ប្រែសម្រួលៈបំណង(VNExpress,bangkokpost)៖វិទ្យាស្ថានប៉ាស្ទ័រក្នុងទីក្រុងហូជីមិញបានចេញការព្រមានដល់បណ្តាទីតាំងភាគខាងត្បូងប្រទេសក្រោយពីផ្ទុះជំងឺផ្តាសាយបក្សនៅក្នុងប្រទេសក្បែរខាងកម្ពុជា បណ្តាលអោយស្លាប់មនុស្ស។
ការព្រមានកាលពីថ្ងៃសុក្រ កើតឡើងនៅពេលក្រសួងសុខាភិបាលកម្ពុជាបានប្រកាសជូនពត៌មាននៅថ្ងៃទី២៤ ខែកុម្ភៈ ស្តីពីការរកឃើញករណីទី២នៃជំងឺផ្តាសាយបក្សីលើមនុស្សនៅកម្ពុជា ក្នុងខែកុម្ភៈ ឆ្នាំ២០២៣ បន្ទាប់ពីមានករណីស្លាប់កុមារីម្នាក់ អាយុ១១ឆ្នាំ ៦ខែកាលពីថ្ងៃទី២២ ខែកុម្ភៈ កន្លងទៅថ្មីៗនេះ នៅស្រុកស៊ីធរកណ្ដាល ខេត្តព្រៃវែង។
ករណីទី២ នៃជំងឺផ្តាសាយបក្សី ប្រភេទH5N1 នៅលើមនុស្សនៅកម្ពុជា បានកើតមាន លើបុរសម្នាក់ អាយុ ៤៩ ឆ្នាំ ដែលមានទីលំនៅក្នុងភូមិរលាំង ឃុំរំចេក ស្រុកស៊ីធរកណ្ដាល ខេត្តព្រៃវែង ត្រូវជាឪពុករបស់កុមារី នៃករណីទី១ ប៉ុន្តែស្ថានភាព សុខភាពរបស់បុរសនេះ មិនទាន់មានចេញនូវរោគសញ្ញាអ្វីគួរឱ្យកត់សម្គាល់នៅឡើយទេ។
អង្គការសុខភាពពិភពលោកបាននិយាយថា ខ្លួនបានទាក់ទងអាជ្ញាធរកម្ពុជាជាប់ជាប្រចាំអំពីស្ថានការណ៍ផ្ទុះជំងឺផ្តាសាយបក្សីនេះ ហើយបានសម្តែងការព្រួយបារម្ភ ដោយសារតែបានរកឃើញឪពុករបស់កុមារីរងគ្រោះបានកើតជំងឺនេះដែរ ដែលនាំអោយមានការបារម្ភអំពីការឆ្លងពីមនុស្សទៅមនុស្ស។
វេជ្ជបណ្ឌិត ង្វៀន វូ ធឿង(Nguyen Vu Thuong) អនុប្រធានវិទ្យាស្ថានប៉ាស្ទ័រ បាននិយាយថាបណ្តាទីតាំងភាគខាងត្បូងវៀតណាម គួរបង្កើនការឃ្លាំមើលនិងតាមដានរកជំងឺនេះ ហើយបញ្ជូនសំណាកករណីសង្ស័យមកកាន់វិទ្យាស្ថានដើម្បីធ្វើតេស្តិ៍។លោកបានបន្តថា មនុស្សនិងសត្វស្លាបមកពីតំបន់ផ្ទុះផ្តាសាយបក្សីនៅកម្ពុជាគួរត្រូវតាមដាន។
សូមបញ្ជាក់ថា វៀតណាមបានរកឃើញអ្នកកើតជំងឺនេះជាលើកដំបូងក្នុងរយៈពេលប្រាំបីឆ្នាំកាលពីឆ្នាំ២០២២។វាបានកើតលើក្មេងស្រីអាយុ៥ឆ្នាំម្នាក់ដែលបានបរិភោគសាច់មាន់ទាឈឺ មុនពេលនាងធ្លាក់ខ្លួនឈឺ តែបានជាវិញនៅពេលក្រោយមក។
ក្នុងពេលជាមួយគ្នា នាយកដ្ឋានគ្រប់គ្រងជំងឺថៃ(DDC)បានចេញការព្រមានអំពីការផ្ទុះជំងឺផ្តាសាយបក្សី ក្រោយការកើតមានជំងឺនេះនៅកម្ពុជា។
មន្ត្រីDDCបាននិយាយថានាយកដ្ឋានបាននិងកំពុងតាមដានសភាពការណ៍នៅកម្ពុជានិងបានរកឃើញថាក្មេងស្រីកម្ពុជាបានចេញរោគសញ្ញាជំងឺនេះនៅថ្ងៃ១៦កុម្ភៈ និងបានស្លាប់នៅថ្ងៃ២១កុម្ភៈ នៅក្នុងខេត្តជាប់ប្រទេសវៀតណាម។ឳពុក្មេងរងគ្រោះក៏ឆ្លងជំងឺនេះ ហើយករណីនេះត្រូវបានរាយការណ៍ទៅកាន់អង្គការសុខភាពពិភពលោក។
បើតាមលោកវេជ្ជបណ្ឌិត សូផន អៀមស៊ីរិថាវ៉ន អនុប្រធាននាយកដ្ឋានខាងលើ ថៃមិនបានរកឃើញជំងឺនេះអស់១៦ឆ្នាំហើយ តែ«យើងមិនដែលបាត់បង់ការប្រុងប្រយ័ត្នទេ។យើងមានវិធានការបង្ការ»។
លោកថា អាជ្ញាធរថៃក៏មានកិច្ចសហការជាមួយអាជ្ញាធរកម្ពុជាក្នុងការទប់ស្កាត់វីរុសផ្តាសាយបក្សី ប្រភេទH5N1ដែលចម្លងមកពីសត្វស្លាប រួមមានមាន់ទាដែលបង្កការស្លាប់កំរិតខ្ពស់ និងចម្លងមកកាន់មនុស្សដែលប៉ះពាល់វាផ្ទាល់។
អង្គការសុខភាពពិភពលោក បានអំពាវនាវអោយមានការប្រុងប្រយ័ត្ននៅខែនេះ ក្រោយការរកឃើញជំងឺផ្តាសាយបក្សីកើតលើថនិកសត្វ។បច្ចុប្បន្នជំងឺនេះត្រូវបានរកឃើញនៅ២១ប្រទេស រួមមានកម្ពុជា៕
មាន់ចិញ្ចឹមនៅកសិដ្ឋានមួយនៅវៀតណាមខាងត្បូង