ដោយៈ សុផល / ភ្នំពេញ៖ តារាចម្រៀង និងតារាសម្តែងដែលមានឈ្មោះបោះសម្លេង និងប្រជាប្រិយភាពខ្ពស់ នៅព្រះរាជាណាចក្រកម្ពុជា ជាច្រើនរូប នឹងមកចូលរួម ព្រឹត្តិការណ៍អបអរសាទរខួប ៣ ឆ្នាំ លេខពិសេសផ្ទាល់ខ្លួន និងការតាំងពិព័រណ៍ផ្លាកលេខ រថយន្ដ ការលក់ និងដេញថ្លៃលេខពិសេសផ្ទាល់ខ្លួន នៅថ្ងៃទី ៧-៨ មីនា ២០២៣។ នេះបើតាមការឱ្យដឹងរបស់ ក្រសួងសាធារណការ និងដឹកជញ្ជូន នាថ្ងៃទី២៤ ខែកុម្ភៈ ឆ្នាំ២០២៣ នេះ។
ក្រសួងសាធារណការ បានប្រកាសថា៖ នៅថ្ងៃទី ៧-៨ ខែមីនា ឆ្នាំ២០២៣ នឹងរៀបចំ ព្រឹត្តិការណ៍ដ៏អស្ចារ្យមួយ ដើម្បីអបអរសាទរខួប ៣ ឆ្នាំ នៃការបង្កើតលេខពិសេសផ្ទាល់ ខ្លួន ព្រមទាំងមានការតាំងពិព័រណ៍ផ្លាកលេខ-រថយន្ដ ការលក់ និងដេញថ្លៃលេខពិសេស ផ្ទាល់ខ្លួន ដើម្បីកៀរគរថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិផងដែរ។
កម្មវិធីនេះ ក៏មានការប្រគំតន្ដ្រី ដែលផ្សារភ្ជាប់ទៅនឹងការផ្សព្វផ្សាយសុវត្ថិភាពចរាចរណ៍ ដោយមានការចូលរួមសម្តែង ពីតារាចម្រៀងជាច្រើនដួង រួមមាន លោក វណ្ណដា អ្នកនាង ឱក សុគន្ធកញ្ញា អ្នកនាង សុគន្ធ នីសា អ្នកនាង ចាន់កែវ និមល កញ្ញា សូហ្វៀ កញ្ញា អេណាវីតា រ៉ូលីន និង លោក វណ្ណថាន លោក ខាយ លោក ខាត់ សម្បត្តិកិត្យា ក្រុម Polarix និងក្រុម La Cima Cartel។
តាមរយៈកម្មវិធីនេះ បងប្អូនអាចចូលរួមទស្សនាស្តង់ពិព័រណ៍ ការប្រគំតន្ត្រី និងលេង ល្បែងកំសាន្តផ្សេងៗ ដើម្បីទទួលបានវត្ថុអនុស្សាវរីយ ដោយសេរី និងឥតគិតថ្លៃ។ ចំពោះទីតាំង ធ្វើនៅសួនច្បារវត្តបទុមវតី រាជធានីភ្នំពេញ ចាប់ពីម៉ោង ៨ព្រឹក ដល់ម៉ោង ៩ យប់ ៕ V / N
