ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរបាននិយាយថា ទូកឈើពេញណែនដោយជនចំណាកស្រុកបានបុកចំថ្មប៉ប្រះទឹកហើយដាច់ជាចម្រៀកនៅមុនព្រឹកថ្ងៃអាទិត្យទី២៦កុម្ភៈនៅឯនាយឆ្នេរសមុទ្រអ៊ីតាលី។ ក្រុមអ្នកជួយសង្គ្រោះបានរកឃើញសាកសពជិត ៦០ ហើយមនុស្សរាប់សិបនាក់ទៀតកំពុងបាត់ខ្លួននៅក្នុងទឹកដែលមានរលកដ៏អាក្រក់នេះ។
ទីភ្នាក់ងារជនភៀសខ្លួននិងជនចំណាកស្រុករបស់អង្គការសហប្រជាជាតិបាននិយាយថា ក្រុមមន្ត្រីមានការបារម្ភថា ចំនួនអ្នកស្លាប់អាចកើនឡើងដល់ជាង ១០០ នាក់ដោយហេតុថាអ្នកនៅរស់រានមានជីវិតមួយចំនួនបានបង្ហាញថា ទូកនេះមានអ្នកដំណើរដល់ទៅ ២០០ នាក់នៅពេលវាចាកចេញពីតួកគី។
ឆ្មាំសមុទ្រអ៊ីតាលីបាននិយាយថា យ៉ាងហោចណាស់មនុស្ស ៨០ នាក់ត្រូវបានរកឃើញនៅរស់ រួមទាំងអ្នកខ្លះដែលបានទៅដល់ច្រាំងសមុទ្របន្ទាប់ពីទូកលិចនៅឯនាយឆ្នេរសមុទ្រកាឡាព្រីយ៉ា (Calabria) តាមបណ្តោយសមុទ្រអាយអូនៀន (Ionian)។ អូប័រមួយរបស់ទីភ្នាក់ងារខាងលើបានជួយសង្គ្រោះបុរសពីរនាក់ដែលទទួលរងអាការៈថយចុះកម្តៅហើយបានស្រង់សាកសពក្មេងប្រុសម្នាក់។
ខណៈថ្ងៃលិចជិតមកដល់ អ្នកពន្លត់អគ្គិភ័យបាននិយាយថា សាកសពចំនួន ៥៩ នាក់ត្រូវបានរកឃើញ។
ទូរទស្សន៍រដ្ឋបាននិយាយថា បុរសម្នាក់ត្រូវបានចាប់ខ្លួនទៅឃុំខ្លួនដើម្បីសាកសួរ បន្ទាប់ពីអ្នកនៅរស់រានមានជីវិតចង្អុលថាគាត់ជាអ្នកជួញដូរមនុស្ស។
ទូកបានបុកជាមួយថ្មប៉ប្រះទឹកនៅក្នុងសមុទ្រដែលមានរលកធំៗ។ កំណាត់ធំៗចំនួនបីរបស់ទូកបានទើរលើឆ្នេរក្បែរទីក្រុងស្តេកកាតូឌីឃូត្រូ (Steccato di Cutro) ជាកន្លែងដែលកម្ទេចឈើពណ៌ខៀវភ្លឺបានរាយប៉ាយលើខ្សាច់ដូចជាឈើគូស៕
មនុស្ស៥៩នាក់ស្លាប់នៅក្បែរឆ្នេរសមុទ្រកាឡាព្រីយ៉ា ខណៈទូករបស់ពួកគេបុកថ្មប៉ប្រះទឹកកាលពីព្រឹកទៀបភ្លឺថ្ងៃអាទិត្យ