ប្រែសម្រួល : កញ្ញាដាលីស (ដេល្លីម៉េល) ៖ ជនភៀសខ្លួនអាហ្វហ្គានីស្ថានរាប់រយនាក់ ដែលប្រឈមមុខនឹងការពន្យារពេលយ៉ាងយូរក្នុងការអនុម័តទិដ្ឋាការពីអាម៉េរិកបានតវ៉ានៅក្នុងរដ្ឋធានីរបស់ប៉ាគីស្ថានកាលពីថ្ងៃអាទិត្យទី២៦កុម្ភៈ។
កម្មវិធីជនភៀសខ្លួនអាទិភាពទី១និងអាទិភាពទី២របស់រដ្ឋាភិបាលអាម៉េរិក ដែលគេស្គាល់ថា P1 និង P2 គឺសំដៅចេញទិដ្ឋាការឱ្យបានរហ័សសម្រាប់ជនជាតិអាហ្វហ្គានីស្ថានដែលមានហានិភ័យ រួមទាំងអ្នកសារព័ត៌មាននិងសកម្មជនសិទ្ធិមនុស្ស បន្ទាប់ពីក្រុមតាលីបង់ចូលកាន់កាប់ប្រទេសកំណើតអាហ្វហ្គានីស្ថានរបស់ពួកគេ។
អ្នកដែលមានសិទ្ធិត្រូវតែធ្វើការឱ្យរដ្ឋាភិបាលអាម៉េរិក អង្គការប្រព័ន្ធផ្សព្វផ្សាយដែលមានមូលដ្ឋាននៅសហរដ្ឋអាម៉េរិក ឬអង្គការមិនមែនរដ្ឋាភិបាលនៅក្នុងប្រទេសអាហ្វហ្គានីស្ថាន។
អ្នកដាក់ពាក្យសុំបានរង់ចាំនៅក្នុងប្រទេសប៉ាគីស្ថានអស់រយៈពេលជាង ១៨ ខែសម្រាប់មន្ត្រីអាម៉េរិកធ្វើដំណើរការពាក្យសុំទិដ្ឋាការរបស់ពួកគេ។
ការពន្យារពេលក្នុងការអនុម័តទិដ្ឋាការនិងការតាំងទីលំនៅថ្មីបានធ្វើឱ្យអ្នកដាក់ពាក្យសុំអាហ្វហ្គានីស្ថានស្ថិតក្នុងស្ថានភាពងាយរងគ្រោះដោយសារពួកគេប្រឈមនឹងការលំបាកផ្នែកសេដ្ឋកិច្ចនិងកង្វះលទ្ធភាពទទួលបានសេវាសុខភាព ការអប់រំ និងសេវាកម្មផ្សេងទៀតនៅក្នុងប្រទេសប៉ាគីស្ថាន។
ម៉ូហាម៉ាត់ បាកៀ អាម៉ាឌី (Mohammad Baqir Ahmadi) ដែលនិយាយថា លោកបានជួយរៀបចំការតវ៉ានៅខាងក្រៅក្លិបសារព័ត៌មានជាតិរបស់ប៉ាគីស្ថានក្នុងទីក្រុងអ៊ីស្លាម៉ាបាដ បាននិយាយថា ប្រជាជនអាហ្វហ្គានីស្ថានជាច្រើនដែលមានវត្តមានកំពុងប្រឈមមុខនឹងបញ្ហាក្នុងការបន្តទិដ្ឋាការ ដោយត្រូវរង់ចាំដំណើរការដាក់ពាក្យសុំយ៉ាងយូរនៅក្នុងប្រទេសប៉ាគីស្ថាន។
ក្រុមអ្នកតវ៉ាបាននិយាយថា បេក្ខជនមិនទាន់បានទទួលការសម្ភាសន៍បឋមដែលចាំបាច់ដើម្បីចាប់ផ្តើមដំណើរការស្នើសុំទិដ្ឋាការនៅឡើយទេ។
ហេសាមុតឌីន (Hesamuddin) ជាជនជាតិអាហ្វហ្គានីស្ថានដែលកំពុងរង់ចាំដំណើរការករណី P2 របស់គាត់ បាននិយាយថា អាជ្ញាធរគួរតែជម្លៀសអ្នកដាក់ពាក្យសុំ P1 និង P2អាហ្វហ្គានីស្ថានទៅកាន់ប្រទេសមួយ ដែលមជ្ឈមណ្ឌលគាំទ្រការតាំងទីលំនៅចាំបាច់ (RSC)បើក និងអាចធ្វើការសម្ភាសន៍បាន។
លោកបាននិយាយថា “ពួកគេត្រូវតែជម្លៀសយើងទៅប្រទេសមួយផ្សេងទៀត ដែល RSC មានអ្នកធ្វើការ ហើយអាចដំណើរការនៅទីនោះបាន”។
នៅក្រោមច្បាប់របស់សហរដ្ឋអាម៉េរិក អ្នកដាក់ពាក្យត្រូវតែផ្លាស់ទីលំនៅទៅប្រទេសទីបីជាមុនសិន ដើម្បីឱ្យករណីរបស់ពួកគេត្រូវបានដំណើរការ ដែលដំបូងវាអាចចំណាយពេលរហូតដល់ ១៤ ទៅ ១៨ ខែ ហើយករណីទាំងអស់ត្រូវដំណើរការតាមរយៈមជ្ឈមណ្ឌលគាំទ្រការតាំងទីលំនៅថ្មី។
ក្រុមតាលីបង់បានចូលកាន់អំណាចនៅអាហ្វហ្គានីស្ថានក្នុងខែសីហា ឆ្នាំ ២០២១ ខណៈកងកម្លាំងអាម៉េរិកនិងណាតូបានដកខ្លួនចេញ។
ប្រជាជនអាហ្វហ្គានីស្ថានជាច្រើនបានស្វែងរកការចាកចេញភ្លាមៗបន្ទាប់ពីក្រុមតាលីបង់ចូលកាន់កាប់។
ក្រុមតាលីបង់បានដាក់កំហិតជាបន្តបន្ទាប់ជាពិសេសលើស្ត្រី៕
ជនភៀសខ្លួនអាហ្វហ្គានីស្ថានកាន់បដាអំឡុងការតវ៉ានៅក្រុងអ៊ីស្លាម៉ាបាដ ប្រទេសប៉ាគីស្ថាន កាលពីថ្ងៃអាទិត្យ ទី២៦ ខែកុម្ភៈ ឆ្នាំ២០២៣