ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសចិនបាននិយាយកាលពីថ្ងៃអង្គារទី២១កុម្ភៈថា ប្រទេសលោកចង់ដើរតួនាទីមួយក្នុងការបញ្ចប់សង្គ្រាមនៅអ៊ុយក្រែន ដោយបារម្ភជាខ្លាំងខ្លាចក្រែងជម្លោះនេះរាលដាលលែងអាចគ្រប់គ្រងបាននិងបានអំពាវនាវអោយប្រទេសមួយចំនួនឈប់«ចាក់ប្រេងលើភ្លើង» នៅក្នុងការនិយាយដែលទំនងសំដៅសហរដ្ឋអាម៉េរិក។
លោក ឈីន ហ្កាង(Qin Gang) បានប្រាប់អ្នកចូលរួមនៅសន្និសីទសន្តិសុខមួយនៅទីក្រុងប៉េកាំងថាចិនបារម្ភថាសង្គ្រាមចំណាស់មួយឆ្នាំនេះកាន់តែ«រាលដាលហួសពីការអាចគ្រប់គ្រងបាន»ហើយប្រទេសមួយចំនួនឈប់«ចាក់ប្រេងលើភ្លើងជាបន្ទាន់ »និងឈប់និយាយបំប៉ោងថា «ថ្ងៃនេះអ៊ុយក្រែន ថ្ងៃស្អែកតៃវ៉ាន់»តទៅទៀតទៅ។
«យើងប្រឆាំងជាដាច់ខាតអនុត្តរភាពក្នុងទំរង់ណាមួយ ប្រឆាំងការជ្រៀតជ្រែកបរទេសនៅក្នុងកិច្ចការរបស់ចិន»។
លោកបានបញ្ជាក់ថា ចិននឹងបន្តអំពាវនាវអោយមានកិច្ចពិភាក្សារកសន្តិភាព ហើយផ្តល់«ទស្សនៈចិន»ដើម្បីឈានដល់ដំណោះស្រាយនយោបាយមួយចំពោះវិបត្តិអ៊ុយក្រែន។
សូមបញ្ជាក់ថា រដ្ឋាភិបាលទីក្រុងប៉េកាំងដែលកាលពីឆ្នាំមុនបានប្រកាស«ភាពជាដៃគូគ្មានព្រំដែន»ជាមួយរដ្ឋាភិបាលទីក្រុងមូស្គូ បានទប់មិនព្រមចេញការថ្កោលទោសអ្វីដែលលោកខាងលិចថាជាការឈ្លានពានរបស់រុស្ស៊ីនៅអ៊ុយក្រែនទេ ហើយបន្ទោសលើពួកលោកខាងលិចគិតតែពង្រីកសម្ពន្ធភាពយោធាទៅកៀកនឹងព្រំដែនរុស្ស៊ី ដោយមិនខ្វល់នឹងការព្រួយបារម្ភសន្តិសុខរបស់រុស្ស៊ី។
អាម៉េរិកបានព្រមានចិនជាបន្តបន្ទាប់អំពីផលវិបាក បើសិនជាចិនផ្តល់ការគាំទ្រយោធាដល់រុស្ស៊ី ។
ទោះជាបដិសេធថាខ្លួនមិនធ្វើដូច្នេះ រដ្ឋាភិបាលទីក្រុងប៉េកាំងបានកាលពីម្សិលមិញបានបញ្ជាក់ថា អាម៉េរិកគ្មានសិទ្ធិអ្វីមកប្រាប់ចិនអោយធ្វើដូចនេះដូចនោះពាក់ព័ន្ធនឹងវិបត្តិអ៊ុយក្រែនទេហើយថា គឺ«អាម៉េរិកខ្លួនឯង មិនមែនចិនទេដែលបញ្ជូនសព្វាវុធចូលសមរភូមិអ៊ុយក្រែន»។
ការលើកឡើងរបស់លោកឈីន កើតឡើងនៅពេលទីភ្នាក់ងារសារព័ត៌មានតាស( TASS)របស់រុស្ស៊ី បាននិយាយថាអ្នកការទូតកំពូលចិនលោកវ៉ាង យី ត្រូវទៅដល់ទីក្រុងមូស្គូនៅថ្ងៃអង្គារនិងប្រមុខរដ្ឋចិនលោកស៊ី ជីនភីង ត្រូវគេរំពឹងថានឹងថ្លែង«សុន្ទរកថាសន្តិភាព»មួយនៅថ្ងៃសុក្រ ចំខួបមួយឆ្នាំនៃប្រតិបត្តិការយោធាពិសេសរុស្ស៊ីចូលអ៊ុយក្រែន។
ក្នុងពេលឈប់សំចតនៅហុងគ្រី លោកវ៉ាងកាលពីថ្ងៃចន្ទក៏បានអំពាវនាវអោយមានដំណោះស្រាយតាមការចរចាមួយចំពោះសង្គ្រាមអ៊ុយក្រែន ចំថ្ងៃដែលប្រធានាធិបតីអាម៉េរិកបានទៅធ្វើទស្សនកិច្ចអ៊ុយក្រែនដើម្បីបង្ហាញសាមគ្គីភាព ហើយប្រកាសផ្តល់ជំនួយយោធា៥០០លានដុល្លារបន្ថែម។
ក្នុងជំនួបជាមួយសមភាគីអាម៉េរិកកាលពីថ្ងៃសៅរ៍នៅសន្និសីទសន្តិសុខមួយនៅក្រុងមុយនិច លោកវ៉ាងក៏បាននិយាយាថា អាម៉េរិកគួរជំរុញការស្វែងរកដំណោះស្រាយនយោបាយមួយចំពោះវិបត្តិនេះជាជាង«បន្ថែមប្រេងលើភ្លើង»៕
រដ្ឋមន្ត្រីការបរទេសចិន ឈីន ហ្កាង បង្ហាញកាយវិកាស្វាគមន៍ប្រតិភូមកចូលរួមសន្និសីទសន្តិសុខនៅទីក្រុងប៉េកាំងកាលពីថ្ងៃ២១កុម្ភៈ