ប្រែសម្រួល : កញ្ញាដាលីស (ស្ត្រេតថែមស៍) ៖ ហ្វីលីពីននិងអូស្ត្រាលីកំពុងស្វែងរកការល្បាតដែនសមុទ្ររួមគ្នានៅសមុទ្រចិនខាងត្បូងចំពេលរដ្ឋាភិបាលក្រុងប៉េកាំងកំពុងបង្កើនសកម្មភាពយោធានៅក្នុងដែនទឹកមានជម្លោះ។
ឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិអូស្ត្រាលី លោក រីឆាត ម៉ាឡេស (Richard Marles) បាននិយាយថា លោកបានពិភាក្សាអំពីការល្បាតរួមគ្នាជាមួយសមភាគីហ្វីលីពីន លោក ខាលីតូ ហ្គាល់វ៉េស ជូនៀ (Carlito Galvez Jr) ក្នុងអំឡុងទស្សនកិច្ចរបស់លោកទៅកាន់ទីក្រុងម៉ានីលនៅថ្ងៃពុធទី២២កុម្ភៈនេះ។
លោកម៉ាឡេសបាននិយាយថា “ក្នុងនាមប្រទេសដែលប្តេជ្ញាចិត្តចំពោះសណ្តាប់ធ្នាប់ដែលផ្អែកលើច្បាប់សកល វាជារឿងធម្មតាទេដែលយើងគួរតែគិតអំពីវិធីដែលយើងអាចសហការក្នុងន័យនេះ”។
“ដូច្នេះហើយ យើងបាននិយាយនៅថ្ងៃនេះអំពីលទ្ធភាពនៃការល្បាតរួមគ្នា ហើយយើងនឹងបន្តការងារនោះ ហើយយើងសង្ឃឹមថាវានឹងមានផ្លែផ្កាក្នុងពេលឆាប់ៗ”។
លោកម៉ាឡេសនឹងជួបជាមួយប្រធានាធិបតីហ្វីលីពីន លោក ហ្វែរឌីណង់ ម៉ាកូស ជូនៀ (Ferdinand Marcos Jr) និងអនុប្រធានាធិបតីលោកស្រី សារ៉ា ឌុយទែត (Sara Duterte)នៅថ្ងៃពុធនេះ មុនពេលធ្វើដំណើរទៅកាន់ប្រទេសថៃនៅចុងសប្តាហ៍នេះ។
កិច្ចពិភាក្សាស្តីពីលទ្ធភាពល្បាតរួមគ្នានៅក្នុងសមុទ្រចិនខាងត្បូងធ្វើឡើងបន្ទាប់ពីមានការពិភាក្សាស្រដៀងគ្នារវាងហ្វីលីពីននិងសហរដ្ឋអាម៉េរិក។
ហ្វីលីពីនគឺជាសម្ពន្ធមិត្តយោធារបស់អូស្ត្រាលីនិងសហរដ្ឋអាម៉េរិកហើយប្រទេសទាំងបីកំពុងពង្រឹងទំនាក់ទំនងសន្តិសុខដើម្បីជំរុញឱ្យមានតំបន់ឥណ្ឌូប៉ាស៊ីហ្វិកដែលសេរីនិងបើកចំហប្រឆាំងនឹងឥទ្ធិពលកំពុងកើនឡើងរបស់ចិននៅក្នុងតំបន់។
លោកម៉ាឡេសនិយាយថា អូស្ត្រាលីចាត់ទុកហ្វីលីពីនជាភាគី “កណ្តាលបំផុត” ចំពោះផលប្រយោជន៍របស់ប្រទេសលោកក្នុងតំបន់ឥណ្ឌូប៉ាស៊ីហ្វិក។
ទីតាំងរបស់ហ្វីលីពីនបានធ្វើឱ្យប្រទេសនេះក្លាយជាដៃគូសន្តិសុខនិងសេដ្ឋកិច្ចដ៏សំខាន់សម្រាប់អូស្ត្រាលី ប្រសិនបើភាពតានតឹងផ្ទុះឡើងជុំវិញជម្លោះសមុទ្រចិនខាងត្បូងនិងជម្លោះចិន-តៃវ៉ាន់។
លោកបាននិយាយថា “យើងទាំងពីរគឺជាប្រទេសដែលបានវិនិយោគយ៉ាងស៊ីជម្រៅក្នុងការទទួលស្គាល់នូវអនុសញ្ញាអង្គការសហប្រជាជាតិស្តីពីច្បាប់សមុទ្រនៅទូទាំងពិភពលោក នៅកន្លែងដូចជាសមុទ្រចិនខាងត្បូងជាដើម កន្លែងដែលពាណិជ្ជកម្មភាគច្រើនរបស់អូស្ត្រាលីបានឆ្លងកាត់”៕
លោកម៉ាឡេស (ឆ្វេង) ជួបលោកខាលីតូ នៅក្រុងម៉ានីលនៅថ្ងៃពុធនេះ