ប្រែសម្រួល : កញ្ញាដាលីស (ដេល្លីម៉េល) ៖ ប៉ូលីសនៅប្រទេសប៊ុលហ្គារីបានរកឃើញឡានដឹកទំនិញបោះបង់ចោលមួយគ្រឿង ដែលផ្ទុកសាកសពជនចំណាកស្រុក១៨នាក់ ដែលទំនងជាថប់ដង្ហើមស្លាប់។
ក្រសួងមហាផ្ទៃបាននិយាយថា យោងតាមព័ត៌មានបឋម រថយន្តដឹកជនចំណាកស្រុកប្រហែល៤០នាក់ ហើយអ្នកនៅរស់ត្រូវបានបញ្ជូនទៅមន្ទីរពេទ្យក្បែរនោះ ដើម្បីព្យាបាលបន្ទាន់។
រថយន្តនេះត្រូវបានប្រទះឃើញទុកចោលនៅលើផ្លូវហាយវេក្បែររដ្ឋធានីសូហ្វីយ៉ា (Sofia)។ អ្នកបើកបរមិនបាននៅទីនោះទេ ប៉ុន្តែប៉ូលិសបានរកឃើញអ្នកដំណើរនៅក្នុងបន្ទប់សម្ងាត់មួយនៅក្រោមឈើ។
អាជ្ញាធរមិនបានផ្តល់សញ្ជាតិជនចំណាកស្រុកភ្លាមៗទេតែ ប្រព័ន្ធផ្សព្វផ្សាយប៊ុលហ្គារីបានរាយការណ៍ថា ពួកគេទាំងអស់មកពីប្រទេសអាហ្វហ្គានីស្ថាន។
រដ្ឋមន្ត្រីសុខាភិបាលប៊ុលហ្គារី លោក អាសសេន មេដហ្ស៊ីឌីវ (Assen Medzhidiev) បាននិយាយថា អ្នកនៅរស់រានមានជីវិតភាគច្រើនកំពុងស្ថិតក្នុងស្ថានភាពអាក្រក់ខ្លាំងណាស់។
លោកម៉េដហ្ស៊ីឌីវបាននិយាយថា “ពួកគេបានរងការខ្វះអុកស៊ីសែន សម្លៀកបំពាក់របស់ពួកគេសើម ពួកគេត្រជាក់កក ហើយជាក់ស្តែងមិនបានបរិភោគច្រើនថ្ងៃមកហើយ”។
ប៊ុលហ្គារី ជាប្រទេសនៅតំបន់បាល់កង់មានប្រជាជនចំនួន ៧ លាននាក់ មានទីតាំងស្ថិតនៅលើផ្លូវដ៏សំខាន់មួយសម្រាប់ជនចំណាកស្រុកពីមជ្ឈិមបូព៌ានិងអាហ្វហ្គានីស្ថានទៅកាន់អឺរ៉ុប។
ពួកគេតិចតួចណាស់មានគម្រោងស្នាក់នៅក្នុងសមាជិកក្រីក្របំផុតរបស់សហភាពអឺរ៉ុបមួយនេះដោយប្រើប្រាស់ប៊ុលហ្គារីជាច្រករបៀងឆ្លងកាត់នៅផ្លូវឆ្ពោះទៅលោកខាងលិចជំនួសវិញ។
ដើម្បីទប់ស្កាត់មនុស្សកុំឱ្យចូលប្រទេសដោយខុសច្បាប់ រដ្ឋាភិបាលប៊ុលហ្គារីបានសាងសង់របងលួសបន្លាតាមបណ្តោយព្រំដែនប្រវែង២៥៩ គីឡូម៉ែត្ររបស់ខ្លួនជាមួយតួកគី។ ប៉ុន្តែជនបរទេសដែលភៀសខ្លួនចេញពីភាពក្រីក្រឬជម្លោះនៅក្នុងប្រទេសកំណើតរបស់ពួកគេ អាចចូលបានដោយមានជំនួយពីអ្នករត់ពន្ធមនុស្សក្នុងស្រុក៕
ប៉ូលីសកំពុងហ៊ុមព័ទ្ធជុំវិញឡានដឹកទំនិញ ដែលគេបោះបង់ចោល នៅប៊ុលហ្គារី