ប្រែសម្រួល : កញ្ញាដាលីស (ដេល្លីម៉េល) ៖ អូស្ត្រាលីមានកេរ្តិ៍ឈ្មោះល្បីខាងសត្វគ្រោះថ្នាក់ ហើយក្នុងករណីខ្លះវាជារឿងមិនពិតទេនៅតាមទីក្រុងដែលឱ្យអ្នកភ្ញៀវទេសចរប្រុងប្រយ័ត្ន តែក្នុងករណីផ្សេងការព្រមានអំពីគ្រោះថ្នាក់គឺសមហេតុផល។
រូបភាពកំពុងល្បីមួយដែលថតបាននៅរដ្ឋគ្វីនស៍លែនខាងជើង (North Queensland) និងថ្មីៗនេះត្រូវបានចែករំលែកតាមអនឡាញគឺជាឧទាហរណ៍ដ៏ល្អឥតខ្ចោះមួយអំពីករណីខាងលើ ដោយភ្ញៀវមិនបានអញ្ជើញមួយក្បាលកំពុងលាក់ខ្លួននៅក្រោមភក់ជិតគម្ពោតព្រៃ។
ប៉ុន្តែនៅចំកណ្តាលភក់ ភាពកខ្វក់ និងដុំថ្មនៅលើច្រាំងមាត់ទឹកនេះគឺមានសត្វល្មូនគ្រោះថ្នាក់ដ៏ធំសម្បើមមួយ ដែលថ្គាមដ៏មានអានុភាពរបស់វាអាចកិនកម្ទេចជាមួយនឹងកម្លាំងខ្លាំងជាងម៉ាស៊ីនកិនរថយន្តឧស្សាហកម្មទៅទៀត។
ទម្រង់រូបរាងក្រពើដ៏ធំនេះអាចសង្កេតឃើញនៅក្រោមភក់ ដោយក្បាលរបស់វាបែរមុខទៅមាត់ច្រាំង ហើយកន្ទុយលាក់នៅក្នុងទឹកភក់។
យោងតាមវេបសាយ National Geographic ក្រុមអ្នកស្រាវជ្រាវបានវាស់កំលាំងនៃការខាំរបស់ក្រពើទឹកប្រៃនេះនៅកម្រិត ៣.៧០០ ផោន (១.៦៧៨ គីឡូក្រាម) ក្នុងមួយអ៊ីញការ៉េ (PSI) ដែលវាមានឥទ្ធិពលបំផុតក្នុងចំណោមសត្វល្មូនលើដីទាំងអស់។
ផ្ទុយទៅវិញ សត្វតោបង្កើតកម្លាំងខាំបានប្រហែល ១.០០០ psi ហើយម៉ាស៊ីនកិនរថយន្តឧស្សាហកម្មភាគច្រើនត្រូវការប្រហែល ២.០០០psi ដើម្បីធ្វើការងាររបស់ពួកវា។
យោងតាមវេបសាយ CrocWise ដែលជាវេបសាយអំពីសុវត្ថិភាពដែលមានមូលដ្ឋាននៅតំបន់ត្រូពិចរដ្ឋគ្វីនស៍លែនខាងជើង សត្វក្រពើនៅក្នុងតំបន់នេះអាចមានប្រវែងរហូតដល់ ៦ ម៉ែត្រ ហើយអាចទប់ដង្ហើមនៅក្រោមទឹករយៈពេលមួយម៉ោងកន្លះ៕
ក្រពើទឹកប្រៃនៅរដ្ឋឃ្វីនស៍លែនខាងជើងអាចមានប្រវែង ៦ ម៉ែត្រនិងអាចទប់ដង្ហើមនៅក្រោមទឹកបានមួយម៉ោងកន្លះ