ប្រែសម្រួល : កញ្ញាដាលីស (ដេល្លីម៉េល) ៖ សារព័ត៌មាន People’s Daily Health បាននិយាយកាលពីថ្ងៃអង្គារទី២១កុម្ភៈថា ខេត្តមួយចំនួនរបស់ចិនកំពុងផ្តល់ការឈប់សម្រាកមានប្រាក់ឧបត្ថម្ភសម្រាប់គូស្នេហ៍ថ្មីថ្មោងចំនួន៣០ ថ្ងៃដោយសង្ឃឹមលើកទឹកចិត្តឱ្យមានការរៀបការ និងជំរុញអត្រាកំណើតដែលកំពុងថយចុះ។
ការឈប់សម្រាកអាពាហ៍ពិពាហ៍ដែលមានប្រាក់ឈ្នួលអប្បបរមា៣ថ្ងៃ ប៉ុន្តែខេត្តនានាអាចកំណត់ប្រាក់ឧបត្ថម្ភផ្ទាល់ខ្លួនបន្ថែម ចាប់ពីខែកុម្ភៈ។
ខេត្តកាងស៊ូភាគពាយព្យនិងខេត្តផលិតធ្យូងថ្មសានស៊ី (Shanxi) ឥឡូវនេះផ្តល់ពេលសម្រាក៣០ថ្ងៃ ខណៈទីក្រុងសៀងហៃផ្តល់ពេលសម្រាក ១០ ថ្ងៃ និងខេត្តស៊ីឈ័ននៅតែផ្តល់ពេលសម្រាក ៣ ថ្ងៃដដែល នេះបើយោងតាមសារព័ត៌មាន People’s Daily Health ។
លោក យ៉ាង ហៃយ៉ាង (Yang Haiyang) ព្រឹទ្ធបុរសនៃវិទ្យាស្ថានស្រាវជ្រាវអភិវឌ្ឍន៍សង្គមនៃសាកលវិទ្យាល័យហិរញ្ញវត្ថុនិងសេដ្ឋកិច្ចនិរតី ត្រូវបានស្រង់សម្តីយ៉ាងដូច្នេះថា “ការបន្លាយពេលឈប់សម្រាកអាពាហ៍ពិពាហ៍យូរគឺជាមធ្យោបាយដ៏មានប្រសិទ្ធភាពមួយក្នុងការបង្កើនអត្រាមានកូន”។
លោកបាននិយាយថា “ការបន្លាយពេលឈប់សម្រាកអាពាហ៍ពិពាហ៍គឺធ្វើឡើងជាចម្បងនៅក្នុងខេត្ត-ក្រុងមួយចំនួនដែលមានការអភិវឌ្ឍសេដ្ឋកិច្ចយឺត” ដោយបន្ថែមថាមានតម្រូវការបន្ទាន់ដើម្បីពង្រីកទាំងកម្លាំងពលកម្មនិងជំរុញទាំងការប្រើប្រាស់។
លោកយ៉ាងបាននិយាយថា គោលនយោបាយគាំទ្រមួយចំនួនទៀតនៅតែត្រូវការជាចាំបាច់ រួមទាំងការឧបត្ថម្ភថ្លៃផ្ទះ និងការឈប់សម្រាកបិតុភាពសម្រាប់បុរស។
យោងតាមទិន្នន័យផ្លូវការបានឱ្យដឹងថា ចំនួនប្រជាជនរបស់ចិនបានធ្លាក់ចុះកាលពីឆ្នាំមុនជាលើកដំបូងក្នុងរយៈពេល ៦ ទសវត្សរ៍ ដែលជាចំណុចរបត់មួយត្រូវគេរំពឹងថានឹងបង្ហាញពីការចាប់ផ្តើមនៃការធ្លាក់ចុះរយៈពេលវែង។
កាលពីឆ្នាំមុន ចិនបានកត់ត្រាអត្រាកំណើតទាបបំផុតមិនធ្លាប់មានគឺកំណើត ៦,៧៧ នាក់ក្នុង ១.០០០ នាក់។
ការធ្លាក់ចុះភាគច្រើនគឺជាលទ្ធផលនៃគោលនយោបាយ “កូនមួយ” ដែលដាក់ចេញនៅចន្លោះឆ្នាំ ១៩៨០ និង ២០១៥ និងការកើនឡើងនៃការចំណាយលើការអប់រំបានធ្វើឱ្យជនជាតិចិនភាគច្រើនអស់លទ្ធភាពមានកូនលើសពីមួយឬមិនហ៊ានយកកូនតែម្តង៕
គូស្នេហ៍ចិនត្រៀមខ្លួនថតឈុតរៀបការនៅលើថ្នល់ក្នុងទីក្រុងសៀងហៃកាលពីឆ្នាំ២០២១