ប្រែសម្រួល : កញ្ញាដាលីស (ដេល្លីម៉េល) ៖ វាជាកម្មវិធីប្រើមិនដែលខានសម្រាប់ជនមានឥទ្ធិពលជាច្រើននៅជុំវិញពិភពលោក ហើយឥឡូវនេះតារាបណ្តាញសង្គមអាចប្រើ TikTok ពីរថយន្តរបស់ពួកគេបាន។
ក្រុមហ៊ុន Mercedes-Benz បានបង្ហាញផ្ទៃខាងក្នុងរថយន្តថ្មី ដែលល្អឥតខ្ចោះសម្រាប់ជនមានឥទ្ធិពលតាមអនឡាញ ដោយមានអេក្រង់ថាច់ស្គ្រីនខ្នាតយក្ស កាមេរ៉ា Selfieនិងកម្មវិធីភ្ជាប់មកជាមួយជាច្រើន រួមទាំង TikTok ផងដែរ។
Mercedes-Benz បានពន្យល់ថា “អតិថិជនអាចទន្ទឹងរង់ចាំបទពិសោធន៍កម្សាន្តដ៏ពិសេសនៅក្នុងរថយន្តប្រភេទ E-Class ថ្មី”។
“តន្ត្រី ហ្គេម និងមាតិកាស្ទ្រីមអាចទទួលបាននៅក្នុងរថយន្តនេះជាមួយនឹងអារម្មណ៍ស្ទើរតែគ្រប់រសជាតិទាំងអស់”។
ផ្នែកខាងក្នុងបែបអនាគតកាលនឹងបង្ហាញខ្លួននៅក្នុងម៉ូដែល Mercedes E-Class W214 ដែលនឹងដាក់លក់នៅរដូវក្តៅនេះ។
អ្នកដំណើរខាងមុខអាចចូលប្រើអេក្រង់ថាច់ស្គ្រីនដ៏ធំ ដែលពួកគេអាចជ្រើសរើសមើលភាពយន្ត កម្មវិធីទូរទស្សន៍ ឬចុចលើកម្មវិធីផ្សេងៗ។
សម្រាប់អ្នកបើកបរ រថយន្តនេះមានប្រព័ន្ធការពារភ្នែកដែលផ្អែកលើកាមេរ៉ាកម្រិតខ្ពស់ ដែលកាត់បន្ថយពន្លឺរបស់អេក្រង់ ដើម្បីបន្ថយហានិភ័យនៃការរំខាន។
ថ្លែងទៅកាន់ MailOnline លោក ថម ឡេកហ្គេត (Tom Leggett) អ្នកឯកទេសខាងបច្ចេកវិជ្ជាយានយន្តនៅក្រុមហ៊ុន Thatcham Research បានពន្យល់ពីរបៀបដែលប្រព័ន្ធត្រួតពិនិត្យអ្នកបើកបរដំណើរការ។
លោកបាននិយាយថា “រថយន្ត Mercedes E-Class នឹងត្រូវបានបំពាក់ជាមួយនឹងប្រព័ន្ធត្រួតពិនិត្យអ្នកបើកបរចុងក្រោយបង្អស់ ដើម្បីការពារហានិភ័យនៃការរំខានដល់អ្នកបើកបរ”។
“កាមេរ៉ា (ជាធម្មតាស្ថិតនៅក្នុងអេក្រង់របស់អ្នកបើកបរ) វិភាគចលនាភ្នែករបស់អ្នកបើកបរ ហើយអាចរកឃើញថាតើភ្នែកកំពុងសម្លឹងមើលអេក្រង់អ្នកដំណើរខាងមុខដែរឬអត់”។
“ប្រសិនបើនេះជាករណី នោះពន្លឺអេក្រង់របស់អ្នកដំណើរនឹងត្រូវកាត់បន្ថយ ហើយការព្រមាននឹងត្រូវលោតឡើងសម្រាប់អ្នកបើកបរ”។
“លើសពីនេះទៅទៀត អេក្រង់បង្ហាញរបស់អ្នកដំណើរមាន ការគ្រប់គ្រងពន្លឺទ្វេ (DLC) ដែលទប់ស្កាត់មាតិកាធំៗ ដូចជាខ្សែភាពយន្តកុំឱ្យអ្នកបើកបរមើលឃើញ។ នេះកាត់បន្ថយហានិភ័យនៃការរំខានអ្នកបើកបរបានកាន់តែច្រើនបន្ថែមទៀត”។
ប្រសិនបើកម្មវិធីទូរទស្សន៍ឬខ្សែភាពយន្តមិនទាន់គ្រប់គ្រាន់ទេ អ្នកដំណើរអាចជ្រើសរើសប្រើកម្មវិធីមួយក្នុងចំណោមកម្មវិធីទាំងប្រាំដែលភ្ជាប់មកជាមួយជំនួសវិញ គឺ TikTok, Angry Birds, Webex, Zoom ឬ Vivaldi ។
លោក ដេវីដ សៃឌិន (David Saidden) នាយកផ្នែកអភិវឌ្ឍន៍អាជីវកម្មចែកចាយនៅ TikTok បាននិយាយថា “ជាមួយនឹងកម្មវិធីទូរស័ព្ទរបស់យើង យើងនាំមកនូវភាពរីករាយដល់មនុស្សពេញមួយថ្ងៃរបស់ពួកគេ”។
“ខណៈយើងមានបំណងពង្រីកបទពិសោធន៍នោះសម្រាប់អ្នកប្រើប្រាស់របស់យើង យើងពិតជារំភើបក្នុងការចាប់ដៃគូជាមួយក្រុមហ៊ុន Mercedes-Benz ដើម្បីណែនាំការកម្សាន្តក្នុងរថយន្តដ៏អស្ចារ្យ ដែលនឹងផ្តល់ឱ្យសហគមន៍របស់យើងនូវឱកាសកាន់តែច្រើនដើម្បីរីករាយជាមួយមាតិកាដែលពួកគេចូលចិត្ត”៕
រថយន្ត Mercedes E-Class W214 ត្រៀមដាក់លក់នៅរដូវក្តៅខាងមុខ
