ប្រែសម្រួល : កញ្ញាដាលីស (ស្ត្រេតថែមស៍) ៖ ក្រសួងកសិកម្មនិងអភិវឌ្ឍន៍ជនបទរបស់វៀតណាមបានព្រមានតំបន់ភាគខាងត្បូងថា ការកើនឡើងនៃការដាំទុរេននាពេលថ្មីៗនេះអាចនាំឱ្យមានការផ្គត់ផ្គង់លើស។
នាយកដ្ឋានផលិតកម្មដំណាំរបស់ក្រសួងបាននិយាយក្នុងសេចក្តីថ្លែងការណ៍កាលពីថ្ងៃព្រហស្បតិ៍ថា កសិករនៅតំបន់ដីសណ្ដទន្លេមេគង្គ តំបន់ខ្ពង់រាបភាគកណ្តាល និងតំបន់ភាគខាងត្បូងផ្សេងទៀត កំពុងបំផ្លាញដំណាំកាហ្វេ ម្រេច និងស្រូវរបស់ពួកគេ ដើម្បីដាំទុរេនជំនួសវិញ។
សេចក្តីថ្លែងការណ៍និយាយថា ការកើនឡើងនៃការដាំទុរេនដ៏ខ្ជីខ្ជានេះអាចនាំទៅដល់ការផ្គត់ផ្គង់លើស ដោយបន្ថែមថា ការដាំទុរេនលើដីមិនស័ក្តិសមអាចនាំឱ្យបាត់បង់ទិន្នផលនិងគុណភាពយ៉ាងធ្ងន់ធ្ងរ។
អាជ្ញាធរមូលដ្ឋានត្រូវតែធ្វើផែនការដើម្បីទប់ទល់នឹងការបាត់បង់ដីធ្វើស្រែ ហើយចាំបាច់ត្រូវផ្សព្វផ្សាយបញ្ជីតំបន់ដែលសមស្របសម្រាប់ការដាំទុរេន។
នាយកដ្ឋានក៏បានណែនាំឱ្យអាជ្ញាធរមូលដ្ឋានជួយពន្យល់កសិករអំពីការផ្លាស់ប្តូរការដាំដំណាំរបស់ពួកគេទៅរកទុរេនផងដែរ។ អាជ្ញាធរគួរតែលើកទឹកចិត្តដល់កសិករឱ្យសហការនិងបង្កើតខ្សែសង្វាក់ផ្គត់ផ្គង់ពេញលេញជំនួសឱ្យកសិករម្នាក់ៗពង្រីកតែតំបន់កសិកម្មផ្ទាល់ខ្លួនរបស់ពួកគេ។ នាយកដ្ឋាននេះនិយាយថា នេះនឹងធានាបាននូវតម្លៃបន្ថែមខ្ពស់ចំពោះផលិតផលសម្រេច។
ទុរេននៅវៀតណាមត្រូវបានដាំដុះភាគច្រើននៅតាមបណ្តាខេត្តខ្ពង់រាបភាគខាងត្បូងនិងកណ្តាលគឺ ទៀនយ៉ាង បិនត្រេ ឡាមសុង និង យ៉ាឡាយ។
តម្លៃទុរេនបានកើនឡើងបីដងចាប់តាំងពីវៀតណាមបានចាប់ផ្តើមនាំចេញវាទៅប្រទេសចិនកាលពីខែកក្កដាឆ្នាំមុន។
ការនាំចេញទុរេនបានកើនឡើងជិត ១៣៧ ភាគរយកាលពីឆ្នាំមុនបើប្រៀបធៀបទៅនឹងឆ្នាំ ២០២១ ដែលស្មើនឹងតម្លៃសរុបជិត ៤២១ លានដុល្លារ។
ក្នុងខេត្តទៀនយ៉ាង បរិមាណដីដែលត្រូវបានប្រើសម្រាប់ដាំទុរេន បានកើនឡើងមួយភាគបី ស្មើនឹង ២០.០០០ ហិកតាក្នុងរយៈពេលប៉ុន្មានខែចុងក្រោយនេះ។
ការនាំចេញទុរេនរំពឹងកើនដល់ចំនួន ១ ពាន់លានដុល្លារនៅឆ្នាំនេះដើម្បីជួយដល់ការនាំចេញផលិតផលកសិកម្មសរុបរបស់វៀតណាមដល់ចំនួនលើសពី ៤ ពាន់លានដុល្លារ៕
កសិករម្នាក់កាន់ផ្លែទុរេននៅកសិដ្ឋានមួយក្នុងខេត្តឡុងអានកាលពីថ្ងៃទី២៤ ខែកុម្ភៈ ឆ្នាំ២០២៣
