ប្រែសម្រួល : កញ្ញាដាលីស (ដេល្លីម៉េល) ៖ តួកគីកាលពីថ្ងៃអាទិត្យទី១៩កុម្ភៈបាននិយាយថាកិច្ចខិតខំប្រឹងប្រែងជួយសង្គ្រោះបន្ទាប់ពីរញ្ជួយដីដ៏សាហាវកាលពីសប្តាហ៍មុនបានបញ្ចប់នៅក្នុងខេត្តទាំងអស់លើកលែងតែខេត្តចំនួនពីរ ខណៈរដ្ឋមន្ត្រីការបរទេសអាម៉េរិកលោក អានថូនី ប្លីងកិន ដែលកំពុងបំពេញទស្សនកិច្ច បានប្រកាសជំនួយមនុស្សធម៌ថ្មី ១០០ លានដុល្លារ។
រញ្ជួយដីកម្រិត ៧,៨ រិច្ឆទ័រ ដែលបានវាយប្រហារភាគអាគ្នេយ៍នៃប្រទេសតួកគី និងភាគខាងជើងប្រទេសស៊ីរី កាលពីថ្ងៃទី ៦ ខែកុម្ភៈ បានសម្លាប់មនុស្សជាង ៤៤.០០០ នាក់(ខ្លះថា៤៦.០០០នាក់)ជាមួយនឹងលទ្ធភាពនៃការស្វែងរកអ្នកនៅរស់រានមានជីវិតគឺមានតិចបំផុតក្រោយរញ្ជួយដីពីរសប្តាហ៍មកនេះ។
ប្រធានទីភ្នាក់ងារគ្រោះមហន្តរាយរបស់តួកគី លោក យូនូស សេហ្សឺ (Yunus Sezer)កាលពីថ្ងៃអាទិត្យបាននិយាយថាកិច្ចខិតខំប្រឹងប្រែងស្វែងរកនិងជួយសង្គ្រោះត្រូវបានបញ្ចប់នៅក្នុងខេត្តទាំងអស់ លើកលែងតែខេត្តហាតាយ (Hatay) និងខេត្តការ៉ាម៉ានម៉ារ៉ាស (Kahramanmaras) ដែលជាចំណុចកណ្តាលនៃរញ្ជួយដី។
លោកសេហ្សឺបាននិយាយថា កិច្ចខិតខំប្រឹងប្រែងស្វែងរកនិងជួយសង្គ្រោះបានបន្តនៅអគារប្រហែល ៤០ នៅក្នុងខេត្តទាំងពីរនៅថ្ងៃទី ១៤ នៃរញ្ជួយដី ប៉ុន្តែរំពឹងថាចំនួនស្វែងរកនឹងថយចុះនៅយប់ថ្ងៃអាទិត្យទី១៩កុម្ភៈ។
ប្រធានទីភ្នាក់ងារនេះក៏បាននិយាយដែរថា ចំនួនអ្នកស្លាប់នៅតួកគីបានកើនឡើងដល់ ៤០.៦៨៩ នាក់។ ចំនួនអ្នកស្លាប់សរុបរួមទាំងស៊ីរីឥឡូវនេះមាន ៤៤.៣៧៧ នាក់៕
ប្រតិបត្តិការស្វែងរកត្រូវបានបញ្ចប់ខណៈលោកប្លីងកិនមកដល់តួកគីដើម្បីបង្ហាញសាមគ្គីភាព
លោកប្លីងកិន ជួយបុគ្គលិកយោធាអាម៉េរិកលើកជំនួយឡើងលើរថយន្តនៅមូលដ្ឋានទ័ពអាកាសមួយនៅតួកគី កាលពីថ្ងៃ១៩កុម្ភៈ