្កើនការគាំទ្រ” សម្រាប់អ៊ុយក្រែន ដើម្បីជួយដល់កងកម្លាំងរបស់អ៊ុយក្រែនក្នុងការបើកការវាយលុកតបវិញ។
លោកបាននិយាយថា “វាមិនមែនជាពេលវេលាសម្រាប់កិច្ចសន្ទនានោះទេ ពីព្រោះយើងមានរុស្ស៊ីដែលបានជ្រើសរើសយកសង្គ្រាម ដែលបានជ្រើសរើសបង្កើនសង្គ្រាមឱ្យកាន់តែខ្លាំងក្លា និងដែលបានជ្រើសរើសប្រព្រឹត្តឧក្រិដ្ឋកម្មសង្គ្រាមកាន់តែផុងជ្រៅទៅ និងវាយប្រហារទៅលើហេដ្ឋារចនាសម្ពន្ធស៊ីវិល”។
លោកបានបន្ថែមថា បារាំងបានត្រៀមខ្លួនរួចជាស្រេចសម្រាប់ “ជម្លោះអូសបន្លាយពេលយូរ” ខណៈលោកទទូចថា នេះមិនមែនជាអ្វីដែលលោកចង់បាននោះទេ។
អធិការបតីអាល្លឺម៉ង់លោក អូឡាហ្វ សូល បានទទូចថា ការគាំទ្ររបស់អាល្លឺម៉ង់ត្រូវបាន “បង្កើតឡើងដើម្បីឱ្យគង់វង្ស” ហើយបានជំរុញឱ្យសម្ពន្ធមិត្តបង្កើនល្បឿននៃការចែកចាយរថក្រោះធុនធ្ងន់ដែលបានសន្យាដល់អ៊ុយក្រែន៕
អ៊ុយក្រែនកំពុងសង្ខុញឱ្យបញ្ជូនអាវុធមកឱ្យបានឆាប់