ប្រែសម្រួលៈបំណង(ដេល្លីម៉េល)៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃអង្គារបានព្រមានអំពីនុយក្លេអ៊ែរទៅកាន់លោកខាងលិចដោយសារបញ្ហាអ៊ុយក្រែនដោយលោកប្រកាសផ្អាកសន្ធិសញ្ញាគ្រប់គ្រងសព្វាវុធនុយក្លេអ៊ែរទ្វេភាគីមួយ ប្រកាសថាប្រព័ន្ធយុទ្ធសាស្ត្រថ្មីៗកំពុងធ្វើប្រតិបត្តិការប្រយុទ្ធនិងព្រមានថារដ្ឋាភិបាលទីក្រុងមូស្គូអាចបន្តការសាកល្បងនុយក្លេអ៊ែរ។
ការព្រមានរបស់ពូទីនកើតឡើងបន្ទាប់ពីប្រធានាធិបតីអាម៉េរិកបានទៅកាន់ទីក្រុងគៀវដោយផ្ទាល់ដើម្បីបង្ហាញថាអាម៉េរិកឈរនៅជាមួយប្រជាជនអ៊ុយក្រែននិងប្រកាសជួយជំនួយយោធា៥០០លានដុល្លារបន្ថែមដើម្បីធានាថាអ៊ុយក្រែននឹងឈ្នះសង្គ្រាម។
លោកក៏បានប្តេជ្ញាបន្តសង្គ្រាមចំណាស់មួយឆ្នាំរបស់លោកនៅអ៊ុយក្រែន និងចោទប្រកាន់សម្ពន្ធភាពយោធាណាតូដឹកនាំដោយអាម៉េរិកថាព្យាយាមពង្រីកអណ្តាតភ្លើងជម្លោះជាមួយនឹងជំនឿខុសថា ពួកគេអាចបំបាក់រុស្ស៊ីនៅក្នុងការប្រឈមមុខជាសកលមួយ។
នៅចំពោះមុខឥស្សរជនយោធានិងនយោបាយក្នុងសភារុស្ស៊ី លោកពូទីនបានរំលឹកសវតានៃការនាំដល់ការផ្ទុះសង្គ្រាមនិងការប្រឈមមុខធំបំផុតជាមួយលោកខាងលិចចាប់តាំងពីសម័យសង្គ្រាមត្រជាក់។លោកថា«យើងបានធ្វើអ្វីគ្រប់យ៉ាងដែលអាច ដោយស្មោះត្រង់ដើម្បីដោះស្រាយបញ្ហានៅអ៊ុយក្រែនដោយមធ្យោបាយសន្តិវិធី។យើងអត់ធ្មត់ យើងចរចាដោយអហិង្សាដើម្បីរកផ្លូវចេញពីជម្លោះនេះ តែសេណារីយ៉ូមួយផ្ទុយស្រឡះត្រូវបានគេរៀបចំទុកនៅពីក្រោយខ្នងយើង»។
«រុស្ស៊ីនឹងប្រឈមដោះស្រាយភារកិច្ចនៅចំពោះមុខដោយប្រុងប្រយ័ត្ននិងជាប្រចាំ»។
បើតាមលោកពូទីន បណ្តាប្រទេសលោកខាងលិច ដឹកនាំដោយអាម៉េរិក បានស្វះស្វែងរក«អំណាចគ្មានព្រំដែន»នៅក្នុងកិច្ចការពិភពលោកនិងថា រដ្ឋាភិបាលទីក្រុងគៀវបានសុំសព្វាវុធលោកខាងលិចតាំងពីមុនរុស្ស៊ីបើកប្រតិបត្តិការយោធាពិសេសថ្ងៃ២៤កុម្ភៈម្ល៉េះ។
លោកពូទីនបាននិយាយទៀតថា រុស្ស៊ីបានខិតខំធ្វើគ្រប់យ៉ាងដែលអាចដើម្បីបញ្ចៀសសង្គ្រាម តែអ៊ុយក្រែនក្រោមការគាំទ្រពីលោកខាងលិចមានផែនការវាយប្រហារតំបន់គ្រីម៉េ ដែលរុស្ស៊ីកាន់កាប់។«ឥឡូវប្រជាជនអ៊ុយក្រែនក្លាយជាចំណាប់ខ្មាំងនៃរបបទីក្រុងគៀវនិងស្តេចត្រាញ់លោកខាងលិចរបស់គេ ដែលកាន់កាប់ប្រទេសនេះទាំងនយោបាយ យោធានិងសេដ្ឋកិច្ច។
«ពួកគេចង់ប្រែក្លាយជម្លោះក្នុងស្រុកទៅជាការប្រឈមមុខសកលមួយ យើងយល់ថាវាទៅតាមផ្លូវហ្នឹងហើយប្រតិកម្មទៅតាមហ្នឹង។ការផ្ចាញ់យកឈ្នះរុស្ស៊ីវាមិនអាចទៅរួចទេ»។
លោកបានបន្តថា «ផ្តល់ប្រព័ន្ធសព្វាវុធចម្ងាយឆ្ងាយកាន់តែច្រើនដល់អ៊ុយក្រែនពេលណា យើងកាន់តែត្រូវបង្ខំចាត់វិធានការកំចាត់ការគំរាមអោយទៅឆ្ងាយពីព្រំដែនពេលនោះដែរ។
នៅចុងបញ្ចប់នៃសុន្ទរកថា លោកពូទីនបាននិយាយថា រុស្ស៊ីផ្អាកការចូលរួមរបស់ខ្លួនក្នុងសន្ធិសញ្ញាNew Startជាមួយសហរដ្ឋអាម៉េរិក ដែលកំហិតឃ្លាំងអាវុធនុយក្លេអ៊ែររបស់ភាគីទាំងពីរ។រុស្ស៊ីនិងអាម៉េរិកតំណាងអោយក្បាលគ្រាប់នុយក្លេអ៊ែរប្រមាណ៩០ភាគរយរបស់ពិភពលោក ដែលល្មមអាចកំទេចផែនដីយើងរាប់សិបដង។
លោកថា នៅពេលអាម៉េរិកជំរុញអោយមានការបន្តអធិការកិច្ចទីតាំងនុយក្លេអ៊ែររុស្ស៊ីនៅក្រោមសន្ធិសញ្ញានេះ សម្ពន្ធមិត្តណាតូនាំគ្នាជួយអ៊ុយក្រែនធ្វើការវាយប្រហារដោយដ្រូនលើមូលដ្ឋានទ័ពអាកាសរុស្ស៊ីដែលផ្ទុកយន្តហោះទម្លាក់គ្រាប់បំពាក់ក្បាលគ្រាប់នុយក្លេអ៊ែរ។យោធារុស្ស៊ីបាននិយាយថា ខ្លួនបានបាញ់ទម្លាក់ដ្រូនពីរដែលហោះចូលជ្រៅក្នុងប្រទេសរុស្ស៊ីកាលពីខែធ្នូ តែទាហានរុស្ស៊ីជាច្រើនបានស្លាប់ដោយបំណែកដ្រូនដែលបានធ្វើអោយខូចយន្តហោះផងដែរ។
«ការប្រើដ្រូនធ្វើឡើងក្រោមជំនួយរបស់អ្នកជំនាញការណាតូ។កាដែលណាតូសុំអោយបន្តការត្រួតពិនិត្យដូច្នេះវាមិនទំនងសោះ»។
លោកបានប្រាប់អោយដឹងថា កាលពីមួយសប្តាហ៍មុនលោកបានចុះហត្ថលេខាលើបទបញ្ជាមួយដើម្បីដាក់ពង្រាយកាំជ្រួចយុទ្ធសាស្ត្រតាំងលើដីថ្មី។តើពួកគេហ៊ានអើតក្បាលមកទៀតទេ?៕
នៅចំពោះមុខទស្សនិកជន រួមមានសមាជិកសភា ទាហាន ប្រធានចារកម្មនិងនាយកក្រុមហ៊ុនរដ្ឋ លោកបានសន្យាថានឹងបង្កើតមូលនិធិពិសេសមួយសំរាប់ជួយដលើគ្រួសារដែលបានបាត់បង់សមាជិកគ្រួសារនៅក្នុងសង្គ្រាមនេះ