ប្រែសម្រួល : កញ្ញាដាលីស (ដេល្លីម៉េល) ៖ ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃចន្ទទី២៧កុម្ភៈថា មេដឹកនាំកូរ៉េខាងជើងលោក គីម ជុងអ៊ុនបានបើកសន្និសីទនយោបាយដ៏ធំមួយដែលរៀបចំឡើងដើម្បីកែលម្អវិស័យកសិកម្ម ចំពេលមានការវាយតម្លៃពីខាងក្រៅថា អសន្តិសុខស្បៀងរ៉ាំរ៉ៃរបស់ប្រទេសនេះកំពុងកាន់តែអាក្រក់ទៅៗហើយ។
របាយការណ៍មិនបានបញ្ជាក់ថ្មីៗនេះបាននិយាយថា ជនជាតិកូរ៉េខាងជើងមិនដឹងចំនួនបានស្លាប់ដោយការអត់អាហារ។ប៉ុន្តែអ្នកសង្កេតការណ៍មិនបានឃើញការបង្ហាញពីការស្លាប់ទ្រង់ទ្រាយធំឬទុរ្ភិក្សនៅក្នុងប្រទេសកូរ៉េខាងជើងនោះទេ ទោះបីជាកង្វះខាតស្បៀងអាហាររបស់ខ្លួនទំនងជាកាន់តែផុងជ្រៅដោយសារតែការទប់ស្កាត់នានាទាក់ទងនឹងជំងឺរាតត្បាត ការដាក់ទណ្ឌកម្មអន្តរជាតិជាបន្តបន្ទាប់ និងការគ្រប់គ្រងមិនត្រឹមត្រូវរបស់ខ្លួនក៏ដោយ។
ទីភ្នាក់ងារសារព័ត៌មានមជ្ឈិមកូរ៉េ (KCNA)បានរាយការណ៍ថា ក្នុងអំឡុងពេលកិច្ចប្រជុំកម្រិតខ្ពស់នៃគណបក្សពលករកំពុងកាន់អំណាច ដែលបានចាប់ផ្តើមកាលពីថ្ងៃអាទិត្យ មន្ត្រីជាន់ខ្ពស់គណបក្សបានពិនិត្យការងារកាលពីឆ្នាំមុនក្រោមគោលដៅរបស់រដ្ឋដើម្បីសម្រេច “បដិវត្តន៍ជនបទក្នុងយុគសម័យថ្មី”។
របាយការណ៍បាននិយាយថា កិច្ចប្រជុំនៃគណៈកម្មាធិការមជ្ឈិមបក្សនឹងកំណត់កិច្ចការ “បន្ទាន់និងសំខាន់” លើបញ្ហាកសិកម្ម និង”កិច្ចការបន្ទាន់ដែលកើតឡើងនៅដំណាក់កាលបច្ចុប្បន្ននៃការអភិវឌ្ឍសេដ្ឋកិច្ចជាតិ”។
KNCA មិនបានបញ្ជាក់ថាតើលោកគីមបាននិយាយឬអត់ក្នុងអំឡុងពេលនៃកិច្ចប្រជុំឬតើវាមានរយៈពេលយូរប៉ុនណានោះទេ។ មន្ត្រីជាន់ខ្ពស់ដូចជានាយខុទ្ទកាល័យនាយករដ្ឋមន្ត្រី លោក គីម តុក ហ៊ុន (Kim Tok Hun) និងលោក ចូ យ៉ុង វ៉ុន (Jo Yong Won) ជាជំនួយការជិតស្និទ្ធបំផុតរបស់លោកគីម ដែលគ្រប់គ្រងកិច្ចការស្ថាប័នរបស់គណៈកម្មាធិការមជ្ឈិមក៏បានចូលរួមផងដែរ។
កិច្ចប្រជុំនេះជាសម័យប្រជុំពេញអង្គលើកដំបូងរបស់គណបក្សដែលបានប្រជុំដើម្បីពិភាក្សាលើវិស័យកសិកម្មតែមួយមុខប៉ុណ្ណោះ។ របាយការណ៍កាលពីថ្ងៃចន្ទមិនបានរៀបរាប់លម្អិតអំពីរបៀបវារៈរបស់ខ្លួននោះទេ ប៉ុន្តែការិយាល័យនយោបាយដ៏មានឥទ្ធិពលរបស់គណបក្សបាននិយាយកាលពីដើមខែនេះថា”ចំណុចរបត់មួយគឺចាំបាច់ដើម្បីជំរុញការផ្លាស់ប្តូរទាំងស្រុងនៅក្នុងការអភិវឌ្ឍកសិកម្ម”៕
លោក គីម ជុងអ៊ុន ថ្លែងក្នុងអំឡុងកិច្ចប្រជុំនៃគណបក្សពលករនៅទីស្នាក់ការកណ្តាលរបស់ខ្លួនក្នុងទីក្រុងព្យុងយ៉ាងកាលពីថ្ងៃអាទិត្យ ទី២៦ ខែកុម្ភៈ ឆ្នាំ២០២៣