ប្រែសម្រួល : កញ្ញាដាលីស (ដេល្លីម៉េល) ៖ គណៈកម្មាការក្រសួងយុត្តិធម៌ជប៉ុនកាលពីថ្ងៃសុក្រទី១៧កុម្ភៈបានស្នើឱ្យបង្កើនអាយុអាចរួមភេទបានសំរាប់ប្រជាជនរបស់ប្រទេសនេះ ដែលបច្ចុប្បន្នស្ថិតក្នុងចំណោមកម្រិតទាបបំផុតរបស់ពិភពលោកគឺត្រឹម ១៣ឆ្នាំ ជាផ្នែកនៃការផ្លាស់ប្តូរដ៏សំខាន់នៃច្បាប់ស្តីពីបទល្មើសផ្លូវភេទ។
ចំណាត់ការដើម្បីបង្កើនអាយុអាចរួមភេទបានដល់ ១៦ឆ្នាំគឺជាផ្នែកមួយនៃកញ្ចប់កំណែទម្រង់ ដែលនឹងបញ្ជាក់ផងដែរអំពីតម្រូវការនៃការដាក់ទោសករណីរំលោភសេពសន្ថវៈ និងបទល្មើសលួចមើលគេស្រាត។
អនុសាសន៍ ដែលដាក់ជូនរដ្ឋមន្ត្រីក្រសួងយុត្តិធ៌មនេះធ្វើឡើងបន្ទាប់ពីការដោះលែងឱ្យមានសេរីភាពចំពោះជនរំលោភសេពសន្ថវៈជាបន្តបន្ទាប់ ដែលបង្កឱ្យមានការតវ៉ា ហើយនឹងក្លាយជាមូលដ្ឋានសម្រាប់សេចក្តីព្រាងវិសោធនកម្ម ដែលអាចត្រូវបានអនុម័តដោយសភានៅចុងឆ្នាំនេះ។
អាយុអាចរួមភេទបានរបស់ជប៉ុន ដែលជាកម្រិតទាបបំផុតក្នុងចំណោមប្រទេសឧស្សាហកម្មG7 នៅតែមិនផ្លាស់ប្តូរចាប់តាំងពីការអនុម័តរបស់វាក្នុងឆ្នាំ ១៩០៧។
អាយុអាចរួមភេទបានគឺ ១៦ ឆ្នាំនៅចក្រភពអង់គ្លេសនិងកូរ៉េខាងត្បូង ១៥ ឆ្នាំនៅបារាំងនិង ១៤ ឆ្នាំនៅអាល្លឺម៉ង់និងចិន។
នៅក្រោមច្បាប់របស់ជប៉ុនបច្ចុប្បន្ន កុមារដែលមានអាយុយ៉ាងតិច១៣ ឆ្នាំត្រូវបានចាត់ទុកថាមានសមត្ថភាពក្នុងការយល់ព្រមរួមភេទ ចឹងមានន័យថា សកម្មភាពផ្លូវភេទជាមួយពួកគេមិនត្រូវបានចាត់ទុកថាជាការរំលោភនោះទេក្នុងន័យច្បាប់។
នេះមានន័យថា សូម្បីតែក្មេងជំទង់ ដែលរួចផុតពីការរំលោភសេពសន្ថវៈ ក៏ប្រឈមមុខនឹងការឡើងសវនការកាត់ក្តីដូចមនុស្សពេញវ័យដែរ។
នៅក្នុងការអនុវត្ត បញ្ញត្ដិក្នុងតំបន់ដែលហាមប្រាមការប្រព្រឹត្តិ “អាសគ្រាម” ជាមួយអនីតិជន ជួនកាលត្រូវគេមើលឃើញដូចបានបង្កើនអាយុអាចរួមភេទជាធរមានដល់ ១៨ ឆ្នាំនៅក្នុងផ្នែកជាច្រើននៃប្រទេសជប៉ុនរួចទៅហើយ។
ប៉ុន្តែបញ្ញត្តិទាំងនោះមានការពិន័យស្រាលជាងការចោទប្រកាន់ពីបទរំលោភសេពសន្ថវៈ និងចាត់ទុកការរួមភេទជាមួយកុមារគ្រាន់តែជាការប្រព្រឹត្ត “គ្មានសីលធម៌”ដោយលែងរាប់ចូលនូវចរិតបែបបង្ខំរបស់វាទាំងស្រុង នេះបើយោងតាមលោក កាហ្ស៊ូណា កាណាជីរី (Kazuna Kanajiri) ជាសកម្មជន ដែលប្រយុទ្ធប្រឆាំងនឹងរឿងអាសអាភាសនិងការកេងប្រវ័ញ្ចផ្លូវភេទប្រាប់ទៅទីភ្នាក់ងារសារព័ត៌មាន AFP។
លោកកាណាជីរី ដែលជាប្រធានអង្គការPAPS មានមូលដ្ឋាននៅទីក្រុងតូក្យូនិងស្វាគមន៍ចំពោះគម្រោងបង្កើនអាយុអាចរួមភេទដល់ ១៦ឆ្នាំ បាននិយាយថា រឿងនេះទុកចន្លោះប្រហោងសម្រាប់ជនល្មើសដើម្បី “បង្វែរការស្តីបន្ទោសទៅលើជនរងគ្រោះនិងប្រកែកថា ការរួមភេទត្រូវបានផ្តួចផ្តើមឬរីករាយដោយកុមារ”។
គូស្នេហ៍វ័យជំទង់ ដែលមានអាយុមិនលើសពីគ្នាប្រាំឆ្នាំ នឹងត្រូវរួចផុតពីការកាត់ទោស ប្រសិនបើដៃគូទាំងពីរមានអាយុលើសពី ១៣ ឆ្នាំ។
ជប៉ុនបានកែប្រែក្រមព្រហ្មទណ្ឌរបស់ខ្លួនស្តីពីបទល្មើសផ្លូវភេទក្នុងឆ្នាំ ២០១៧ ជាលើកដំបូងក្នុងរយៈពេលជាងមួយសតវត្សរ៍ ប៉ុន្តែពួកអ្នកធ្វើយុទ្ធនាការបាននិយាយថា កំណែទម្រង់នេះមិនទាន់គ្រប់គ្រាន់ទេ។
ហើយក្នុងឆ្នាំ ២០១៩ ការដោះលែងឱ្យមានសេរីភាពក្នុងសំណុំរឿងរំលោភសេពសន្ថវៈ បានបង្កឱ្យមានការតវ៉ាទូទាំងប្រទេស៕
ការដោះលែងឱ្យមានសេរីភាពក្នុងសំណុំរឿងរំលោភសេពសន្ថវៈ បានបង្កឱ្យមានការតវ៉ាទូទាំងប្រទេស
សិស្សជប៉ុនដាក់ញត្តិទៅក្រសួងយុត្តិធម៌សុំអោយដំឡើងអាយុអាចរួមភេទបានពី១៣ទៅ១៦ឆ្នាំ