ដោយ: សរិទ្ធ/ភ្នំពេញ: បន្ទាប់ពីហេតុការណ៍បាក់ស្រុតផ្ទះប្រជាពលរដ្ឋមួយខ្នង ចូលរណ្តៅដីដ៏ជ្រៅមួយកន្លែង ដែលមានដក់ទឹក ប្រៀបដូចបឹងដ៏ធំមួយ ស្រាប់តែស្អែកឡើងប្រជាពលរដ្ឋបានប្រទះឃើញសពបុរសម្នាក់ បានស្លាប់អណ្តែតទឹកក្នុងទីតាំងរណ្តៅដីមួយនេះ បង្កជាការភ្ញាក់ផ្អើល ខណៈដែលពលរដ្ឋក្នុងភូមិមិនបានស្គាល់បុរសម្នាក់នេះទេ ហើយក៏ពុំមែនជាសមាជិកគ្រួសាររបស់ពលរដ្ឋដែលបានបាក់ស្រុតផ្ទះចូលរណ្តៅដីនេះដែរ។
ហេតុការណ៍ប្រទះឃើញសពអណ្តែតទឹកនេះ បានបង្កជាការភ្ញាក់ផ្អើលកាលពីវេលាម៉ោង ៧៖៥០នាទីព្រឹក ថ្ងៃទី២២ ខែកុម្ភៈ ឆ្នាំ២០២៣ នៅក្នុងទឹករណ្ដៅដី«តាសុន» ដែលមានទីតាំងស្ថិតនៅក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានបានឲ្យដឹងថា សពមានសភាពហើមស្អុយទៅហើយ មានពាក់អាវពណ៌លឿងឆ្នូតខ្មៅ ស្លៀកខោខ្លីពណ៌ខ្មៅ ហើយបើតាមកោសស្យវិច្ឆ័យ និងការស្រាវជ្រាវរបស់មន្រ្តីនគរបាលបានអោយដឹងថាសពជនរងគ្រោះមានឈ្មោះ រឹម ស៊ីយ៉ា ភេទប្រុស អាយុ៤២ឆ្នាំ មានស្រុកកំណើតនៅភូមិស្រែចារ ស្រុកស្នួល ខេត្តក្រចេះ បានស្លាប់ដោយសារលង់ទឹក។
សូមជម្រាបថា រណ្តៅដីក្នុងទីតាំងកើតហេតុនេះ ត្រូវបានអ្នកភូមិហៅថា រណ្ដៅដីតាសុន ព្រោះកាលពីប្រមាណ ២០ឆ្នាំមុន មានឈ្មួញម្នាក់ឈ្មោះ នួន សុន ជីកយកអាចម៌ដីទៅលក់ ដែលធ្វើឲ្យទីតាំងនេះ មានដក់ទឹកប្រៀបដូចបឹងធំល្វឹងល្វើយ ខណៈមានទំហំជាច្រើនហិចតា និងមានជម្រៅដ៏ជ្រៅប្រមាណ៧០ម៉ែត្រ។
ក្រោយពេលសមត្ថកិច្ចធ្វើការពិនិត្យសពរួចរាល់ សមត្ថកិច្ចបានយកសពទៅតម្កល់នៅវត្តទឹកថ្លារងចាំក្រុមគ្រួសារយកទៅធ្វើបុណ្យតាមប្រពៃណី៕/R
