ប្រែសម្រួលៈបំណង,កញ្ញាដាលីស (ដេល្លីម៉េល) ៖ សហរដ្ឋអាម៉េរិក«មានជំនឿ»ថាចិនកំពុងពិចារណាផ្តល់សម្ភារផ្តាច់ផ្តិលជីវិតមនុស្សដើម្បីគាំទ្រកងកម្លាំងរុស្ស៊ីអោយធ្វើសង្គ្រាមនៅអ៊ុយក្រែន នេះបើតាមពួកមន្ត្រីអាម៉េរិកបានអះអាងកាលពីថ្ងៃអាទិត្យ ទោះជាមន្ត្រីចិនបានចេញមកបដិសេធម្តងជាពីរដងហើយក្តី។
នៅពេលពួកគេមិនមើលឃើញសញ្ញាណាមួយដែលថារដ្ឋាភិបាលទីក្រុងប៉េកាំងធ្វើដូច្នេះ ពួកគេបានបញ្ជាក់សាររបស់អាម៉េរិកកាលពីចុងសប្តាហ៍ដែលព្រមានទុចិនទុកជាមុនថា «មិនត្រូវដើរហួសខ្សែបន្ទាត់ក្រហម»ទេ។
ក្នុងកិច្ចសម្ភាសន៍មួយជាមួយសារព័ត៌មានCBSកាលពីថ្ងៃអាទិត្យម្សិលមិញ នាយក CIAលោក វីលលៀម បឺន (William Burns)បាននិយាយថា «យើងជឿថាក្រុមមេដឹកនាំចិនកំពុងពិចារណាផ្តល់គ្រឿងបរិក្ខារដែលអាចសម្លាប់មនុស្ស»ដល់រុស្ស៊ី តែ«យើងក៏មិនចង់ឃើញការសំរេចចិត្តចុងក្រោយណាមួយដែលនៅមិនទាន់កើតឡើងនៅឡើយ។យើងមិនឃើញមានភស្តុតាងអំពីការដឹកជញ្ជូនគ្រឿងបរិក្ខារដែលអាចសម្លាប់មនុស្ស»នៅឡើយទេ។
សូមបញ្ជាក់ថា ក្រុមមន្ត្រីអាម៉េរិកបាននាំគ្នាវាយប្រហារការទូតដ៏ធំមួយនៅមួយសប្តាហ៍មកនេះដើម្បីព្រមានរដ្ឋាភិបាលទីក្រុងប៉េកាំងថាកុំអោយជួយគាំទ្រផ្នែកយោធាដល់រុស្ស៊ី ដែលពួកអ្នកជំនាញការបារម្ភថាវានឹងនាំអោយផ្លាស់ប្តូរសភាពការណ៍សង្គ្រាមនៅអ៊ុយក្រែនជាខ្លាំងហើយអាចរាលដាលទៅជាសង្គ្រាមលោក។
រដ្ឋាភិបាលទីក្រុងប៉េកាំងកន្លងមកបានបដិសេធការចោទប្រកាន់ដូច្នេះ និងថា«មានតែអាម៉េរិកដែលបន្តបញ្ជូនគ្រឿងសព្វាវុធទៅកាន់សមរភូមិអ៊ុយក្រែន គឺជាអ្នកបន្ថែមប្រេងលើភ្លើង»នៅក្នុងជម្លោះនេះ។
នាយក CIA លោក វីលលៀម បឺន ផ្តល់កិច្ចសម្ភាសន៍ដ៏កម្រដល់សារព័ត៌មាន CBS កាលពីថ្ងៃ២៦កុម្ភៈ ដោយបន្តវាយប្រហារចិន
នាយក CIA លោក វីលលៀម បឺន ក៏បាននិយាយថា ទីភ្នាក់ងារស៊ើបការណ៍សម្ងាត់របស់អាម៉េរិកនេះបានបង្ហាញថា ប្រធានាធិបតីចិន ស៊ី ជីនភីង បានណែនាំយោធារបស់ប្រទេសគាត់ឱ្យ”ត្រៀមខ្លួនជាស្រេចនៅឆ្នាំ២០២៧”ដើម្បីឈ្លានពានកោះតៃវ៉ាន់បើទោះបីជាបច្ចុប្បន្នគាត់អាចមានការសង្ស័យអំពីសមត្ថភាពរបស់គាត់ក្នុងការធ្វើដូច្នេះដោយសារបទពិសោធន៍របស់រុស្ស៊ីក្នុងសង្គ្រាមជាមួយអ៊ុយក្រែនក៏ដោយ។
នៅក្នុងបទសម្ភាសន៍តាមទូរទស្សន៍ដែលបានចាក់ផ្សាយកាលពីថ្ងៃអាទិត្យ លោកបឺនបានសង្កត់ធ្ងន់ថាសហរដ្ឋអាម៉េរិកត្រូវតែចាត់វិធានការយ៉ាងម៉ឺងម៉ាត់ចំពោះបំណងប្រាថ្នារបស់លោកស៊ីដើម្បីគ្រប់គ្រងតៃវ៉ាន់ឱ្យបាននៅទីបំផុត ទោះបីជាជម្លោះយោធាមិនមែនមិនអាចបញ្ចៀសរួចក៏ដោយ។
លោកបឺនបានប្រាប់កម្មវិធី Face the Nation របស់ទូរទស្សន៍ CBS ថា “យើងពិតជាបានដឹង ព្រោះវាបានផ្សព្វផ្សាយជាសាធារណៈថាលោកប្រធានាធិបតីស៊ីបានណែនាំថ្នាក់ដឹកនាំយោធាចិនឱ្យត្រៀមខ្លួននៅឆ្នាំ ២០២៧ ដើម្បីឈ្លានពានតៃវ៉ាន់ ប៉ុន្តែនោះមិនមានន័យថាគាត់បានសម្រេចចិត្តឈ្លានពាននៅឆ្នាំ ២០២៧ ឬឆ្នាំណាមួយទៀតនោះទេ”។
លោកបាននិយាយថា”ខ្ញុំគិតថាការវិនិច្ឆ័យរបស់យើងយ៉ាងហោចណាស់គឺថាប្រធានាធិបតីស៊ីនិងថ្នាក់ដឹកនាំយោធារបស់គាត់មានមន្ទិលនៅថ្ងៃនេះអំពីថាតើពួកគេអាចវាយយកកោះតៃវ៉ាន់មកកាន់កាប់បានឬអត់”៕