ប្រែសម្រួល : កញ្ញាដាលីស (បាល់ទាត់) ៖ ក្រុមឡើងជើងខ្លាំងរបស់អ៊ីតាលី Napoli នឹងត្រូវធ្វើដំណើរសួរសុខទុក្ខ Frankfurt នៅថ្ងៃអង្គារនេះសម្រាប់ការប្រកួត Uefa Champions Leauge វគ្គ១៦ក្រុមជើងទី១ ជាមួយនឹងក្តីសង្ឃឹមយកឈ្នះគឺមានខ្ពស់ណាស់។ ទន្ទឹមនេះដែរ ក្រុមហង្សក្រហម Liverpool ដែលកំពុងឡើងជើងដែរនោះ រំពឹងសងសឹកស្តេចស Real Madrid ដែលតែងបំបាក់ខ្លួននៅវគ្គផ្តាច់ព្រ័ត្រ UCL។
ការព្យាករណ៍ ៖
– Frankfurt vs Napoli
* Napoli គឺជាក្រុមតែមួយគត់នៅអឺរ៉ុបដែលស៊ុតបញ្ចូលទីបាន ២០ គ្រាប់ក្នុងវគ្គចែកពូល។
* ក្រុមភ្ញៀវបានស៊ុតបាល់បញ្ចូលទីយ៉ាងហោចណាស់២គ្រាប់ក្នុងការប្រកួត៨លើកចុងក្រោយនៅក្នុងការប្រកួតទាំងអស់។
* Napoli រកបាន២គ្រាប់ ឬច្រើនគ្រាប់ក្នុង ១១ ប្រកួតក្រៅដីនៃ ១៤ ប្រកួតក្រៅដីចុងក្រោយរបស់ពួកគេ។
* Khvicha Kvaratskhelia បានចូលរួមចំណែកក្នុងការស៊ុតបញ្ចូលទីចំនួន ៨ គ្រាប់ក្នុងការប្រកួត ៥ លើកចុងក្រោយរបស់គេ ដោយស៊ុតបញ្ចូលទីក្នុងការបង្ហាញខ្លួន ៣ លើកចុងក្រោយរបស់គេ។
ក្របខណ្ឌ Champions League រដូវកាលនេះមើលទៅហាក់បើកទ្វារចំហរួចទៅហើយ ដោយសារក្រុមធំៗជាច្រើនកំពុងធ្លាក់ចុះទម្រង់ខុសពេលវេលា។ ការជួបគ្នារវាងក្រុមទាំងពីរនេះក៏បានបើកឱកាសកាន់តែធំផងដែរសម្រាប់លទ្ធភាពប្រជែងពានពីសំណាក់ក្រុមមិនសូវល្បី ព្រោះក្រុមកំពូលចំនួន៤ក្នុងចំណោមក្រុមកំពូលទាំង៦ បានប៉ះគ្នាក្នុងប្រកួតដំបូងកាលពីសប្តាហ៍មុននៃឆ្នាំ ២០២៣ ក្នុងជុំទីមួយ។
នោះអាចត្រួសត្រាយផ្លូវសម្រាប់ “សេះខ្មៅ” (ក្រុមខ្លាំងលាក់មុខ) ដើម្បីប្រជែងយកពានស្ងាត់ៗ។ Eintracht Frankfurt មានបទពិសោធន៍ក្នុងទ្វីបអឺរ៉ុបបន្ទាប់ពីឈ្នះពាន Europa League កាលពីរដូវកាលមុន ខណៈ Napoli ជាក្រុមខ្លាំងទាំងក្នុងស្រុកនិងក្នុងទ្វីបអឺរ៉ុបក្នុងរដូវកាលនេះ។
ការប្រកួតវគ្គ ១៦ ក្រុមចុងក្រោយរបស់ពួកគេនឹងក្លាយជាការប្រកួតដ៏លេចធ្លោនៅថ្ងៃនេះ ប៉ុន្តែតើអ្នកណានឹងមានប្រៀបឈ្នះក្នុងការប្រកួតជើងទីមួយក្នុងសប្តាហ៍នេះ?
Napoli បានប្រកាសវត្តមានរបស់ខ្លួននៅលើឆាកអឺរ៉ុបក្នុងរដូវកាលនេះជាមួយនឹងជ័យជម្នះ ៤-១ លើក្រុម Liverpool ដោយបន្តឈរនៅលើកំពូលតារាងក្នុងពូលរបស់ពួកគេពីលើក្រុមឡើងវគ្គផ្តាច់ព្រ័ត្ររដូវកាលមុន។ Napoli បានលេងល្អដូចផ្កានៅគ្រប់ការប្រកួតទាំងអស់ ប៉ុន្តែគេទាយថា ការប៉ុនប៉ងលើកពាន Serie A របស់ពួកគេអាចនឹងបង្អាក់ពួកគេនៅក្នុងទ្វីបអឺរ៉ុប។
ខណៈការប្រកួតក្របខណ្ឌ Champions League ចាប់ផ្តើមឡើងវិញ Napoli បានបង្កើនការនាំមុខ ១៥ ពិន្ទុនៅក្នុង Serie A រួចជាស្រេច។ ដូច្នេះពួកគេនឹងអាចដាក់ឈុតខ្លាំងៗឱ្យលេងយកឈ្នះនៅថ្ងៃនេះតែម្តង។
Napoli មានខ្សែប្រយុទ្ធឆ្នើមៗជាច្រើន ហើយពួកគេគឺជាក្រុមតែមួយគត់ដែលមានកីឡាករ៣នាក់ចូលរួមចំណែករកគ្រាប់បាល់ច្រើនៗក្នុងការប្រកួតក្នុងពូល៥ដងកន្លងមកនេះ។ Khvicha Kvaratskhelia (ស៊ុតបញ្ចូលទីបាន២គ្រាប់ និងបញ្ជូនបាល់ឱ្យមិត្តរួមក្រុមស៊ុត៣គ្រាប់) គឺស្ថិតក្នុងចំណោមពួកគេ ហើយរូបគេឈានជើងចូលក្នុងការប្រកួតនេះទាំងកំពុងមានទម្រង់ដ៏អស្ចារ្យ។ ខ្សែបម្រើស្លាបសញ្ជាតិហ្សកហ្ស៊ីរូបនេះបានចូលរួមក្នុងការស៊ុតបញ្ចូលទីចំនួន៨គ្រាប់ក្នុងការប្រកួត៥លើកចុងក្រោយរបស់គេ ដោយស៊ុតបញ្ចូលទីក្នុង៣ប្រកួតជាប់ៗគ្នា។ រំពឹងថារូបគេនឹងអាចស៊ុតចូល Frankfurt ក្នុងសប្តាហ៍នេះ។
លទ្ធផលទស្សនទាយ Napoli ឈ្នះ ២-១។
– Liverpool vs Real Madrid
* Liverpool បានឈ្នះការប្រកួតវគ្គចែកពូលទាំង ៥ លើកចុងក្រោយរបស់ពួកគេ ដោយស៊ុតបញ្ចូលទីបាន ១៦ គ្រាប់។
* ក្រុមហង្សក្រហមបានឈ្នះ ២-០ ពីរដងក្នុងរយៈពេល ៨ ថ្ងៃចុងក្រោយ។
* Real Madrid បានឈ្នះតែម្តងគត់ក្នុងចំណោមការប្រកួត UCL ៧លើកចុងក្រោយទល់នឹងក្រុមអង់គ្លេស (ស្មើ២ ចាញ់៤)
* ក្រុមភ្ញៀវបានលេងទាំងយ៉ាប់ជាមួយ Leipzig និង Shakhtar នៅក្រៅទឹកដីក្នុងវគ្គចែកពូល។
រយៈពេលប្រាំមួយថ្ងៃមកនេះ Liverpool លេងបានល្អណាស់ដោយឈ្នះទល់សូន្យ២ប្រកួតជាប់ៗគ្នា ដោយបិទគម្លាតពិន្ទុមកនៅត្រឹម៦ពិន្ទុពីក្រុមលេខ ៤ Newcastle បន្ទាប់ពីឈ្នះនៅទឹកដី St James’ Park ។ ឥឡូវនេះក្រុមរបស់លោក Jurgen Klopp ត្រឡប់ទៅសកម្មភាពអឺរ៉ុបវិញក្នុងគោលបំណងសងសឹកចំពោះការចាញ់ក្រុម Real Madrid ក្នុងវគ្គផ្តាច់ព្រ័ត្រកាលពីរដូវកាលមុន។
ហង្សក្រហមប្រហែលជាបានចាញ់ Real ក្នុងទីក្រុងប៉ារីសក៏ពិតមែន ប៉ុន្តែម្ចាស់ជើងឯកអឺរ៉ុបមួយនេះបានឈ្នះតែម្តងគត់ក្នុងចំណោមការប្រកួតក្រៅដី ៧ លើកមុនរបស់ពួកគេទល់នឹងក្រុមអង់គ្លេសក្នុងក្របខណ្ឌ Champions League (ស្មើ២ ចាញ់៤)។ ខណៈក្រុមភ្ញៀវនេះបានគ្រងតំណែងជើងឯក World Champions នាពេលថ្មីៗនេះ រដូវកាលនេះមិនបានប្រព្រឹត្តទៅដូចការគ្រោងទុកសម្រាប់ពួកគេទេ។ ពួកគេបានតាមពីក្រោយ Barcelona ក្នុងស្រុក ហើយកំណត់ត្រារបស់ពួកគេនៅអឺរ៉ុបគួរតែផ្តល់ក្តីសង្ឃឹមដល់ Liverpool ។
ដោយមើលលើពិន្ទុក្នុងលីក Liverpool ដែលឈរនៅលេខរៀងទី ៨ ក្នុងតារាង Premier League គួរតែជាក្រុមខ្សោយជាង Real Madrid ។ ហើយមួយវិញទៀត ក្រុមការពារតំណែងជើងឯកនេះបានឈរលេខ១ក្នុងពូលដើម្បីឈានទៅវគ្គ ១៦ ក្រុមចុងក្រោយ ក្នុងនាមក្រុមរំពឹងឈ្នះពានខ្ពស់មួយដែរ។
ទោះយ៉ាងណាក៏ដោយ Real អាចឈរនៅលើពូលដោយសារមានក្រុមខ្សោយៗ ដោយស្ទើរតែពាក់កណ្តាលនៃពិន្ទុរបស់ពួកគេគឺបានមកពីជ័យជម្នះពីរដងលើក្រុម Celtic ។ ក្រុមយក្សអេស្ប៉ាញនេះបានស្មើនៅទឹកដី Shakhtar Donetsk ហើយចាញ់ ៣-២ នៅទឹកដី Leipzig ក្នុងពូល ដែលធ្វើឱ្យពួកគេមានពិន្ទុតិចជាង Liverpool ដែលបញ្ចប់នៅចំណាត់ថ្នាក់លេខ ២ ទៅទៀត។
ក្រុមហង្សក្រហមបានចាប់ផ្តើមការប្រកួតដ៏អន់ជាមួយនឹងបរាជ័យ ៤-១ ក្រោមស្នាដៃក្រុម Napoli ក្នុងការប្រកួតបើកឆាករបស់ពួកគេ ប៉ុន្តែពួកគេបានឈ្នះ ៥ ប្រកួតជាប់ៗគ្នាបន្ទាប់ពីនោះដើម្បីដណ្តើមបាន ១៥ ពិន្ទុ។ ក្រុមរបស់លោក Klopp ស៊ុតបញ្ចូលទីបាន ១៦ គ្រាប់ក្នុងការប្រកួតទាំង៦លើកនោះ ដូច្នេះពួកគេបានបង្ហាញភាពខ្លាំងរួចហើយនៅក្នុងទ្វីបអឺរ៉ុបក្នុងរដូវកាលនេះ។ ដោយសារទម្រង់លេងរបស់ពួកគេឥឡូវនេះកំពុងងើបឡើង Real គួរតែព្រួយបារម្ភអំពីការទៅលេងនៅទឹកដី Anfield។
លទ្ធផលព្យាករណ៍ Liverpool ឈ្នះ ២-១៕
Liverpool រំពឹងសងសឹក Real Madrid ឱ្យខាងតែបាន