ប្រែសម្រួល : កញ្ញាដាលីស (ប៊ីប៊ីស៊ី) ៖ នាយករដ្ឋមន្ត្រីអ៊ីតាលី លោកស្រី ចចចា មេឡូនី (Giorgia Meloni) បាននិយាយក្នុងអំឡុងទស្សនកិច្ចទៅកាន់ទីក្រុងគៀវកាលពីថ្ងៃអង្គារទី២១កុម្ភៈថា អ៊ីតាលីនឹងបន្តគាំទ្រអ៊ុយក្រែនក្នុងការទប់ទល់នឹងការវាយប្រហាររបស់រុស្ស៊ី ប៉ុន្តែមិនមានគម្រោងផ្តល់យន្តហោះចម្បាំងនោះទេ។
ក្នុងដំណើរទស្សនកិច្ចលើកដំបូងរបស់លោកស្រីទៅអ៊ុយក្រែនចាប់តាំងពីការឈ្លានពានរបស់រុស្ស៊ីកាលពីមួយឆ្នាំមុន មេដឹកនាំអ៊ីតាលីរូបនេះគឺជាអ្នកគាំទ្រដ៏រឹងមាំរបស់រដ្ឋាភិបាលក្រុងគៀវ ប៉ុន្តែអ្នកផ្សេងទៀតក្នុងសម្ពន្ធស្តាំនិយមរបស់លោកស្រីមិនមានភាពច្បាស់លាស់លើបញ្ហានេះទេ។
លោកស្រីមេឡូនីបាននិយាយនៅក្នុងសន្និសីទសារព័ត៌មានមួយជាមួយប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី ថា “នៅពេលនេះការផ្គត់ផ្គង់យន្តហោះមិនស្ថិតនៅលើតុទេ”។
លោកស្រីកំពុងឆ្លើយតបទៅនឹងសំណួរអំពីរបាយការណ៍មួយរបស់កាសែតអ៊ីតាលី La Repubblica ដែលលើកឡើងថា រដ្ឋាភិបាលក្រុងរ៉ូមអាចនឹងផ្គត់ផ្គង់យន្តហោះទម្លាក់គ្រាប់បែក AMX ចំនួនប្រាំគ្រឿង។
ការស្ទង់មតិបានបង្ហាញថា ជនជាតិអ៊ីតាលីភាគច្រើនប្រឆាំងការបញ្ជូនអាវុធទៅអ៊ុយក្រែន ហើយចង់សម្រេចបានសន្តិភាពតាមរយៈការធ្វើសម្បទានដល់រុស្ស៊ីជាជម្រើសដែលលោកស្រីមេឡូនីបានបដិសេធយ៉ាងម៉ឺងម៉ាត់។
អតីតនាយករដ្ឋមន្ត្រីអ៊ីតាលី លោក ស៊ីលវីយ៉ូ ប៊ែរលូស្កូនី (Silvio Berlusconi)ដែលជាមិត្តចាស់របស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយក្នុងខែនេះថាគាត់មិនចង់ជួបជាមួយលោកហ្សេលេនស្គីទេ ហើយបន្ទោសគាត់ចំពោះសង្គ្រាមនេះ។
កាលពីថ្ងៃអង្គារ លោកហ្សេលេនស្គីបានច្រានចោលការអត្ថាធិប្បាយរបស់លោកប៊ែរលូស្កូនី ដោយនិយាយថា មហាសេដ្ឋីប្រព័ន្ធផ្សព្វផ្សាយអាយុ ៨៦ឆ្នាំរូបនេះមិនបានមករស់នៅក្រោមការទម្លាក់គ្រាប់បែកប្រចាំថ្ងៃ និងការដាច់ភ្លើងដែលបណ្តាលមកពីការវាយប្រហារតាមអាកាសរបស់រុស្ស៊ីនោះទេ។
លោកស្រីមេឡូនីបានសង្កត់ធ្ងន់ថា អ៊ីតាលីនឹងបន្តផ្តល់ការគាំទ្ររបស់ខ្លួន ដោយនិយាយថា បរាជ័យរបស់អ៊ុយក្រែន “អាចត្រួសត្រាយផ្លូវសម្រាប់ការឈ្លានពានដែលអាចកើតមានលើរដ្ឋអឺរ៉ុបផ្សេងទៀត”។
ដោយសំដៅលើលោកប៊ែរលូស្កូនី លោកស្រីបាននិយាយថា សម្ពន្ធរបស់លោកស្រីមានភាពរឹងមាំក្នុងការគាំទ្រអ៊ុយក្រែន ជាមួយនឹង “អង្គហេតុ” និងការបោះឆ្នោតក្នុងសភា ដោយមិនខ្វល់ពីការលើកឡើងរបស់បុគ្គលនយោបាយនីមួយៗនោះឡើយ៕
លោកស្រីមេឡូនីជួបលោកហ្សេលេនស្គីក្នុងទីក្រុងគៀវកាលពីថ្ងៃអង្គារ