ដោយៈ ប.ជ័យ / បន្ទាយមានជ័យៈ លោកអភិបាលខេត្តបន្ទាយមានជ័យ នៅថ្ងៃទី២៥ ខែកុម្ភៈ ឆ្នាំ២០២៣ បានចុះពិនិត្យមើលជាមួយក្រុមការងារខេត្ត នៅលើទីតាំងអាង ដែលក្រុមជាង បានកំពុងចាក់បេតុងលើខ្នងអាង ឆ្ពោះទៅខាងជើង និងទៅខាងលិចនៃផ្ទៃអាង ដែលមានប្រវែងសរុប ១៧ ៤៦0 ម៉ែត្រ ទទឹង ៦ ម៉ែត្រ និងកម្រាស់ ២ តឹក។
លោក អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថាៈ ក្នុងនាមរដ្ឋបាលខេត្តបន្ទាយមានជ័យ និងប្រជាពលរដ្ឋទូទាំងខេត្ត សូមគោរពថ្លែងអំណរគុណ យ៉ាងជ្រាលជៅ ជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចបានផ្តល់អំណោយផ្លូវចាក់បេតុង លើអាងត្រពាំងថ្ម សម្រាប់ការធ្វើដំណើររបស់បងប្អូនប្រជាពលរដ្ឋ
និងជាផ្លូវយុទ្ធសាស្ត្រតភ្ជាប់ទេសចរណ៍តភ្ជាប់ពីប្រាសាទបន្ទាយឆ្មារ ស្រុកថ្មពួក ដល់ខ្នងអាងត្រពាំងថ្ម ស្រុកភ្នំស្រុក ខេត្តបន្ទាយមានជ័យ និងចេញបន្តទៅខេត្តសៀមរាប ។
ចំណែកមេការក្រុមជាងដែលស្ថាបនា បានដឹងថាៈ ផ្លូវបេតុងលើខ្នងអាងត្រពាំងថ្មនេះ នឹងស្ថាបនាបានរួចរាល់ សម្រាប់បងប្អូនប្រជាពលរដ្ឋ និងភ្ញៀវទេសចរ មកលេងកម្សាន្តនៅអាងនេះ ថ្ងៃបុណ្យចូលឆ្នាំថ្មី ប្រពៃណីជាតិខ្មែរ ថ្ងៃទី១៤-១៥-១៦ ខែមេសាឆ្នាំ២០២៣ ខាងមុខនេះ ។
សូមរំលឹកថា កាលពីថ្ងៃទី១ ខែកក្កដាឆ្នាំ២០២២ ជាទិវាមច្ឆជាតិ នៅអាងត្រពាំងថ្មស្រុកភ្នំស្រុក សម្តេចតេជោ ហ៊ុន សែន នាយករដ្ឋមន្ត្រី បានប្រកាសផ្តល់ផ្លូវបេតុងលើខ្នងអាងត្រពាំងថ្ម ជូនពលរដ្ឋនៅខេត្តបន្ទាយមានជ័យនិងដោយឡែក នៅស្រុកភ្នំស្រុក ៕ V / N
