ប្រែសម្រួល : កញ្ញាដាលីស (ដេល្លីម៉េល) ៖ ទិន្នន័យផ្លូវការបានបង្ហាញថាចំនួនអ្នកស្លាប់ដោយសារជំនន់ទឹកភ្លៀងដ៏បំផ្លិចបំផ្លាញនៅភាគអាគ្នេយ៍ប្រទេសប្រេស៊ីលបានកើនឡើងដល់៤០ នាក់កាលពីថ្ងៃចន្ទទី២០កុម្ភៈ ខណៈប្រធានាធិបតី ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) បានចុះទៅមើលតំបន់នេះ ហើយនិយាយថាផ្ទះសម្បែងមិនគួរសាងសង់នៅក្នុងតំបន់ដែលមានហានិភ័យនៃការរអិលបាក់ដីនិងទឹកជំនន់ធំៗទៀតទេ។
អាជ្ញាធរក្នុងរដ្ឋសៅប៉ូឡូបាននិយាយកាលពីថ្ងៃចន្ទថា មនុស្សបួននាក់ទៀតត្រូវបានសម្លាប់បន្ថែមពីលើចំនួនស្លាប់៣៦ នាក់កាលពីមួយថ្ងៃមុននេះ ប៉ុន្តែការស្លាប់និងរបួសច្រើនជាងនេះនឹងមានថែមទៀត ខណៈមនុស្សជាង៣០នាក់នៅកំពុងបាត់ខ្លួននៅឡើយ។
លោកលូឡាបានហោះពីលើទីប្រជុំជនមាត់ឆ្នេរ សៅសេបាស្ទីអាវ (Sao Sebastiao) រួមជាមួយនឹងក្រុមរដ្ឋមន្ត្រី ហើយបានសន្យាថានឹងជួយកសាងទីប្រជុំជននៃប្រជាជនប្រហែល៩១.០០០ នេះឡើងវិញ ដោយសាងសង់ផ្ទះថ្មីនៅកន្លែងដែលមានសុវត្ថិភាពជាងនេះ។
លោកក៏បាននិយាយដែរថា រដ្ឋាភិបាលត្រូវតែធ្វើការដើម្បីស្ដារហេដ្ឋារចនាសម្ពន្ធសំខាន់ៗដូចជាផ្លូវដែលរងការខូចខាតដោយការរអិលបាក់ដី៕
លោកលូឡាកំពុងពិនិត្យមើលស្ថានភាពក្រោយគ្រោះទឹកជំនន់នៅទីក្រុងសៅសេបាស្ទីអាវពីលើឧទ្ធម្ភាគចក្រ