ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរប្រេស៊ីលបាននិយាយកាលពីថ្ងៃអាទិត្យទី១៩កុម្ភៈថា មនុស្សយ៉ាងហោចណាស់ ១៩ នាក់បានស្លាប់នៅក្នុងទីក្រុងជាច្រើននៅភាគខាងជើងរដ្ឋសៅប៉ូឡូ (Sao Paulo) ចំពេលមានទឹកជំនន់និងការរអិលបាក់ដី ហើយចំនួនស្លាប់នៅតែអាចកើនឡើងទៀត។
ទីក្រុងសៅសេបាស្ទីអាវ (Sao Sebastiao) និងទីក្រុងបឺទីអូហ្គា (Bertioga) ដែលជាតំបន់រងគ្រោះខ្លាំងបំផុតទាំងពីរ បានលុបចោលពិធីបុណ្យខានីវ៉ល (Carnival) របស់ពួកគេ ខណៈក្រុមជួយសង្គ្រោះព្យាយាមស្វែងរកអ្នកបាត់ខ្លួន អ្នករងរបួស និងអ្នកបារម្ភថាស្លាប់នៅក្នុងគំនរបាក់បែក។
លោក ហ្វេលីប៉េ អូហ្គោស្តូ (Felipe Augusto) អភិបាលក្រុងសៅសេបាស្ទីអាវ បាននិយាយថា “ក្រុមជួយសង្គ្រោះរបស់យើងមិនអាចទៅដល់ទីតាំងជាច្រើនបាននោះទេ វាជាស្ថានភាពវឹកវរ”។ គាត់បានបង្ហោះនៅក្នុងបណ្តាញសង្គមរបស់គាត់នូវវីដេអូជាច្រើននៃការបំផ្លិចបំផ្លាញយ៉ាងទូលំទូលាយនៅក្នុងទីក្រុងរបស់គាត់ រួមទាំងទារកម្នាក់ដែលត្រូវបានជួយសង្គ្រោះដោយអ្នកស្រុកដែលតម្រង់ជួរនៅលើផ្លូវលិចទឹក។
រដ្ឋាភិបាលរដ្ឋសៅប៉ូឡូបាននិយាយនៅក្នុងសេចក្តីថ្លែងការណ៍មួយថា ទឹកភ្លៀងក្នុងតំបន់បានកើនឡើងលើសពី ៦០០ មិល្លីម៉ែត្រក្នុងមួយថ្ងៃដែលជាបរិមាណខ្ពស់បំផុតមិនធ្លាប់មាននៅក្នុងប្រទេសប្រេស៊ីលក្នុងរយៈពេលដ៏ខ្លីបែបនេះ។
រដ្ឋាភិបាលរដ្ឋបាននិយាយថា ទីក្រុងបឺទីអូហ្គាតែឯងមានភ្លៀង ៦៨៧ មិល្លីម៉ែត្រក្នុងអំឡុងពេលនោះ។
អភិបាលរដ្ឋលោក ថាស៊ីស៊ីអូ ដេ ហ្វ្រេអីតាស (Tarcisio de Freitas)បាននិយាយនៅក្នុងសេចក្តីថ្លែងការណ៍មួយថា លោកបានស្នើសុំការគាំទ្រពីកងទ័ព ដែលនឹងបញ្ជូនយន្តហោះពីរគ្រឿង និងក្រុមជួយសង្គ្រោះទៅកាន់តំបន់រងគ្រោះ។ លោកបានចេញក្រឹត្យស្តីពីគ្រោះមហន្តរាយសាធារណៈសម្រាប់ទីក្រុងអ៊ូបាទូបា (Ubatuba) ទីក្រុងសៅសេបាស្ទីអាវ ទីក្រុងអ៊ីលហាបេឡា (Ilhabela) ទីក្រុងការ៉ាហ្គូតាទូបា (Caraguatatuba) និង ទីក្រុងបឺទីអូហ្គា។
រូបភាពទូរទស្សន៍បានបង្ហាញផ្ទះជន់លិចនៅសល់តែដំបូលមើលឃើញលឹមៗ។ អ្នកស្រុកកំពុងប្រើទូកតូចៗដើម្បីដឹករបស់របរនិងមនុស្សទៅទីទួលខ្ពស់។ ផ្លូវដែលតភ្ជាប់ទីក្រុងរីយ៉ូដេជេនីរ៉ូ (Rio de Janeiro) ទៅកាន់ទីក្រុងកំពង់ផែ សាន់តូស (Santos) ត្រូវបានបិទដោយការរអិលបាក់ដីនិងទឹកជំនន់។
ឆ្នេរសមុទ្រភាគខាងជើងនៃរដ្ឋសៅប៉ូឡូគឺជាគោលដៅពិធីបុណ្យខានីវ៉លសម្រាប់អ្នកទេសចរសម្បូរទ្រព្យសម្បត្តិដែលចូលចិត្តនៅឆ្ងាយពីពិធីជប់លៀងតាមដងផ្លូវនៅក្នុងទីក្រុងធំៗ៕
ជំនន់នៅរដ្ឋសៅប៉ូឡូសម្លាប់មនុស្ស១៩នាក់