ប្រែសម្រួលៈបំណង(ដេល្លីម៉េល)៖ចិនកាលពីថ្ងៃសុក្រ ទី២៤កុម្ភៈចំខួបមួយឆ្នាំនៃប្រតិបត្តិការយោធារុស្ស៊ីនៅអ៊ុយក្រែន បានអំពាវនាវអោយមានកិច្ចពិភាក្សារកសន្តិភាពជាបន្ទាន់ និងបានបញ្ចេញផែនការរបស់ខ្លួនដើម្បីបញ្ចប់សង្គ្រាមនៅអ៊ុយក្រែន តែមហាអំណាចលោកខាងលិចជាច្រើនបានច្រានចោលសំណើទាំងនេះ ហើយបែរជាព្រមានរដ្ឋាភិបាលទីក្រុងប៉េកាំងកុំអោយមានទំនាក់ទំនងជិតស្និទ្ធពេកជាមួយរដ្ឋាភិបាលទីក្រុងមូស្គូ។
ក្នុងពេលជាមួយគ្នា អង្គការសហប្រជាជាតិបានសម្តែងការសុទិដ្ឋិនិយមបែបប្រយ័ត្នប្រយែងចំពោះសំណើរបស់ចិន ជាពិសេសអំពីការអំពាវនាវក្នុងឯកសារអោយបញ្ចៀសការប្រើសព្វាវុធនុយក្លេអ៊ែរ។
រុស្ស៊ីបានប្រតិកម្មវិជ្ជមានចំពោះកិច្ចខិតខំរបស់រដ្ឋាភិបាលទីក្រុងប៉េកាំង ហើយប្រធានាធិបតីអ៊ុយក្រែនលោកវ៉ូឡូឌីមៀ ហ្សេឡេស្គី បាននិយាយថា រដ្ឋាភិបាលទីក្រុងគៀវចាំបាច់«ធ្វើការជាមួយចិន»អំពីមធ្យោបាយបញ្ចប់សង្គ្រាមចំណាស់មួយឆ្នាំមកនេះនៅក្នុងប្រទេសលោក។
លោកហ្សេឡេនស្គី បានប្រាប់អ្នកយកព័ត៌មានថា លោកមានផែនការជួបលោកប្រធានាធិបតីចិន ស៊ី ជីនភីង ក្រោយពីរដ្ឋាភិបាលចិនអំពាវនាវអោយមានកិច្ចពិភាក្សារកសន្តិភាពដើម្បីបញ្ចប់សង្គ្រាមអ៊ុយក្រែន ដោយលោកបាននិយាយថា«វាសំខាន់សំរាប់សន្តិសុខរបស់ពិភពលោក»។
ហ្សេឡេនស្គី ចង់ជួបស៊ី ជីនភីង ក្រោយចិនចេញផែនការសន្តិភាពដើម្បីបញ្ចប់ជម្លោះអ៊ុយក្រែន
ឯកសារ១២ចំណុចរបស់ចិន អំពាវនាវអោយមាន«ដំណោះស្រាយនយោបាយ»មួយចំពោះវិបត្តិនេះ ក្រោយមានការចោទប្រកាន់ពីលោកខាងលិចថាចិនកំពុងពិចារណាផ្តល់សព្វាវុធដល់រុស្ស៊ី ជាការចោទប្រកាន់ដែលរដ្ឋាភិបាលទីក្រុងប៉េកាំងច្រានចោល និងចាត់ទុកថាជារឿងមិនពិត។
ចេញចំខួបមួយឆ្នាំនៃប្រតិបត្តិការយោធាពិសេសរបស់រុស្ស៊ីនៅអ៊ុយក្រែន ឯកសារនេះអំពាវនាវ«គ្រប់ភាគីគាំទ្ររុស្ស៊ីនិងអ៊ុយក្រែនធ្វើការក្នុងទិសដៅរួមគ្នានិងបន្តការចរចាដោយផ្ទាល់អោយបានឆាប់តាមលទ្ធភាពអាចធ្វើបាន»។
វាក៏បញ្ជាក់ច្បាស់អំពីការប្រឆាំងការមិនត្រឹមតែប្រើសព្វាវុធនុយក្លេអ៊ែរ តែក៏ប្រឆាំងការគំរាមបញ្ជូន ដាក់តាំងនិងប្រើវាផងដែរ បន្ទាប់ពីប្រធានាធិបតីរុស្ស៊ីលោកពូទីន បានគំរាមប្រើសព្វាវុធនុយគ្លេអ៊ែរក្នុងជម្លោះនេះ។
រុស្ស៊ីកាលពីថ្ងៃសុក្របាននិយាយថា ខ្លួនអោយតំលៃកិច្ចខិតខំរបស់រដ្ឋាភិបាលទីក្រុងប៉េកាំងដើម្បីដោះស្រាយជម្លោះនេះ តែថាដំណោះស្រាយណាមួយគួរទទួលស្គាល់ការគ្រប់គ្រងរបស់រដ្ឋាភិបាលវិមានក្រឹមឡាំងលើតំបន់អ៊ុយក្រែន(ឬទឹកដីរុស្ស៊ីថ្មី)ចំនួនបួន។
ទោះជាយ៉ាងណា ឯកសាររបស់រដ្ឋាភិបាលទីក្រុងប៉េកាំងបានជួបការមិនមានជំនឿភ្លាមពីបណ្តាសម្ពន្ធមិត្តអ៊ុយក្រែនដោយប្រធានអង្គការណាតូលោក ជេនស៍ ស្តូលថិនប៊ឺក និយាយថា រដ្ឋាភិបាលទីក្រុងប៉េកាំង«មិនមានក្រេឌីត(ជំនឿទុកចិត្ត)ច្រើនទេដោយសារតែខ្លួនមិនបានថ្កោលទោសការឈ្លានពានខុសច្បាប់នៅអ៊ុយក្រែន»។
ចំណែកប្រធានាធិបតីអាម៉េរិកលោក ចូ បៃដិន បានប្រាប់សារព័ត៌មានABCកាលពីថ្ងៃសុក្រថា «ពូទីនអបអរវា បើដូច្នេះអោយវាល្អម៉េចទៅ។ខ្ញុំមិនរំពឹងថាមានគំនិតផ្តួចផ្តើមណាមួយរបស់ចិនដើម្បីផ្តល់សព្វាវុធដល់រុស្ស៊ីទេ។យើងបានដាក់ទណ្ឌកម្មធ្ងន់ធ្ងរដល់នរណាដែលបានធ្វើដូច្នេះ»។
រីឯប្រធានាធិបតីអាល្លឺម៉ង់បាននិយាយថាទោះជា«យើងតែងផ្តល់ការស្វាគមន៍ចំពោះគ្រប់សំណើបែបស្ថាបនាដែលនាំយើងនៅលើផ្លូវឆ្ពោះទៅកាន់សន្តិភាពពិតមួយ…តែការដែលមហាអំណាចចិនចង់ដើរតួនាទីបែបស្ថាបនាមួយដូច្នេះ វានៅក្នុងការមន្ទិលនៅឡើយ»។
នៅសន្និសីទសារព័ត៌មានមួយនៅក្រុងប៉េកាំង ពួកអ្នកការទូតអ៊ុយក្រែននិងសហភាពអឺរ៉ុប បានអំពាវនាវអោយចិនគាបសង្កត់រុស្ស៊ីខ្លាំងឡើងដើម្បីបញ្ចប់ជម្លោះនេះ។ហ្សក តូឡេដូ(Jorge Toledo)ឯកអគ្គរដ្ឋទូតសហភាពអឺរ៉ុបប្រចាំចិន បាននិយាយថារដ្ឋាភិបាលទីក្រុងប៉េកាំង«មានការទទួលខុសត្រូវពិសេស»មួយក្នុងនាមខ្លួនជាសមាជិកអចិន្ត្រៃយ៍មួយនៃក្រុមប្រឹក្សាសន្តិសុខអង្គការសហប្រជាជាតិ ដើម្បីរក្សាការពារសន្តិភាព។
នៅអង្គការសហប្រជាជាតិ អ្នកនាំពាក្យរបស់អគ្គលេខាអង្គការសហប្រជាជាតិលោក អង់តូញ៉ូ ហ្គូទែរ៉េស បាននិយាយថា«ខ្ញុំគិតថា ការអំពាវនាវអោយជៀសវាងការប្រើនុយក្លេអ៊ែរមានសារសំខាន់ជាពិសេសខ្លាំងណាស់»។
ក្រុមមេដឹកនាំG7កាលពីថ្ងៃសុក្រក៏បានព្រមានប្រទេសនានាថាពួកគេនឹងជួប«ទណ្ឌកម្មធ្ងន់ធ្ងរ»បើសិនជាពួកគេនៅបន្តជួយរុស្ស៊ីអោយគេចវេសទណ្ឌកម្មអន្តរជាតិ៕