ប្រែសម្រួលៈបំណង(ដេល្លីម៉េល)៖ សហរដ្ឋអាម៉េរិកនិងសម្ពន្ធមិត្តកាលពីថ្ងៃចន្ទបានទទូចសុំអោយក្រុមប្រឹក្សាសន្តិសុខអង្គការសហប្រជាជាតិថ្កោលទោសការបាញ់កាំជ្រួចផ្លោងដ៏ខុសច្បាប់របស់កូរ៉េខាងជើង តែចិននិងរុស្ស៊ីបានបន្ទោសភាពតឹនតឹងកាន់តែកើនឡើងនៅឧបទ្វីបកូរ៉េនេះថាមកពីអាម៉េរិកពង្រីកសមយុទ្ធយោធាដែលផ្តោតលើកូរ៉េខាងជើង។
នៅកិច្ចប្រជុំគ្រាអាសន្នមួយ ឯកអគ្គរដ្ឋទូតអាម៉េរិកប្រចាំអង្គការសហប្រជាជាតិលោកស្រី លីនដា ថូម៉ាស-ហ្គ្រីនហ្វៀល(Linda Thomas-Greenfield)បានប្រាប់ក្រុមប្រឹក្សាថាសហរដ្ឋអាម៉េរិកនឹងស្នើសេចក្តីថ្លែងការណ៍មួយដើម្បីសុំអោយរដ្ឋាភិបាលទីក្រុងព្យុងយ៉ាងអនុវត្តតាមសេចក្តីសំរេចចិត្តដាក់ទណ្ឌកម្មរបស់ក្រុមប្រឹក្សាសន្តិសុខលើខ្លួន និងចូលរួមការចរចាដ៏មានន័យ។
សេចក្តីថ្លែងការណ៍ណាមួយចេញពីក្រុមប្រឹក្សាសន្តិសុខ ទាមទារការគាំទ្រពីសមាជិកទាំងអស់ រួមទាំងសម្ពន្ធមិត្តកូរ៉េខាងជើង គឺចិននិងរុស្ស៊ីផងដែរ។
លោកស្រី លីនដា ថូម៉ាស-ហ្គ្រីនហ្វៀល បាននិយាយថា សហរដ្ឋអាម៉េរិកថ្កោលទោសការបាញ់កាំជ្រួចផ្លោងចម្ងាយខ្លីពីរដើមកាលពីថ្ងៃចន្ទ ក្រោយការបាញ់កាំជ្រួចផ្លោងឆ្លងទ្វីបមួយកាលពីថ្ងៃសៅរ៍ ដោយរំលោភបំរាមរបស់ក្រុមប្រឹក្សាសន្តិសុខស្តីពីការបាញ់កាំជ្រួចផ្លោងរបស់កូរ៉េខាងជើង។«ការបាញ់និងសម្តីគំរាមរបស់កូរ៉េខាងជើង កំពុងបំផ្លាញសន្តិភាពនិងសន្តិសុខអន្តរជាតិ»។
តែសម្ពន្ធមិត្តរបស់កូរ៉េខាងជើង គឺចិននិងរុស្ស៊ីបានតបវិញថា អ្វីដែលត្រូវការនៅពេលឥឡូវ គឺការចរចារវាងកូរ៉េខាងជើងនិងរដ្ឋការលោកបៃដិនការបន្ថយសមយុទ្ធយោធា បន្ថយទណ្ឌកម្មលើកូរ៉េខាងជើង និងអនុម័តសេចក្តីសំរេចិត្តមួយដែលប្រទេសទាំងពីរបានផ្សព្វផ្សាយកាលពីខែវិច្ឆិកាឆ្នាំ២០២១ ក្នុងបំណងដោះស្រាយស្ថានការណ៍នៅលើឧបទ្វីបកូរ៉េ។
សេចក្តីសំរេចចិត្តនោះសុំអោយក្រុមប្រឹក្សាសន្តិសុខបញ្ចប់ទណ្ឌកម្មមួយចំនួនលើកូរ៉េខាងជើង និងអំពាវនាវអោយអាម៉េរិកនិងកូរ៉េខាងជើងបន្តការចរចាហើយពិចារណាចាត់វិធានការបន្ធូរបន្ថយភាពតានតឹងនិងហានិភ័យនៃការប្រឈមមុខដោយយោធាដោយអនុម័តសេចក្តីប្រកាសឬសន្ធិសញ្ញាសន្តិភាពមួយដើម្បីបញ្ចប់សង្គ្រាមកូរ៉េ១៩៥០-១៩៥៣ជាផ្លូវការ។
សូមបញ្ជាក់ថាសង្គ្រាមកូរ៉េបានបញ្ចប់ត្រឹមសន្ធិសញ្ញាផ្អាកសង្គ្រាមមួយប៉ុណ្ណោះ ដោយទុកអោយឧបទ្វីបកូរ៉េនៅក្នុងស្ថានភាពមានសង្គ្រាមនៅឡើយតាមលក្ខណៈបច្ចេកទេស។
ឯកអគ្គរដ្ឋទូតរងចិនលោក ដាយ បីញ(Dai Bing)បាននិយាយថា សមយុទ្ធរួមគ្នារវាងយោធាអាម៉េរិកនិងកូរ៉េខាងត្បូងក្នុង«កំរិតខ្ពស់និងទំហំធំ»ការបញ្ជូនទ្រព្យយុទ្ធសាស្ត្រយោធាអាម៉េរិកមកកាន់ឧបទ្វីបកូរ៉េ និងដំណើរទស្សនកិច្ចរបស់អគ្គលេខាអង្គការណាតូទៅកាន់ទីក្រុងសេអ៊ូលនិងតូក្យូកាលពីពីរសប្តាហ៍មុន សុទ្ធតែ«បង្ករឿងជាខ្លាំង» ចំពោះកូរ៉េខាងជើងនិង«បង្កើនអារម្មណ៍អន្តិសុខខ្លាំងឡើង»។
ចំណែកឯកអគ្គរដ្ឋទូតរងរបស់រុស្ស៊ី បានប្រាប់ក្រុមប្រឹក្សាថា កូរ៉េខាងជើងកំពុងឆ្លើយតបជាមួយនឹងការសាកល្បងកាំជ្រួចទៅនឹង«សមយុទ្ធយោធាទ្រង់ទ្រាយធំនិងស៊ីជំរៅដែលមិនធ្លាប់មាននៅក្នុងតំបន់ក្រោមឆត្រអាម៉េរិក ដែលវាមានលក្ខណៈប្រឆាំងនឹងរដ្ឋាភិបាលទីក្រុងព្យុងយ៉ាងទាំងស្រុង»។
ក្នុងពេលជាមួយគ្នាឯកអគ្គរដ្ឋទូតជប៉ុន ដែលប្រទេសលោកបានកោះប្រជុំគ្រាអាសន្ននេះ បានប្រាប់ក្រុមប្រឹក្សាថា កាំជ្រួចផ្លោងឆ្លងទ្វីបរបស់កូរ៉េខាងជើងបានធ្លាក់ចូលតំបន់សេដ្ឋកិច្ចពិសេសជប៉ុនកាលពីថ្ងៃសៅរ៍ នៅចម្ងាយតែ២០០គីឡូម៉ែត្រពីកោះហុកកៃដូ កន្លែងដែលមនុស្សអាចមើ់លឃើញវាធ្លាក់ពីលើមេឃ។វាគំរាមដល់នាវានិងយន្តហោះ និងជា«អំពើបំភិតបំភ័យនិងការប្រើកម្លាំងគំរាម។ការនៅស្ងៀមមិនប្រតិកម្មនឹងគ្រាន់តែលើកទឹកចិត្តអោយអ្នកបំពានច្បាប់ធ្វើស្រេចតែចិត្ត»៕
ក្រោយកិច្ចប្រជុំរបស់ក្រុមប្រឹក្សា លោកស្រី លីនដា ថូម៉ាស-ហ្គ្រីនហ្វៀលបានអានសេចក្តីថ្លែងការណ៍មួយតាងនាមអោយសមាជិក១០ប្រទេសក្នុងក្រុមប្រឹក្សានិងកូរ៉េខាងត្បូង ដោយធ្វើការថ្កោលទោសកូរ៉េខាងជើង និងអំពាវនាវអោយសមាជិកប្រាំទៀតក្នុងក្រុមប្រឹក្សាចូលរួមថ្កោលទោស
រូបភាពបញ្ចេញដោយកូរ៉េខាងជើង បង្ហាញកាំជ្រួចផ្លោងដែលត្រូវបាញ់ចេញពីទីតាំងមិនស្គាល់មួយនៅកូរ៉េខាងជើងកាលពីថ្ងៃ២០កុម្ភៈ