ប្រែសម្រួល : កញ្ញាដាលីស (ដេល្លីម៉េល) ៖ បុណ្យខានីវ៉ល (Carnival)របស់ប្រេស៊ីលត្រឡប់មកវិញហើយ។
ឈុតសម្លៀកបំពាក់ភ្លឺចែងចាំងនិងឡូយឆាយត្រូវបានរៀបចំជាថ្មីម្តងទៀត។ បទចម្រៀង Samba បានបន្លឺឡើងរហូតដល់ភ្លឺនៅទីលានដង្ហែក្បួនដែលលក់សំបុត្រចូលរួមដាច់អស់រលីងនៅទីក្រុងរីយ៉ូដឺជែនីរ៉ូ (Rio de Janeiro)។ ពិធីជប់លៀងរាប់រយបានធ្វើពេញដងផ្លូវ។ ហើយសហគមន៍វណ្ណៈកម្មករមានក្តីរំភើបទាំងខាងអារម្មណ៍និងសេដ្ឋកិច្ចដោយការប្រារព្ធបុណ្យហែក្បួននេះសាជាថ្មី។
ជំងឺរាតត្បាតកូវីដ១៩កាលពីឆ្នាំមុនបានជំរុញឱ្យទីក្រុងរីយ៉ូពន្យារពេលពិធីបុណ្យខានីវ៉លពីរខែ ហើយបានកាត់បន្ថយភាពសប្បាយរីករាយមួយចំនួន ដែលចូលរួមភាគច្រើនដោយអ្នកស្រុកប៉ុណ្ណោះ។ រដ្ឋាភិបាលសហព័ន្ធរបស់ប្រេស៊ីលរំពឹងថា មនុស្ស៤៦លាននាក់នឹងចូលរួមពិធីបុណ្យដែលបានចាប់ផ្តើមជាផ្លូវការកាលពីថ្ងៃសុក្រទី១៧កុម្ភៈនិងដំណើរការរហូតដល់ថ្ងៃទី២២ ខែកុម្ភៈ។ នោះរាប់បញ្ចូលទាំងភ្ញៀវទៅកាន់ទីក្រុងនានា ដែលបានធ្វើឱ្យពិធីបុណ្យខានីវ៉លមានភាពល្បីល្បាញលើពិភពលោក ជាពិសេសទីក្រុងរីយ៉ូ ប៉ុន្តែក៏មានទីក្រុងសាល់វ៉ាឌឺ (Salvador) ទីក្រុងរីស៊ីហ្វេ (Recife) និងទីក្រុងសៅប៉ូឡូ (Sao Paulo)ផងដែរ ដែលថ្មីៗនេះបានក្លាយជាចំណុចពេញនិយមបំផុត។
អភិបាលក្រុងប្រេស៊ីលជាច្រើន រួមទាំងអភិបាលក្រុងរីយ៉ូបានចាប់ផ្តើមប្រារព្ធពិធីបុណ្យកាលពីថ្ងៃសុក្រ ដោយប្រគល់សោជានិមិត្តរូបដល់ទីក្រុងរបស់ពួកគេនិងទៅកាន់ស្តេចខានីវ៉លរបស់ពួកគេ។ ហើយពិធីជប់លៀងតាមដងផ្លូវដំបូងបង្អស់នៃពិធីបុណ្យខានីវ៉លចុងសប្តាហ៍នេះបានចាប់ផ្តើមជាមួយនឹងសម្លៀកបំពាក់ប្លែកៗរបស់អ្នកចូលរួម ដែលមានចាប់ពីឈុតសម្តេចប៉ាបហ្វ្រង់ស៊ីសរហូតដល់ឈុតបិសាច៕
បុណ្យខានីវ៉លនៅប្រេស៊ីលធ្វើពីថ្ងៃសុក្រដល់ថ្ងៃទី២២កុម្ភៈ