ប្រែសម្រួល : កញ្ញាដាលីស (ស្ត្រេតថែមស៍) ៖ កាសែតតែមួយគត់នៃគណបក្សប្រឆាំងដ៏សំខាន់របស់ប្រទេសបង់ក្លាដែសបានបញ្ឈប់ការបោះពុម្ពកាលពីថ្ងៃចន្ទទី២០កុម្ភៈ បន្ទាប់ពីបទបញ្ជាព្យួររបស់រដ្ឋាភិបាលត្រូវបានរក្សាទុក ជាហេតុនាំឱ្យមានការបារម្ភអំពីសេរីភាពសារព័ត៌មាននៅក្នុងប្រទេសអាស៊ីខាងត្បូងមួយនេះ។
ក្រុមអ្នកធ្វើយុទ្ធនាការនិងរដ្ឋាភិបាលបរទេស រួមទាំងសហរដ្ឋអាម៉េរិក បានសម្តែងការព្រួយបារម្ភជាយូរណាស់មកហើយអំពីកិច្ចខិតខំប្រឹងប្រែងរបស់នាយករដ្ឋមន្ត្រី សេក ហាស៊ីណា (Sheikh Hasina) ដើម្បីបំបិទការរិះគន់ និងអ្វីដែលពួកគេមើលឃើញថាជារបបផ្តាច់ការដែលកំពុងលូនចេញមក។
កាសែត Dainik Dinkal ដែលជាកាសែតភាសាបង់ក្លាដែសទំព័រធំទូលំទូលាយ គឺជាសំឡេងដ៏សំខាន់របស់គណបក្សជាតិនិយមបង់ក្លាដែស (BNP) អស់រយៈពេលជាងបីទសវត្សរ៍មកហើយ។ កាសែតនេះមានបុគ្គលិកនិងអ្នកសារព័ត៌មានរាប់រយនាក់។
កាសែតនេះគ្របដណ្តប់លើរឿងល្បីៗ ដែលកាសែតពេញនិយមភាគច្រើនដែលគ្រប់គ្រងដោយពាណិជ្ជករនិងគាំទ្ររដ្ឋាភិបាលកម្រនឹងធ្វើ។
ទាំងនេះរួមបញ្ចូលទាំងការចាប់ខ្លួនសកម្មជនបក្ស BNP ជាញឹកញយ និងអ្វីដែលគណបក្សនេះនិយាយថា ជាករណីក្លែងក្លាយរាប់ពាន់ប្រឆាំងនឹងអ្នកគាំទ្ររបស់ខ្លួន។
កាសែតនេះបាននិយាយថា អាជ្ញាធរសង្កាត់ក្នុងទីក្រុងដាក្កាបានបញ្ជាឱ្យបិទនៅថ្ងៃទី ២៦ ខែធ្នូ ប៉ុន្តែកាសែតនៅតែបន្តបោះពុម្ពបន្ទាប់ពីបានប្តឹងឧទ្ធរណ៍នៅក្រុមប្រឹក្សាសារព័ត៌មានដែលដឹកនាំដោយចៅក្រមតុលាការកំពូលរហូតដល់ថ្ងៃត្រូវបិទមែនទែននៅថ្ងៃចន្ទនេះ៕
សន្ទស្សន៍សេរីភាពសារព័ត៌មានពិភពលោកឆ្នាំ ២០២២ ចងក្រងដោយអង្គការអ្នកកាសែតគ្មានព្រំដែន ដាក់ចំណាត់ថ្នាក់ប្រទេសបង់ក្លាដែសនៅលេខ ១៦២ អាក្រក់ជាងរុស្ស៊ី