ដោយៈ គង់ហេង / កំពង់ចាម៖ លោក អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានស្នើឱ្យមន្ទីរអប់រំ យុវជន និងកីឡា យកចិត្តទុកដាក់បន្ថែមទៀត លើការប្រមូលកុមារគ្រប់អាយុ ឱ្យចូលរៀន បានច្រើន គឺអនុវត្តតាមទិសស្លោក «សាលារៀន គឺត្រូវស្វែងរកកុមារ»។ នេះជាការលើកឡើង នៅក្នុងសន្ទរកថាកម្រាស់ ជិតប្រាំ ទំព័រ របស់លោកអភិបាលខេត្តកំពង់ចាមរូបនេះ នៅក្នុងពិធីបើកសន្និបាតបូក សរុបវាយ តម្លៃលទ្ធផលការងារអប់រំ យុវជន និងកីឡាឆ្នាំសិក្សា ២០២១-២០២២ នៅក្នុងមន្ទីរអប់រំ យុវជន និងកីឡាខេត្តនេះ នៅព្រឹកថ្ងៃទី ២៧ កុម្ភៈនេះ។
លោក អ៊ុន ចាន់ដា បានលើកឡើង នៅក្នុងសន្ទរកថានោះទៀតថាៈ ឆ្នាំសិក្សាថ្មីនេះ និងឆ្នាំសិក្សាបន្តទៅមុខទៀត បញ្ហាដែលយើងត្រូវដោះស្រាយ ចំពោះមុខ គឺការ លើកកម្ពស់គុណភាពអប់រំ ឱ្យមានតុល្យភាព សមស្របទៅនឹងការពង្រីកបរិមាណអប់រំ ដែលប្រការនេះគឺ ជាគោលដៅពីរ នៃសកម្មភាពមួយដែលមិនអាចផ្តាច់ចេញពីគ្នាបាន។ បើចង់លើកកម្ពស់គុណភាពអប់រំគី ត្រូវកែលម្អល័ក្ខខ័ណ្ឌចាំបាច់នានា នៃសកម្មភាព បង្រៀន និងរៀន។ បើចង់ពង្រីកបរិមាណអប់រំ គឺត្រូវកសាងសាលារៀនបន្ថែម បណ្តុះបណ្តាលគ្រូបង្រៀនបន្ថែម និងបន្ថែមសម្ភារសិក្សា ពីព្រោះថា ចំនួនកុមារ ដល់វ័យសិក្សា កាន់តែមានការកើនឡើង ពីមួយឆ្នាំទៅមួយឆ្នាំ ចំណែកឯតម្រូវការរបស់ ទីផ្សារ ក៏ដូចជា សង្គមជាតិ គឺសុទ្ធតែទាមទារកធនធានមនុស្ស ប្រកបដោយសមត្ថភាព និងគុណភាព ផងដែរ។
លោកបានបន្ថែមថាៈ ក្នុងនាមអភិបាល នៃគណៈអភិបាលខេត្ត និងក្នុងនាមខ្លួនខ្ញុំផ្ទាល់ ខ្ញុំសូមឱ្យមន្ទីរអប់រំ យុវជន និងកីឡាខេត្តកំពង់ចាម ត្រូវយកចិត្តទុកដាក់បន្ថែមទៀត លើការប្រមូលកុមារ គ្រប់អាយុ ឱ្យចូលរៀនបានច្រើន ប្រកបដោយសមធម៌ ទោះបីជា ពួកគេ ស្ថិតនៅទីកន្លែងណា រស់នៅក្នុងស្ថានភាពបែបណាក៏ដោយ ជាពិសេសនៅតំបន់ ជួបការលំបាក និងតំបន់ដាច់ស្រយាល ដោយអនុវត្តតាមទិសស្លោក “សាលារៀន គឺ ត្រូវស្វែងរកកុមារ” ដោយខិតខំកសាងសាលារៀន ហើយបង្កើតបរិស្ថានរៀនសូត្រ ដល់សិស្សានុសិស្ស ឱ្យប្រកបដោយផាសុកភាព ទាំងផ្លូវកាយ និងផ្លូវចិត្ត ពោលគឺ ប្រែក្លាយសាលារៀន ជាសាលាកុមារមេត្រី ដើម្បីឱ្យពួកគេទទួលបានចំណេះដឹង ចំណេះធ្វើ សមត្ថភាពជំនាញខ្ពស់ មានសីលធម៌រស់នៅល្អ ចេះរួមរស់នៅជាមួយគា្ន ដោយសុខដុមរមនាក្នុងគ្រួសារ និងសង្គមជាតិ។
ម្យ៉ាងទៀត ខ្ញុំសូមធ្វើការអំពាវនាវដល់ លោកគ្រូ អ្នកគ្រូ និងអ្នកពាក់ព័ន្ធជាមួយនឹងការងារអប់រំទាំងអស់ សូមធ្វើការផ្សព្វផ្សាយ រាល់សារាចរ សេចក្ដីណែនាំផ្សេងៗ ពិសេសគឺការងារទាក់ទងនឹងវិធានការបង្ការទប់ស្កាត់ និងបង្ក្រាបសកម្មភាព ក្រុមទំនើង” ការអនុវត្តបទបញ្ញតិ នៃច្បាប់ចរាចរផ្លូវគោកថ្មី ការជួញដូរកុមារ និងការប្រើប្រាស់គ្រឿងញៀន ការលុបបំបាត់ពលកម្មកុមារទម្រង់ធ្ងន់ធ្ងរ បំផុត ការគោរពបទបញ្ជាផ្ទៃក្នុងរបស់សាលារៀន និង ការទប់ស្កាត់ជំងឺរាតត្បាតកូវីដ-១៩ ឱ្យបានទូលំទូលាយនឹងជ្រួតជ្រាប ដល់សិស្សានុសិស្សទាំងអស់ ដើម្បីឱ្យពួកគេ មានទុនជាគ្រឹះ ក្នុងការកសាង និងអភិវឌ្ឍន៍ខ្លួនឱ្យក្លាយទៅជា “កូនល្អ សិស្សល្អ មិត្តល្អ” នៅថ្ងៃអនាគត៕/V.mara
