ដោយ: បូកគោ/កំពត: ភ្ញៀវទេសចរមកពីបណ្តាប្រទេសនានាបានចាប់អារម្មណ៍ ព្រមទាំងស្រលាញ់ចូលចិត្តប្រជាជនកម្ពុជានូវស្នាមញញឹម និងភាពរួសរាយរាក់ទាក់។ ភ្ញៀវទាំងនោះបានសន្យាថាពេលវិលត្រឡប់ទៅប្រទេសខ្លួនវិញ ពួកគេនឹងជួយផ្សព្វផ្សាយ ហើយនាំគ្នាមកកម្សាន្តនៅកម្ពុជាឲ្យបានកាន់តែច្រើន និងញឹកញយតាមដែលអាចធ្វើបាន។
ក្នុងដំណើរមកកម្សាន្តនៅសហគមន៍ទេសចរណ៍ធម្មជាតិត្រពាំងសង្កែថ្មីៗនេះ កញ្ញា ម៉ារី ភ្ញៀវមកពីប្រទេសកាណាដាបានបង្ហាញពីអារម្មណ៍ផ្ទាល់ខ្លួនថា កម្ពុជាសម្បូរកន្លែងកម្សាន្តច្រើនប្រភេទដែលមានទេសភាព និងការរៀបយ៉ាងល្អប្រណីត។ ការបង្កើតឲ្យមានកន្លែងលម្ហែកម្សាន្ត ពិសេសតំបន់អេកូទេសចរណ៍បានជំរុញដល់កិច្ចការពារបរិស្ថានដើម្បីបញ្ចៀសនូវសកម្មភាពបំផ្លិចបំផ្លាញធនធានធម្មជាតិជាដើម។
ស្រដៀងគ្នានេះដែរ អ្នកស្រី ណាយ៉ា ទេសចរមកពីប្រទេសអង់គ្លេសបានរៀបរាប់ថា អ្នកស្រីសប្បាយចិត្តយ៉ាងខ្លាំងដែលបានមកស្គាល់ប្រជាជនខ្មែរដែលមានភាពរួសរាយរាក់ទាក់ និងពោរពេញដោយស្នាមញញឹម។ ទាំងប្រជាជន ទាំងវប្បធម៌ខ្មែរបានធ្វើអ្នកស្រីជាប់ចិត្ត ហើយចង់ឃើញ និងចង់ស្វែងយល់អំពីរបៀបរបបនៃការរស់នៅបន្ថែមទៀត។
ភ្ញៀវជនជាតិអង់គ្លេសម្នាក់ទៀត គឺលោក ម៉ាទីន បានប្រាប់ឲ្យដឹងថា នេះអាចមិនមែនជាដំណើរកម្សាន្តចុងក្រោយទេ ព្រោះលោកស្រលាញ់ប្រទេសកម្ពុជាយ៉ាងខ្លាំង។ ប្រជាជនកម្ពុជាមានសន្តានចិត្តល្អគួរឲ្យរាប់អាន និងរាក់ទាក់ជាមួយភ្ញៀវទេសចរបរទេសទៀតផង។ ពេលត្រឡប់ទៅប្រទេសវិញ ពួកលោកនឹងប្រាប់ដល់មនុស្សគ្រប់គ្នាឲ្យមកកម្សាន្តនៅកម្ពុជាដើម្បីបានស្នាក់អាស្រ័យប្រកបដោយភាពសប្បាយរីករាយ ក៏ដូចជាជួយគាំទ្រប្រជាជនកម្ពុជាផងដែរ។
សូមបញ្ជាក់ថា ភ្ញៀវបរទេសដែលបានមកខេត្តកំពតភាគច្រើនចូលចិត្តធ្វើដំណើរកម្សាន្តទៅតំបន់កសិ-ទេសចរណ៍ សហគមន៍អេកូទេសចរណ៍ និងតំបន់ទេសចរណ៍វប្បធម៌ប្រវត្តិសាស្ត្រនានា។ លុះពេលរាត្រី ពួកគេបាននាំគ្នាមកអង្គុយលម្ហែនៅតំបន់ផ្សារណាត់ដែលជាទីក្រុងបុរាណសម្បូរដោយសំណង់បន្សល់ទុកពីសម័យអាណានិគមនិយមបារាំងដើម្បីគយគន់ថ្ងៃលិច និងពិសាអាហារផ្សេងៗ៕/R
